Efesus 1 - Buka Blahi Ka Cheke Holo

¹ God neke vahi ghau iara mae Pol mala nogna khuru mae Jisas Kraes. Iara riso ari ka ghotilo naikno khiloau te au ka namono Efesus iheire te leghuni fabrahu mae Jisas Kraes. Naugna ghotilo nognahi mana.

² Iara toreni nogna khokofakasai nei pharikeli God Kmada nei nogna mae Jisas Kraes noda Lord te mala au balumi.

Nogna fablahi mae Jisas Kraes

³ Tahati cheke fakelini God, Kmagna noda Lord Jisas Kraes! Naugna tahati nogna mae Jisas Kraes, God neke tusu mei ranghi ghita u fablahi te gnafa te mei funu kligna.

⁴ Ka narane theome vuavuha nga teku nauthoglu gne God neke vahi ghita mala nogna thegna kate kaisei tahati balugna Kraes. Tutuani, God neke vahi ghita mala naikno blahi nei theo kaisei najafra ke ulugna mana.

⁵ God neke namha ghita nei vahi ghita vuha tifa mala thugna mana ka nogna gloku mae Jisas Kraes. Igne unha te magnahagheni nei gleꞌani teu God na.

⁶ Tahati kilo fnaknoni God eigna nogna khokofakasai te thofno keli fara! U khokofakasai igne mana neke khogla tusu ranghi ghita kolho naugna nogna gloku mae Jisas mae ihei God te namhani fara.

⁷ Kraes neke foli fajifla ghita ka dadara glehegna ke kligna gaju fafatha jateula kaisei fafara teu te mala hata fadelei nakhiboda ka nogna khokofakasai God te bruara igne.

⁸ U khokofakasai igne mana neke tusu mei neke salaꞌui ka tahati balu gaoghatho te keli nei glalase te keli.

⁹ Mana neke enihi unha teke ghathoni thegna na. Uve, mana neke falalase ka tahati gaoghatho teke poru teku igne, eigna mana neke kulu ghathoni igne tifa mala kaputu ka mae Jisas Kraes.

¹⁰ Nogna gaoghatho God igne ginauna thokei mei ka thofno narane te mala salofodu ka Kraes gobigna lepo te au kligna ba pari. Eghuteuna Kraes ginauna mala pha'udi gobigna lepore.

¹¹ Gobigna lepo igre God neke edi leghuni nogna gaoghatho nei glalase teu thegna na. Mana ne leghuni nogna gaoghatho thegna na neke vahi ghita tifa mala nogna naikno Kraes.

¹² Naugna igne, God neke vahi ghami ghehati mala fafnaknoni thegna ka iheire teke kulu fatutuani ni mae Kraes.

¹³ Ghotilo jaola mala nogna naikno God kate nomhini thofno farirhiu te tutuani igne, u Nonomho te Keli eigna u thofno nakarha te malami ghotilo. Kate fatutuani ni ghotilo Kraes na, God neke tusu ranghi ghami mae Tharunga te Blahi teke nhaꞌa chekeni mana na, mala laseni ghotilo te nogna naikno mana re.

¹⁴ Tutuani, naugna tahati la hatahi mae Tharunga te Blahi na, tahati ginauna tangomana te hata unha God teke nhaꞌa cheke ranghi ghita tifa na. Naugna igne tahati thofno laseni God ginauna thofno fasnagladi nogna naiknore balugna. Eghume tahati kilo fnaknoni God eigna nogna nafnakno biꞌo!

Nogna tharai mae Pol

^15-16 Eigna igne, iara theome gnafa te cheke fakelini God eimi ghotilo na. Tutuani, leuleghu fata na iara tangomana te ghatho ghami ka nogu tharaire funu ka narane te nomhi ghami iara te fatutuani ni ghotilo Lord Jisas nei nomhi ghami ghotilo te thofno namhadi nogna naikno te gnafa God re.

¹⁷ Eghuteuna iara toreni God koba, Kmagna noda Lord Jisas Kraes, mala tusu ranghi ghami nogna Tharunga te Blahi na mala tangomana ghotilo te filo glani puhigna God na, nei thofno laseni mana.

¹⁸ Iara toreni noda God mala tusu ari glalase te biꞌo. Glalase igne ginauna togho ghami ghotilo mala filo glanini unha teke kilo ghita God na. Jaola glalase igne mala togho ghami ghotilo te mala filo glanini thofno glepo keli te gnafa teke nhaꞌa cheke ranghidi nogna naiknore.

^19-20 Jaola mala filo glanini ghotilo thofno nogna nolaghi te heta fara te loku ke lamnadi iheire te fatutuani ni mana. Nolaghi biꞌo te loku ke lamnada igne u nolaghi teke fakarha fapuloni mae Kraes kau glehe ia, eghuteuna fagnokroni ka sape nafnakno fei nhetagna kligna.

²¹ Tutuani, Kraes na au kligna mala funei frunidi hatimare mae King te gnafa, nei hatimare mae engel, nei keha nafnata nolaghi fateo langau ka maloa gne. Kraes au nangha te biꞌo tulao ke uludi keha nangha te au nolaghi biꞌo ka nauthoglu igne, ba ka keha narane te mei ginau.

²² God lilisei gobigna lepo fateo ke parigna nogna nolaghi Kraes. God tusu ranghini Kraes u nolaghi mala pha'ugna khiloau mala jateula pha'udi eghu gobigna lepo te gnafare.

²³ Eigna khiloau na thinigna Kraes, eghuteuna ka thini tuana te au mae ihei te au nolaghi ke klignadi gobigna lepo te au heva heva.