Diutronomi 4 - Buka Blahi Ka Cheke Holo

Naiknodi Israel mala leghuniLord

¹ Mae Moses neke cheke eghu, “Ghotilo naiknomi Israel ra fanomho fakeli ka cheke nei vetula eghu nate farirhiu ghami iara igre. Eghuteuna jame te leghudi ghotilo cheke nei vetula teu igre na, Lord nodi God kuꞌemi ghotilo tifa ra mana ginauna fakarhi ghami, eghuteuna ghotilo ginauna tangomana nate tei te hata glose tarabana teu te mala tusu ari ka ghotilo.

² Ghotilo thosei ke nhaꞌa lao ba hata koko kaisei phugra cheke ikoi kate tusu ari iara ka ghotilo igre. Cheke igre nogna cheke Lord mala leghudi ghotilo.

³ “Ghotilo la filo tathamihi gobigna lepo teke edi mana ka ghotilo Baal-Peo ra. Iheire teke pogho soru ka god Baal Peo ra, Lord neke aknu falehe.

⁴ Nu, ghotilo iheire teke ghatho tahuni Lord nomi God ra, ghotilo kafe karha teu gognaro gre.

⁵ “Iara la farirhiu ghamihi ghotilo cheke nei vetula teu igre leghuni unha teke cheke ranghi ghau noda Lord God. Iara eni igne mala leghudi ghotilo vetula igre kate au teu ghotilo ka glose te hata ghotilo re.

⁶ Eghuteuna ghotilo mala famane leghudi nei faꞌuvedi eghu vetula igre, eghuteuna ka puhi tuare te mala fakakhana ka keha naiknore te ghaoghatho fakeli fara nei lalase fara teu ghotilo na. Eghuteuna kate nomhidi mare vetula igre mare ginauna cheke eghu, ‘Tutuani fara, naiknodi Israel igre au tadi gaoghatho te keli na nei glalase na eghu!’

⁷ Keha kantri te biꞌo igre, neuba mare ne au nolaghi biꞌo jateula unha neu, nu nodi god re theome au baludi jateula Lord te au baluda tahati gne eghu. Kate tarai tahati ka mana na, mana ginauna nomhi ghita fabrahu.

⁸ Eghuteuna keha kantri igre, neuba mare ne au nolaghi jateula unha neu, nu mare theome au kaisei vetula te thofno famane doglo jateula vetula te farirhiu ghami iara gognaro gre.

⁹ “Nu fiofilo ghami eghu! Na eghunu ghatho ihodi ghotilo glepo tela filo tathamihi igre eghu. Leuleghu fata ka nakarhami re, ghotilo mala ghathodi glepo igre. Eghuteuna ghotilo mala farirhiudi thumi are nei grami te ikodi are eghu.

¹⁰ Thosei ghatho ihoni narane teke mei kegra kuꞌemi ghotilo ka Thogele Sanai teke kegra ke ulugna Lord nomi God. Ka narane tuana, mana neke cheke eghu ka iara, ‘Chekedi naikno ra mala kafe mei rhegu iara agne. Iara magnahaghedi mare te mala nomhidi gobigna lepo nate chekedi iara ka mare. Ka puhi igne, mare tangomana te ghatho tahu ghau iara fabrahu ka nakarhadi re, eghuteuna mare tangomana nate farirhiudi thudi re mala ghatho tahu ghaula iara.’

¹¹ Kuꞌemi ghotilo ra neke kegra haghe ka pesigna Thogele Horeb, eghuteuna kaisei khoveo biꞌo te romno fara mei ne toku tafruni thogele igne, nu naphaegna khaꞌaghi na ne agha kligna ka maloa na.

¹² Lord au neu ke lamnagna khaꞌaghi igne neke cheke mei ka kuꞌemi ghotilo ra. Kate cheke mana na, mare neke nomhidi nogna cheke mana re, nu mare neke theome filoni mana.

¹³ Eghuteuna mana neke eni nhaꞌa cheke igne baluda tahati, neke cheke ranghi ghita tahati mala leghudi Nabotho Cheke teke rioriso mana ka phei thina tataba igre.

¹⁴ Eghuteuna ka narane tuana, mana neke cheke faheta ka iara mala farirhiu ghami iara cheke nei vetula eghu te mala leghudi ghotilo kate tei kasa ka khoꞌu te mala tei au ka glose aheva nate au tagna ghotilo na.”

