Diutronomi 5 - Buka Blahi Ka Cheke Holo

Nabotho vetula

¹ Aonu mae Moses ne kafe kilo fodu meidi naiknodi Israel ne cheke eghu: “Fanomho fakeli ka cheke nei vetula eghu nate chekedi iara ka ghotilo gognaro igre. Ghotilo mala ghathodi nei leghudi eghu fabrahu!

² Lord, noda God neke eni kaisei nhaꞌa cheke baluda tahati ka Thogele Sanai.

³ Neke theome ka kuꞌeda tahati ra kolho. Mana neke baluda tahati gnafa te au teu gognaro gre.

⁴ Lord neke cheke fadoglo mei ka tathami ghotilo re ke kligna thogele, eghuteuna chekegna mana igne jifla mei ke lamna khaꞌaghi.

⁵ Ka narane tuana iara neke kegra fari hoteimi ghotilo nei Lord, eghuteuna iara neke cheke ka ghotilo cheke teke chekedi Lord re, naugna ghotilo neke mhaghu fara ka khaꞌaghi igne neke theome tangomana tei kegra ka thogele na. “Eghuteuna Lord neke cheke eghu,

⁶ “Iara Lord, nomi God ghotilo. Iara neke atha fajifla ghami ghotilo ka naꞌau sosolo Ijep neke atha mei ghami ghotilo agne.

⁷ Thosei ghatho tahuni kaisei god delei, kaisei Iara ngala te mala ghatho tahu ghau ghotilo na.

⁸ Thosei sari kaisei mumuju, ba eni kaisei thotogale gna kaisei glepo te au ka maloa ba ka nauthoglu ba ka nhorora ke pari glose.

⁹ Ghotilo thosei pogho soru ka kaisei mumuju ba tarai tagna, naugna iara Lord, nomi God ghotilo, iara theome magnahaghei ghami ghotilo te ghatho tahuni kaisei god delei. Puhigu iara na jateula: iheire te tirodi ghau iara, nei tei koko ghau iara teu igre, iara ginauna paradi mare baludi thudi, nei gradi teure ghilei thokedi fapea gradi mare ginaure.

¹⁰ Nu jame te namha ghau iara nei leghudi nogu vetula iara gre teu ghotilo na, iara ginau na thofno namha ghami ghotilo nei kaisei thogha vikemi ghotilo nate karha mei teu thogheiro re.

¹¹ Ghotilo thosei lausasaba nanghagu iara na, naugna iara Lord, nomi God ghotilo, eghuteuna iara ginauna parani ihei te lausasaba nanghagu iara na.

¹² Ghotilo tajini narane Sabat blahi, leghuni unha teke chekeni iara ka ghotilo tifa ia.

¹³ Ghotilo au namno narane ke lamnagna kaisei wik te mala loku na.

¹⁴ Nu ka fafitu narane na, narane Sabat, narane mala cheke fakelini Lord, nomi God. Ka narane igne, ghotilo ginauna thosei loku tagna. Ghotilo, nei thumire, nei nomi mae gloku, nei gaꞌase gloku, nei nomi buluka nei dongki, nei nomi sipu, nei naikno phosa te au balumi. Ghotilo te gnafa na thosei loku ka narane igne. Ka puhi igne nomi naikno gloku ghotilo re jaola tangomana te gnafa jateula ghotilo eghu.

¹⁵ Ghotilo ke ghatho fapulodi narane teke sneka ghotilo Ijep tifa ra, nu iara Lord, nomi God ghotilo, iara neke hata fajifla ghami ghotilo jare ka khame nhetagu iara. Naugna igne iara Lord nomi God ghotilo te cheke faheta ka ghotilo mala gnafa ka narane Sabat.

¹⁶ Ghatho tahudi idomi kmami re, jateula teke chekeni iara Lord nomi God ia eghu. Eghume ghotilo ginauna au raugha ka nakarha te keli ka glose nate tusu ari iara Lord, nomi God.

¹⁷ Thosei aknu poruni ihei ka gaoghatho te diꞌa.

