Efesus 3 - Buka Blahi Ka Cheke Holo

Nogna gloku mae Pol

¹ Naugna igne, iara mae Pol te au ka suga sosolo eigna iara ne leghuni mae Jisas Kraes. Iara tarai ghami ka God. U gaoghathogna te sosoloni iara gne naugna iara ne toutonuni chekegna God na ka ghotilo iheire te theome Jiu.

² Iara thofno laseni eigna ghotilo nomhinihi ka nogna khokofakasai God. Mana neke tusu ranghi ghau iara gloku igne mala togho ghami ghotilo.

³ God neke falalase ka iara mala laseni u gaoghatho teke theome laseni naiknore tifa na igne. Iara kulu riorisohi katha vido eigna igne,

⁴ jame iu'iju fakeli ghotilo unha te risoni iara na meuna, ghotilo ginauna laseni unha te laseni iara eigna Kraes teke theome laseni tifa igne.

⁵ Tifa na God neke theome chekeni ka naiknore eigna u gaoghatho teke poru igne. Nu gognaro na Tharungagna God na la falalasehi ka hatimare nogna mae khuru te blahi nei hatimare nogna mae profet.

⁶ U gaoghathogna Nonomho te Keli teke poru igne God magnahaghe ghami ghotilo te mala kaisei vike nei kaisei thini balumi ghehati mae Jiu. Eghuteuna unha teke nhaꞌa chekeni God ka ghehati eigna mae Jisas Kraes igne mala nomi la ghotilo.

^7-8 Ka nogna nolaghi, God neke tusu mei ka iara khokofakasai mala toutonuni u Nonomho te Keli igne. Tutuani, neubane iko lahu ngau iara ka nogna naikno God gre, God vahi ghau iara ka nogna khokofakasai na mala tei ka naikno te theome Jiu gre mala toutonuni Nonomho te Keli eidi nogna gloku te keli fara Kraes te theome naba tahati te lasedire.

⁹ Eghuteuna mana vahi ghau iara mala toghodi naikno te gnafa gre mala filo glanini nagnafagna God eigna nogna gaoghatho poru igne. Tifa na, God mae ihei teke vuavuhadi nauthoglu ghe maloa gre neke theome snakredi naiknore mala laseni unha te ghathoni mana na.

¹⁰ Nu gognaro na God ne babana u khiloau gne mala falalase nogna glalase te keli te gnafa God ka hatimare mae engel nei keha nafnata nolaghi langau ka maloa gne.

¹¹ Unha te eni God igne ne thofno horoghoto ka puhi teke ghathoni mana ka vuvuhagna na. Tutuani fara, mana ne eni igne ka nogna gloku mae Jisas Kraes noda Lord.

¹² Naugna tahati kaisei balugna Kraes nei tahati fatutuani ni mana, nagnafadare heta fara nei tahati theome mhaghu te mei ka God na.

¹³ Eghume iara magnahaghei te cheke faheta fara ka ghotilo, thosei glaꞌe kate filo ghau iara te au papara eimi ghotilo gne, naugna iara eni igne mala togho ghami ghotilo.

Nogna namha Kraes

¹⁴ Eghume gognaro na iara tarai ke ulugna Kmada kligna.

¹⁵ Eigna mae fatutuani te gnafa te au nga teu ka nauthoglu gne, ba iheire te au teu kligna gognaro gne mana kilodi goro thugna.

¹⁶ Iara toreni God ka nogna nafnakno biꞌo kligna mala snakre meini nogna Tharunga te Blahi na ka ghotilo, mala tangomana ghotilo te heta ka nagnafamire.

^17-18 Uve, iara toreni Kraes mala au mana ka nagnafamire, eigna ghotilo fatutuani ni mana. Iara jaola toreni mana eigna gobigna lepo te edi ghotilo re thofno jifla mei ka nomi namha te biꞌo ranghini God nei naikno te gnafa, mala ghotilo nei nogna naikno te gnafa God re au glalase te mala lase fakelini nogna namha Kraes te biꞌo fara nei brahu fara nei haghe fara nei mamhara fara.

¹⁹ Iara toreni God mala fodu e salaꞌui ghotilo ka puhigna God thegna kate lase fakelini ghotilo nogna namha Kraes igne. Iara toreni igne neubane theo kaisei naikno tangomana te thofno ruruthani ba thofno lase fakelini u namha igne!

²⁰ Nogna nolaghi God te loku ka nagnafada gre tangomana te eni glepo te ulu fara ka unha tahati te toreni ba ghathoni.

²¹ Tahati nogna khiloau mana eigna tahati kaisei balugna mae Jisas Kraes, tahati ginauna kilo fnaknoni God fabrahu tifa tifa. Amen.