Mare mala thosei tarai ka mumuju

¹⁵ Mae Moses tudu ne cheke eghu, “Ka narane te cheke mei Lord ka kuꞌemi ghotilo ke lamnagna khaꞌaghi na ka Thogele Sanai ia, mare neke theome filoni mana nu mare neke nomhini kolho chekegna mana na. Eghume ghotilo fiofilo ghami eghu,

^16-18 glahu sari mumuju mala tarai ghotilo. Puhi igne thofno jafra fara te eni ghotilo na! Neuba mumuju igne ne mae nalhaꞌu, ba gaꞌase, ba buluka, ba ka thua nafnata nanghaji, ba ka thua nafnata sasa, ba ka thua nafnata thotoli ba unha te tagu ka glose, ghotilo thosei edi glepo igre.

¹⁹ Ghotilo fiofilo ghami glahu chaghi ghami mare korhi ghami mala pogho soru nei tarai eghu ka glepo te filodi ka maloa na are, naprai nei glaba, nei nathunu. Lord neke tusu mei glepo igre ka keha naikno te au heva heva ka nauthoglu igne mala tarai nei pogho soruni eghu God.

²⁰ Nu Lord neke fakarhi ghami ghotilo ka puhi biꞌo Ijep te jateula kaisei khaꞌaghi biꞌo te brana fara ra neku, naugna mana magnahaghei ghami ghotilo te mala nogna naikno thegna, eghuteuna tahati au eghu au gognaro gne.

²¹ “Nu Lord ne diꞌatagna fara ka iara eidi puhidi kuꞌemi ghotilo ra, eghume mana neke cheke fadoglo mei ka iara, iara ginauna na theome tangomana nate tei kasa ka Khoꞌu biꞌo Jordan te mala tei ka famane glose nate tufa mana te mala khotogna ghotilo na.

²² Iara theome tangomana te tei kasa ka Khoꞌu biꞌo Jordan igne, iara ginauna lehe kolho ka namono igne. Nu ghotilo ginauna tangomana nate tei kasa ka khoꞌu igne te mala khotogna famane glose tuana.

²³ Ghotilo fiofilo ghami. Glahu ghatho ihoni nei huhughuni eghu ghotilo nogna Nhaꞌa Cheke Lord teke eni mana balumi ghotilo ia. Glahu ghatho ihoni ghotilo eigna blahi te horo ghotilo kaisei mumuju te mala tarai tagna na.

²⁴ Blahi naugna Lord, nomi God ghotilo na tangomana te diꞌatagna fara ka ghotilo na. Diꞌatagna mana igne jateula kaisei khaꞌaghi eghu, eghuteuna mana theome magnahaghei ghami ghotilo te tarai ka kaisei god ngau.”

²⁵ Neuba ghotilo ne au raugha ka glose igne ne au thumi nei grami neu, ghotilo jafra jame te sari mumuju ghotilo te tarai tagna na. Jame te eni ghotilo glepo te jafra nei theome doglo teu ka tathagna Lord igne na, mana ginauna diꞌatagna fara ka ghotilo.

²⁶ Iara kilodi maloa ghe nauthoglu mala fiofilo fakeli ka nogu cheke iara igre gognarona. Jame te horo thua nafnata mumuju ghotilo na, ghotilo na theome raugha dofi ghami ka glose te khotogna ghotilo tuana, naugna Lord ginauna falelehe kmana naikno ka ghotilo.

²⁷ Eghuteuna mana ginauna ngolhi fajifla ghami ghotilo mala tei au baludi naiknodi keha namono are, eghuteuna keha ka ghotilo kolho nate karha au teu ka namono tuare.

²⁸ Jare ghotilo ginauna tarai ka mumuju teke horo kolho naiknore. Nafnata mumuju teke horo ka gaju ba thina te theome tangomana te fifilo ba fanomho ba ghamu ba gnanghoni kaisei glepo.

²⁹ Nu ka keha namonore ghotilo ginauna hironi Lord nomi God. Eghuteuna jame te ghaoghatho fakeli ghotilo ka nomi glalase fateote'o te hironi mana na, ghotilo ginauna tangomana te filo deni mana na.

³⁰ Jame te thoke mei puhi biꞌo ka ghotilo te au papara fara ghotilo ka glepo igre na, ghotilo ginauna nake figri ka Lord nomi God mala ke leghuni mana.

³¹ Ghotilo tangomana teke pulo mei na naugna Lord nomi God ghotilo na kokhoni ghami ghotilo. Mana theome tangomana te tei koko ghami ba goigoni ghami ba ghatho ihoni nhaꞌa cheke teke eni baludi kuꞌemi ghotilo tifa ra.

Jare na kaisei God kolho

³² “Ghotilo fariuriu ghusnadi thoutonu eidi gobigna lepo teke edi teke mei tifa funu ka narane God teke vuavuha naikno ka nauthoglu igne te ghilei mei posa gognarogne. Ghotilo fariuriu ghusnadi keha god delei heva heva ka nauthoglu igne eidi glepo biꞌo teke edi ka nauthoglu igne.