¹⁸ Thosei huhughuni vetula gna tholaghi na.

¹⁹ Thosei blau.

²⁰ Thosei vuavuha cheke ranghini kheramu fofodu na.

²¹ Thosei mamagnadi nogna glepo kherami fofodu na mala hata mala nomi themi. Thosei mamagnani khetogna mana na, ba nogna suga na, ba nogna nagare na, ba nogna naikno gloku na, ba nogna buluka na, ba nogna dongki na, ba unha nogna glepo mae kheramu fofodu na.”

²² Aonu mae Moses ne cheke eghu, “Igre unha teke chekedi Lord ka tahati re, kani teke salo fodu tahati ka pesigna thogele ia. Mana neke cheke faheta mei ka tahati ke lamna khaꞌaghi nei khoveo te thono romno fara. Vetula igre kolho teke chekedi mana ka narane tuana, aonu mana neke rioriso nogna chekere ke klignadi phei thina tataba neke tusu phei thina igre ka iara.”

²³ Mae Moses tudu ne cheke eghu, “Kate gnhubra khaꞌaghi biꞌo na ka thogele ia, ghotilo neke nomhini cheke na neke mei funugna ka gromno na. Aonu nomi mae mala baubatu nei mae biꞌodi vike ra eghu neke mei filo ghau iara.

²⁴ Mare neke cheke eghu, ‘Lord, noda God tahati igne, gognarona mana fakakhana siasiglagna nogna nolaghi biꞌo na nei puhi te thono haghe fara mana na eghu ka tahati. Eghuteuna tahati nomhini naoglagna mana na mei funu ke lamna khaꞌaghi. Gognarogne ghehati nomhini God tangomana te cheke ka tahati naikno na, neuba ghehati karhau ngala, theome lehe!

²⁵ Nu, gognarona ghehati theome magnahaghei te lehe ka khaꞌaghi biꞌo igne! Jame te nomhini ghehati naoglagna Lord, nomi God igne keha fata re ghehati ginauna na thofno lehe.

²⁶ Ba, kaisei naikno neke nomhini naoglagna God mae ihei te karha te tifa igne neke cheke mei ke lamna khaꞌaghi jateula te nomhini ghehati igne neku, mana karhau gognarona?

²⁷ Tei sagho themu mala fanomho fakeli ka unha te chekeni Lord na. Aonu, iagho ginauna tangomana te mei toutonu ka ghehati gobigna lepo teke chekedi Lord, noda God. Eghuteuna ghehati ginauna tangomana te nomhidi nei leghudi.’

²⁸ “Aonu kate nomhidi Lord glepo igre, mana neke cheke eghu ka iara, ‘Moses, iara nomhidi cheke igre tutuani fara.

²⁹ Filo sagho, jame au fabrahu ka mare gaoghatho igne meuna, ginauna thofno keli fara. Iara magnahaghedi fara mare te ghatho tahu ghau iara fabrahu eghuteuna leghudi nogu vetula iara re. Naugna jame te eni mare na, nakarhadi mare nei thudire teure ginauna thofno keli fabrahu.

³⁰ Gognarona iagho tei cheke ka mare mala ke figri ka nodi suga tapuale ra.

³¹ Iagho kolho nate au teu agne balugu iara na. Eghuteuna iara ginauna tusu ari ka iagho nogu cheke te gnafa nei vetula, nei cheke faheta te gnafa teu igre. Eghuteuna ke leghu na, iagho mala farirhiu glepo igre ka naiknore, mala leghudi mare ka glose teke tusu lao iara ka mare mala khotodi.’ ”

³² Aonu mae Moses ne cheke eghu, “Ghotilo mala faghuai eghu te mala edi gobigna lepo teke chekedi Lord, nomi God ka ghotilo ra. Ghotilo mala thofno leghudi vetula igre.

³³ Ghotilo mala leghudi mare gnafa. Eghuteuna jame te eni ghotilo igne na, nakarhami ghotilo re ginauna keli fara, eghuteuna ghotilo ginauna tangomana te au raugha ka glose nate au ghotilo tagna na.”