Diutronomi 6 - Buka Blahi Ka Cheke Holo

Vetula te biꞌo lahu

¹ Aonu mae Moses ne cheke eghu, “Igre nogna cheke nei vetula eghu Lord nomi God ghotilo teke cheke ranghi ghau iara te mala farirhiu ghami ghotilo. Te mala leghudi ghotilo ka glose nate tei ghotilo te hata ginauna.

² Ghotilo, baludi thumi nei grami teure mala ghatho tahuni fabrahu Lord nomi God ka puhi te leghudi ghotilo cheke nei vetula eghu te chekedi iara ka ghotilo gognaro igre. Jame te eni ghotilo igne na, ghotilo ginauna au ka nakarha te brahu.

³ Eghume, ghotilo Israel, ghotilo fanomho fakeli ka vetula igre, eghuteuna famane leghu fakelidi. Jame te eghu ghotilo na, ghotilo ginauna au fakeli, eghuteuna ghotilo ginauna na vuragha ka famane glose igne, jateula Lord nodi God kuꞌemi ghotilo teke nhaꞌa cheke ka ghotilo ra.

⁴ “Fanomho, Israel! Lord noda God tahati na, mana kaisei God kolho te mala tarai nei pogho soruni teu tahati na.

⁵ Eghuteuna ghotilo mala namhani Lord nomi God ka nagnafami fateote'o, nei ka gaoghathomi fateote'o, nei ka nanhetami fateote'o.

⁶ Ghotilo mala au gaoghathomi fabrahu ka cheke te tusu ari iara ka ghotilo gognarogne.

⁷ Farirhiudi koba thumi re. Cheke eidi glepo igre kate au teu ka suga, ba kate nolo ka nabrou, ba kate thuru sukha, ba kate kegra haghe.

⁸ Ghotilo rioriso soru cheke igre, eghuteuna haru famaku jateula kaisei tuthuana eghu ka khamemi nei ka greremi teu are.

⁹ Eghuteuna ghotilo mala rioriso ka phei khegradi nomi grengathadi suga re, nei ka grengathadi nomi namono re eghu.”

Israel mala tarai kolhoLord

¹⁰ Aonu mae Moses tudu ne cheke eghu, “Lord, nomi God ghotilo igne neke nhaꞌa chekehi ka Ebraham, ka Isak nei ka Jekop, thilo kuꞌeda tahati ra, mala tufa glose ka ghotilo. Glose igne au famane namono teke theome horo nga teku ghotilo ra.

¹¹ Eghuteuna glose igne au suga te fodu ka glepo te keli teke theome lilisei ghotilo, seu teke theome dokha ghotilo, nei nagare grep, nei nagare oliv eghu teke theome joꞌu ghotilo. Eghume kate ghamu te boho ghotilo ka gano igre,

¹² ghotilo fiofilo ghami eghu, glahu ghatho ihoni ghotilo Lord mae ihei teke hata fajifla ghami Ijep ka namono aheva teke loku jateula naikno sneka teku ghotilo ra.

¹³ “Ghotilo mala ghatho tahuni Lord, nomi God, mala loku ranghini kolho mana. Eghuteuna ghotilo nhaꞌa cheke kolho ka nanghagna mana.

¹⁴ Ghotilo thosei pogho soru ka nodi god keha naiknoi te au faligoho ghami ghotilo are,

¹⁵ naugna Lord nomi God, mae ihei te au balumi ghotilo igne ginauna diꞌatagna fara ka ghotilo. Diꞌatagna mana igne ginauna jateula kaisei khaꞌaghi biꞌo eghu goigoni ghami ghotilo hui mala theo kaisei ka ghotilo te karha au teu ka nauthoglu igne.

¹⁶ Ghotilo thosei fariuriuni Lord, nomi God jateula teke eni ghotilo tifa kani au teku ghotilo ka namono Masa ia eghu.

¹⁷ Leuleghu fata na ghotilo mala thofno leghudi nogna cheke Lord, nei farirhiu nei vetula eghu teke tusu ari mana ka ghotilo ra.

¹⁸ Ghotilo mala edi unha te keli nei doglo ka tathagna Lord. Jame te eni ghotilo igne na, ghotilo ginauna tangomana te au ka nakarha te keli, eghuteuna ghotilo ginauna tangomana te tei hata glose teke kulu nhaꞌa chekenihi Lord ka kuꞌemi ghotilo ra.

¹⁹ Ghotilo ginauna ngolhi fajifladi naoka te au ka glose igne jateula teke chekenihi Lord ia eghu.

²⁰ “Nathuꞌu nauriha na thumi ghotilore ginauna ghusna eghu ka ghotilo, ‘Naugna unha si Lord, noda God tahati gne te cheke ranghi ghita tahati te mala leghudi farirhiu nei cheke nei vetula teu igrea?’

²¹ Ghotilo ginauna cheke eghu ranghidi, ‘Tifa na ghehati neke nogna sneka king gna Ijep. Nu Lord neke mei fakarhi ghami ghehati Ijep ka nogna nolaghi biꞌo na.

²² Ka narane tuare, mana neke edi kmana fagaglana nei kofubobhoi nei glepo mamhaghuana, eghuteuna mana loku ka nogna nolaghi biꞌo ranghidi naiknodi Ijep, king nei nomi mae biꞌo te gnafa.

²³ Mana neke hata fajifla ghita Ijep, eghuteuna mana hata mei ghita agne ka glose teke nhaꞌa chekeni mana ka kuꞌeda tahati ra.

²⁴ Eghuteuna Lord noda God neke cheke faheta ka tahati mala leghudi vetula igre, nei ghatho tahuni Lord. Ka puhi igne, mana ginauna fablahi ghita fabrahu nei reireghi fakelidi nakarhada, jateula te eni mana ka tahati gognarogne eghu.

²⁵ Eghuteuna jame te thofno leghudi tahati vetula te chekedi God igre na, tahati tangomana te au doglo balugna Lord noda God.’ ”