³³ Ba, ihei ka keha naikno igre teke nomhini chekegna kaisei god te jifla mei ke lamna khaꞌaghi jateula ghotilo teu te theome lehe tagna na?

³⁴ Ba, keha god au aheva nga teke tei ka kaisei kantri teke hata fajifla naikno ka namono igne te mala nogna naikno thegna na? Theo! Nu Lord neke tei Ijep neke hata fajifla ghita ka khame nhetagna. Ghotilo neke filo tathami unha teke eni Lord nomi God, mana neke hata fajifla ghami ghotilo Ijep, mana neke loku ka puhi biꞌo, nei ka kofubobhoi, nei ka nolaghi, nei ka magra biꞌo, nei ka glepo te mamhaghuana fara.

³⁵ “Mana fakakhana ka ghotilo glepo igre mala laseni ghotilo te Lord kolho God na, theo kaisei god aheva nga.

³⁶ Ka maloa na mana snakre ghami ghotilo mala nomhini naoglagna mana na, mala tangomana mana te fadogli ghami ghotilo na. Eghuteuna ka glose na mana snakre ghami ghotilo mala filoni nogna khaꞌaghi biꞌo na, mala tangomana ghotilo te nomhini chekegna mana te jifla mei ka khaꞌaghi igne.

³⁷ Naugna mana neke namhadi fara kuꞌemi ghotilo tifa ra, mana neke vahi ghami ghotilo mala nogna naikno mana. Eghume ka nogna nolaghi mana, mana neke hata fajifla ghami Ijep.

³⁸ Eghuteuna mana neke ngolhi fajifladi naikno te nheta fara salaꞌu ghami ghotilo. Mana neke eni igne mala hata nodi glose re mala nomi ghotilo.

³⁹ “Eghume ghotilo mala laseni nei ghaoghatho fakeli eghu gognarona, Lord kolho te au kligna nei ka nauthoglu pari igne. Theo kaisei god te au aheva nga.

⁴⁰ Ghotilo mala leghudi nogna cheke nei vetula teu mana te chekedi iara ka ghotilo gognaro igne. Eghuteuna jame te eghu ghotilo na, ghotilo ginauna au ka nakarha te keli, eghuteuna thumi ghotilo baludi goro sua nate karha mei ke leghumi ghotilo re, ginauna jaola au ka nakarha te keli. Eghuteuna ghotilo ginauna au raugha ka glose teke tusu ari Lord na mala khotogna fabrahu ghotilo.”

Namono mala poru

⁴¹ Aonu mae Moses ne vavahi thilo namono ke maghati Khoꞌu biꞌo Jordan.

⁴² Thilo namono igre mala poru. Jame kaisei mae theome ghathoni te mala faleheni keha mae na, eigna mana neke theome diꞌatagna ka mana tifa, nu mana ne lehe. Mae igne tangomana te rikha te tei poru ka kaisei ka thilo namono igre mala theome faleheni mare.

⁴³ Thilo namono igre Bese, Ramot nei Golan. Bese gne au ke lamna namono nagou, ka sare thogele vikegna mae Ruben. Ramot gne ka nohi Gilead ka vikegna mae Gad. Eghuteuna Golan gne ka rijon Basan ka vikegna mae Manase.

Nogna fapea cheke mae Moses

^44-49 Ka narane te jifla naiknodi Israel Ijep igne, mare mei ne ghilei au ka glogu ke maghati Khoꞌu biꞌo Jordan, rhegna namono Bet-Peo. Tifa na namono igne neke nogna Sihon mana neke au ka namono Hesbon, eghuteuna mana neke king ka vikegna mae Amoa. Nu mae Moses nei naiknodi Israel igre eghu neke uluni mana neke khotodi nogna glose mana re. Eghuteuna mare jaola neke khotogna nogna glose mae Og king gna Basan. Phei king ka vikegna mae Amoa igre neke khotodi glose ke maghati Khoꞌu biꞌo Jordan, nogna nohi mana igne ke mata funu ka namono Aroa ka glogu Khoꞌu Anon, eghuteuna ke raru na posa ka thogele Sirion, keha nanghagna na Hemon. Eghuteuna glose igne au namono ke maghati Khoꞌu biꞌo Jordan, tei posa ke mata Thongna Lehe ka pesi thogele Pisga. Jare Bet-Peo mae Moses ne tusu lao vetula igre ka naiknodi Israel. Igre u cheke nei vetula nei farirhiu eghu teke chekedi mae Moses ka naiknodi Israel.