Diutronomi 7 - Buka Blahi Ka Cheke Holo

Naiknodi Israel mala ngolhi fajifladi naiknodi Kenan

¹ Aonu mae Moses ne cheke eghu, “Lord, nomi God ghotilo na ginauna hata ghami ghotilo tei mala hata glose ka vikegna mae Het, nei ka vikegna mae Gigas, nei ka vikegna mae Amoa, nei ka vikegna mae Kenan, nei ka vikegna mae Peris, nei ka vikegna mae Hivi, nei ka vikegna mae Jebus. Mana ginauna ngolhi fajifladi keha naikno te au ka glose igne. Eghuteuna neuba fitu vike igre ne nheta ulu ghami ghotilo,

² nu mana ginauna lisa ari naikno igre ka khamemi ghotilo, eghuteuna ghotilo ginauna uludi mare. Ka narane tuana, ghotilo mala aknu falehedi gnafa. Ghotilo mala thosei eni kaisei nhaꞌa cheke te mala au fakeli baludi mare na. Eghuteuna ghotilo mala thosei kokhonidi mare.

³ Ghotilo mala thosei snakredi thumi nalhaꞌure mala tolaghi ka thudi gaꞌase mare re, eghuteuna thudi nalhaꞌu mare igre thosei mei tolaghi ka thumi gaꞌase ghotilo re.

⁴ Jame te eni ghotilo igne na, mare ginauna tangomana te figri gaoghathodi thumi ghotilo re mala theome leghuni Lord nu tei leghudi keha god delei. Jame te eni mare igne na, Lord ginauna diꞌatagna fara ka ghotilo, eghuteuna mana ginauna ghosei goigoni ghami ghotilo.

⁵ Eghume ghotilo mala roꞌe soru nodi olta nei mumuju thina, nei roꞌe soru mumuju gna gaꞌase god Astarot, eghuteuna ghotilo mala gnhubra nodi mumuju mare re.

⁶ Ghotilo mala edi glepo igre, naugna ghotilo nogna naikno blahi Lord, nomi God. Mana neke vahi fadelei ghami ka keha naikno te gnafa ka nauthoglu igne mala nogna naikno thegna.

⁷ “Lord namha ghami ghotilo neke vahi fadelei ghami ghotilo, theome naugna te kmana te salaꞌudi ghotilo keha naiknore ka nauthoglu igne. Ghotilo laseni, ghotilo bua fara salaꞌudi keha naiknore ka nauthoglu igne.

⁸ Nu naugna mana namha ghami ghotilo, eghuteuna mana leghuni nhaꞌa cheke teke eni mana baludi kuꞌemi ghotilo tifa ra, mana neke fakarhi ghami ghotilo ka nogna nolaghi biꞌo na kani teke hata fajifla ghami ka khamegna king gna Ijep mala theome sneka ghotilo.

⁹ Te mala laseni ghotilo na Lord nomi God ghotilo na, mana ngala God mae ihei te ghatho tahu ghami ghotilo na. Eghuteuna mana tajini nogna nhaꞌa cheke na, eghuteuna mana namha ghami ghotilo iheire te namhani nei leghudi teu nogna vetula mana re. Kate namhani nei leghuni teu ghotilo mana na, mana tangomana te tajini u nhaꞌa cheke na balumi ghotilo nei thumi ghotilo re eghu fabrahu ghilei posani kmana thogha finogha.

¹⁰ Nu ka iheire te tirodini mana re, mana ginauna ghosei paradi nei goigonidi naikno igre.

¹¹ Eghume, ghotilo mala thofno leghudi nogna cheke, nogna vetula nei nogna farirhiu teu mana te chekedi iara ka ghotilo gognaro igre.”

Lordfablahidi iheire te leghuni mana re

¹² Mae Moses ne cheke eghu, “Jame te leghudi nei nomhidi teu ghotilo vetula igre na, Lord nomi God ghotilo igne ginauna tajini nogna nhaꞌa cheke na eghuteuna namha ghami ghotilo fabrahu jateula teke nhaꞌa chekeni mana ka kuꞌemi ghotilo ra eghu.

