Efesus 4 - Buka Blahi Ka Cheke Holo

Tahati te gnafa na mala kaisei au fodu

¹ Iara au ka suga sosolo naugna iara ne loku ranghini Lord. Eghume iara cheke heta ka ghotilo, eigna nakarhami ghotilo na mala au doglo mala nanaba ka puhigna God mae ihei te kilo mei ghami na mala leghuni mana.

² Ghotilo mala edi fabrahu glepo igre: au faleghu, au blagna, nei thosei diꞌatami faghose ka keha naiknore. Eghuteuna kate au nogna puhi fadidiꞌa kaisei naikno ka ghotilo na ranghini kheragna fofodu na, te keli na phiamare thosei magra, nu fari fathaegoi ka puhi namha.

³ Tharunga te Blahi na salo fodu ghami ka puhi pharikeli. Hati nhetami na mala au ka puhi tuana ke lamnami.

⁴ Tahati naikno khiloau gre kaisei thini ngala. Jare kaisei Tharunga te Blahi. Eghuteuna God neke kilo ghita tahati gnafa mala hata kaisei glepo te keli ngala te ofoni teu tahati na.

⁵ Jare na kaisei Lord, kaisei fatutuani, nei kaisei apublahi.

⁶ Jare na kaisei God Kmada gnafa. Mana funei fruni ghita gnafa, nei au heva heva ka nauthoglu gne, nei au baluda gnafa.

⁷ Kraes neke tusu ranghi ghita soasopai khokofakasai te mala loku ranghini God leghuni thofno gaoghathogna.

⁸ Naugna igne grioriso te blahi na ne cheke eghu agne, “Kate haghe kligna ka thofno namono na, mana na sesekai kmana naikno balugna. Eghuteuna tusu lao khokofakasai ka naiknore.”

⁹ Te chekeni na, “Mana neke haghe kligna,” unha eghu gaoghathogna na? Gaoghathogna na mana neke kulu soru mei ka nauthoglu igne.

¹⁰ Tutuani fara, Jisas mae ihei teke soru mei, eghuteuna mana la mae ihei teke haghe na. Mana haghe ne tei sala'uni maloa gne. Mana neke eni igne mala au heva heva ka gobigna lepo fateore.

¹¹ Eghuteuna Jisas mae ihei teke tusu mei ka tahati u khokofakasai te mala loku ranghini God. Mana neke vavahi keha mae mala khuru, keha mae mala profet, keha mae mala toutonu eigna Nonomho te Keli, keha mae mala velepuhi nei reireghini nogna khiloau na.

¹² Mana neke eni igne mala tangomana nogna naikno te gnafa God re te mala loku fakelidi nogna glokure, nei mala kotu heta thinigna Kraes.

¹³ U gloku igne na theome gnafa ghilei kaisei ngala tahati hui ka fatutuani nei ka glalase eigna Thugna God. Eghuteuna tahati ginauna naikno puhi nei kotu haghe jateula Kraes ka nakarhagna eghu.

¹⁴ Kate kotu haghe te naikno biꞌo na, tahati ginauna theome jateula vaka te pala tafri ka nuri ba galo biꞌo ia eghu. Tahati ginauna theome tangomana te ghosei leghuni u nafnata farirhiu te chaichaghi na. Neuba hatimare mae velepuhi chaichaghi are ne magnahaghei chaghi ghita tahati kolho mala leghuni tahati nabrou te jafra na.

¹⁵ Theo! Tahati mala cheke ranghidi kheradare unha te tutuani nei doglo balu namha, mala tangomana tahati te thofno kotu haghe te mala kaisei balugna Kraes mae ihei te pha'ugna khiloau.

¹⁶ Naugna Kraes te pha'ugna u thini na, sopagna vido te gnafa ka thini na famane loku fodu fakeli, te loku fodu baludi gnarho teke tusu mei Kraes. Soasopa vido ka thini na eni fakeli nogna gloku na. Eghuteuna gloku igre tangomana te toghoni thini tongana na te mala kotu nei heta balu namha.

Puhi majaghani

¹⁷ Ka nanghagna Lord, iara magnahaghei te cheke heta ka ghotilo, thosei au fabrahu jateula naikno te theome fatutuani ni God eghu. Gaoghathodire theo nafudi kolho.

¹⁸ Tutuani mare theome laseni kaisei glepo nogna God naugna nagnafadire ne patugama fara. Eghume mare au khaba ka thofno nakarha te tutuani teke tusu mei God igne.

¹⁹ Mare la theo hi te haimini mamaja na, mare heta ghedi ka unha te jafra nei magnahaghei fara te eni koba unha glepo te diꞌa na.

²⁰ Nu theome nafnata puhi tuana teke farirhiu ghami te mala leghuni Kraes na eghu. Theo.

²¹ Ghotilo neke thofno nomhinihi eigna mae Jisas Kraes, eghuteuna ghehati neke farirhiu ghami ghotilo unha te tutuani na.

²² Tutuani, ghehati neke farirhiu ghami ghotilo mala lilisei puhi te diꞌa gna tifa teke leghuni ghotilo ka nakarhamira. Naugna puhigna tifa igne fodu ka chaichaghi nei puhi diꞌa, eghuteuna puhigna tifa na tangomana te fadidiꞌa ghami fabrahu.

²³ Ghehati neke farirhiu ghami mala thofno majaghani fara ka nagnafami nei gaoghathomi teu ghotilo re.

²⁴ Uve, ghehati neke farirhiu ghami ghotilo mala au ka thofno puhi majaghani, eigna God neke vuavuha ghami ghotilo mala leghuni puhigna thegna na mala thofno doglo nei blahi eghu.

²⁵ Eghume te keli na ghotilo lilisei puhi te chaichaghi gne. Eghuteuna unha te chekeni ghotilo ka naikno khiloaure glepo te tutuani na ngala, naugna tahati te gnafa na kaisei ngala ka thinigna Kraes.

²⁶ Ne diꞌa tamu nganu, thosei snakreni diꞌa tamu na mala eni kaisei najafra. Thosei diꞌatami fabrahu ghilei plulu naprai na.

²⁷ Thosei snakreni mae Satan mala fadiꞌani nakarhami na.

²⁸ Mae ihei te blau koba na, lilisei nafnata puhi tuana mala ke funu loku fakeli. Te keli na mana loku heta mala tangomana te toghoni thegna ka puhi te keli nei tangomana te toghodi iheire te kuma.

²⁹ Kate cheke na, ghotilo thosei chekeni kaisei cheke te diꞌa. Nu te keli na, chekeni ngala unha te nabagna te mala nomhini naiknore, eghuteuna nomi cheke ghotilo re ginauna tangomana te toghodi naikno te fanomhore.

³⁰ Eghuteuna thosei fadiꞌa nagnafani mae Tharunga te Blahi, naugna mana nogna nhaꞌa cheke God eigna God ginauna thofno fasnagla ghami ka narane leghu lahu na.

³¹ Lilisei puhi te gnafa te poru ka nagnafamire te mala fari fadiadiꞌai; thosei cheke diꞌa ba diꞌatami; thosei fnaja fabiꞌo; thosei vuavuha cheke; thosei majora.

³² Nu te keli na ghotilo fathaegoi nei fari namhai. Fari hata fadelei nakhibo jateula God teke hata fadeleidi nakhibomira eghu naugna ghotilo fatutuani ni Kraes.