Diutronomi 9 - Buka Blahi Ka Cheke Holo

GaoghathoLordte toghodi naiknodi Israel

¹ Aonu mae Moses ne cheke eghu, “Naiknomi Israel, ghotilo fanomho fakeli! Gognarona ghotilo namo kasa ka Khoꞌu biꞌo Jordan mala tei hata glose na ka naikno te nheta ulu ghami ghotilo. Nodi namono re biꞌo fara, eghuteuna gringni thina te bara te lithui na thono haghe fara.

² Eghuteuna naiknore brahu fara, nei thono nheta fara, mae igre vikegna mae Anak. Ghotilo lasedi eghuteuna te nomhidi ghotilo eidi mae igre na, mare chekeni te theome tangomana kaisei mae te uludi vikegna mae Anak.

³ Nu gognarona ghotilo laseni, Lord nomi God ghotilo na neke nhaꞌa chekehi te mala kulu ulu ka ghotilo na. Kate kulu tei na mana ginauna jateula kaisei khaꞌaghi te gnhubra gobigna lepora eghu na thofno goigonidi fara naikno tuare. Eghume ghotilo tangomana te ngolhi fajifladi re, eghuteuna ghotilo ginauna ghosei aknu falehedi kolho.

⁴ “Aonu ke leghugna teke kulu ulu Lord nomi God ghotilo na teke ngolhi fajifladihi naikno igre na, ghotilo thosei cheke eghu fari themi, ‘Lord neke hata mei ghami ghehati ka glose igne naugna ghehati gne doglo ka tathagna mana na!’ Theo, mana ginauna ngolhi fajifladi naiknore naugna mare ne leghuni puhi te diꞌa na.

⁵ Theome naugna te keli nei doglo teu ghotilo na. Theo! Lord ginauna ngolhi fajifladi naikno igre naugna mare ne eni unha te diꞌa nei naugna teke nhaꞌa chekeni mana ka kuꞌemi ghotilo mae Ebraham, Isak nei Jekop mala tusu ranghi ghami ghotilo glose igne.

⁶ Ghotilo laseni, Lord nomi God ghotilo na neke theome tusu ari ka ghotilo glose igne naugna te naikno doglo ghotilo na. Theo. Ghotilo patu gama fara!

Naiknodi Israel neke horo mumuju buluka ka gol

⁷ “Ghotilo thosei ghatho ihoni unha teke eni Lord nomi God ka namono nagou ia, mana neke diꞌatagna fara ka ghotilo. Funu ka narane teke jifla ghotilo Ijep te thoke ka narane te mei posa ghotilo ka namono igne, ghotilo neke theome leghuni Lord.

⁸ Jare Thogele Sanai, ghotilo neke faꞌeiꞌei neke diꞌatagna fara Lord, eghuteuna diꞌatagna mana igne namo falehe ghami ghotilo.

⁹ Ka narane tuana, iara neke haghe ka thogele na neke hata phei thina tataba te au nogna nhaꞌa cheke Lord teke eni mana balumi ghotilo ia. Eghuteuna iara neke au ka thogele igne phiatutu narane nei phiatutu bongi, eghuteuna ka narane tuare iara neke theome ghamu nei theome koꞌu.

^10-11 Eghuteuna ke leghudi te gnafa phiatutu narane nei phiatutu bongi teu igre, Lord neke tusu mei phei thina tataba igre ka iara. “Ke klignadi phei thina tataba igre, Lord neke rioriso ka khamegna thegna cheke te gnafa teke jifla mei ke lamna khaꞌaghi ka narane teke khapru teku ghotilo ka pesi thogele ia.

¹² Aonu Lord ne cheke eghu ka iara, ‘Moses, faghose sukha, naugna naikno teke hata fajifla iagho Ijep igre gognarona la fadiꞌadi thedi. Mare la koko puhi teke cheke ranghidi iara mala leghuni mare teku igne. Mare horo kaisei nodi mumuju ka gol mala tarai.’

¹³ “Eghuteuna Lord ne cheke eghu ka iara, ‘Iara la lasedihi naikno igre, mare patu gama fara.