¹³ Eghuteuna kate leghudi ghotilo vetula igre, mana ginauna namha ghami nei fablahi ghami eghu mala vuragha au kmana thumi ghotilo, eghuteuna ghemi nagare ghotilo re ginauna au kmana gano, eghuteuna ghotilo ginauna au ghemi kmana waen, nei kmana oel mala kuki. Eghuteuna mana ginauna fablahidi nomi buluka nei sipu teu ghotilo re mala karha kmana thudi. Ka puhi jateula igre eghu mana ginauna tangomana te fablahi ghami ghotilo kate au ghotilo ka glose teke nhaꞌa chekehi mana ka kuꞌemi ghotilo ra.

¹⁴ Lord ginauna fablahi ghami ghotilo tulao ke klignadi keha naikno te gnafa ka nauthoglu igne. Eghume ghotilo te gnafa na, neubane nalhaꞌu ba gaꞌase ginauna au thugna. Eghuteuna glepo tautagu te gnafa igre ginauna jaola au thudi.

¹⁵ Eghuteuna Lord ginauna bara fothi ghami ka thua fogra fateote'o. Mana ginauna na theome snakre ghami ghotilo mala thoke ghami thua nafnata fogra te thono diꞌa fara te lasedi ghotilo Ijep ra. Nu mana ginauna snakre lao fogra igre ka nomi naoka ghotilore.

¹⁶ Ghotilo mala aknu falehe naikno te gnafa te lisa ari Lord ka khamemi ghotilo are, thosei kokhonidi. Ghotilo mala thosei pogho soru ka nodi god mare re, naugna igne kaisei puhi te mala jateula kaisei phighoro teu mare te mala fakhale ghami ghotilo na.

¹⁷ “Glahu cheke eghu ghotilo, ‘Naikno igre thono nheta fara salaꞌu ghita tahati! Thono ninhigrana fara ranghi ghita tahati te mala ngolhi fajifladi re!’

¹⁸ Nu ghotilo thosei mhaghudi mare! Khogla ke ghathodi unha Lord nomi God teke edi ka king nei ka naikno te gnafa Ijep tifa ra.

¹⁹ Mana neke hata fajifla ghami ka khame nhetagna king gna Ijep. Ghotilo neke filo tathamihi kofubobhoi nei nolaghi nei glepo te mamhaghuana fara Lord noda God teke edi kani teke hata fajifla ghami ghotilo Ijep ia. Eghume, Lord nomi God ghotilo igne ginauna jateula tuana eghu goigonidi naikno te mhaghudi ghotilo tuare.

²⁰ Neuba keha ne fariuriu poru, Lord nomi God igne ginauna famamhaghudi fara mala rikha tafri ghilei kafe lehe gnafa mare!

²¹ Eghume ghotilo thosei mhaghudi mare, naugna Lord nomi God ghotilo na au balumi ghotilo. Mana au nolaghi fateote'o, eghuteuna mare mhaghu nodini fara mana.

²² Lord nomi God ghotilo igne ginauna ngolhi fajifladi mare ka puhi te theome faghose fara. Eghume ghotilo theome tangomana aknu falehedi mare kaisei fata kolho na, naugna jame te eni ghotilo igne na, glepo tautagu te au ka vido tuana ginauna kmana fara eghuteuna glepo igre tangomana te goigoni ghami ghotilo na.

²³ Nu Lord ginauna tusu ari ka ghotilo nodi glose naiknore. Eghuteuna naikno teke khotogna glose igne ginauna mhaghu nodi fara na theome tangomana te eni unha na, ghilei aknu falehe gnafa ghotilo naiknore.

²⁴ Iara ginauna lisa ari nodi king re ka khamemi ghotilo mala aknu falehedi hui mala theo kaisei na teke ghathodi re. Ghotilo ginauna aknu falehedi naiknore, eghuteuna theo kaisei naikno na teke kegra fanogridi ka ghotilo re.

²⁵ Ghotilo gnubra nodi mumuju re ka khaꞌaghi. Eghuteuna ghotilo thosei mamagnadi silva nei gol eghu te au ka mumuju igre ba hata malami themi, nu ghotilo mala gnubra fahui. Glepo igre diꞌa fara ka Lord nomi God. Ghotilo thosei tathaji naugna jateula kaisei phighoro eghu ka ghotilo.

²⁶ Ghotilo thosei hata mei kaisei glepo te diꞌa igre ka sugami re. Jame te eni ghotilo igne na, Lord ginauna goigoni ghami ghotilo jateula mana te goigonidi glepo igre eghu.”