¹⁴ Iagho thosei lhoti ghau iara, iara ginauna goigonidi mare. Iara ginauna na theome snakreni kaisei naikno mala ke ghathodi mare. Eghume iara ginauna eni vikemu iagho na mala kaisei vike te biꞌo nei nolaghi fara eghu uludi mare.’

¹⁵ “Aonu iara figri neke sukha funu ka thogele na kate dudulu teu khaꞌaghi na. Eghuteuna iara ne hata balugu phei thina nhaꞌa cheke igre.

¹⁶ Eghuteuna kate posa iara ka ghotilo na, iara filo ghami ghotilo te eni nakhibo biꞌo ranghini Lord nomi God. Ghotilo neke eni kaisei mumuju sua buluka ka gol. Ghotilo ghosei ngala te tei kokoni puhi teke chekeni Lord mala leghuni ghotilo teku ia.

¹⁷ Aonu iara neke koko sukha phei thina igre pari neke phike ke ulumi ghotilo.

¹⁸ “Eghuteuna iara ne khoko sukha pari ka glose na ne tarai ke ulugna Lord nabagna phiatutu narane nei phiatutu bongi, iara theome ghamu nei theome koꞌu. Iara eni igne naugna ghotilo neke eni nakhibo biꞌo ranghini Lord neke ghilei diꞌatagna fara mana.

¹⁹ Iara mhaghu noguni fara diꞌatagna Lord na naugna mana diꞌatagna fara jateula mana tarabana teu te mala aknu falehe ghami ghotilo na. Nu Lord neke nomhini nogu tharai iara na.

²⁰ Eghuteuna Lord jaola neke diꞌatagna fara ka mae Eron, jateula mana te tarabana teu te mala aknu faleheni ra neu. Nu iara ne taraini mae Eron, aonu mana neke theome faleheni mana.

²¹ Eghuteuna ghotilo neke eni nakhibo ka God kate horo ghotilo mumuju buluka tuana. Eghume iara neke hata buluka tuana neke koko lao ka khaꞌaghi. Aonu iara neke piphike faꞌikoi mumuju buluka tuana neke ghilei vuhai nakrofu, eghuteuna iara koko ne tei nakrofu igre ka khoꞌu te loloro sukha funu ka thogelero.

²² “Ka keha thilo narane re ghotilo neke eni puhi te diꞌatagna fara Lord jare ka namono Tabera, nei Masa, nei namono Kibrot-Hatava.

²³ “Eghuteuna jare Kades Banea, Lord neke cheke ka ghotilo mala tei ghotilo hata glose teke nhaꞌa chekeni mana na. Nu ghotilo neke theome leghuni nogna cheke mana na. Ghotilo theome fatutuani ni mana, ba leghuni mana.

²⁴ Funu ka narane te lase ghami iara te ghilei mei posa gognarogne, ghotilo theome keli ranghini Lord.

²⁵ “Aonu iara ne thuru sukha pari ke ulugna Lord nabagna phiatutu narane nei phiatutu bongi, naugna iara laseni mana neke chekeni te mala falehe ghami ghotilo na.

²⁶ Ka narane tuana iara tarai ka Lord ne cheke eghu, ‘Lord nogu Funei, thosei falehedi. Naikno igre nou iagho, eghuteuna iagho neke hata fajifladi Ijep ka nou nolaghi te biꞌo nei ka khamemu te rheta tulao.

²⁷ Ghathodi sagho thilo nou mae glokura, Ebraham, Isak nei Jekop. Eghuteuna kate ghathodi iagho thilo mae igre, thosei filo ka nakhibo teke edi naikno te patu gama fara igre.

²⁸ Jame te goigonidi iagho naikno igre na, naiknodi Ijep igre ginauna cheke eghu, “Naiknodi Israel igre la lehehi naugna Lord na theome tangomana te hatadi te tei ka glose teke nhaꞌa chekeni mana mala tusu lao ka mare teku na.” Ba, mare ginauna cheke eghu, “Mana falehedi mare naugna mana tirognadi; mana magnahaghei te hata teidi kolho ka namono nagou na mala falehedi jare.”

²⁹ Nu iagho lasedi, naikno igre nou iagho, iagho neke hata fajifladi Ijep ka nou nolaghi te biꞌo nei ka khamemu te rheta tulao.’ ”