Diutronomi 34 - Buka Blahi Ka Cheke Holo

Moses ne lehe

¹ Aonu mae Moses jifla ka sare biꞌo Moab ne tei apla ka thogele Pisga, eghuteuna mana haghe kligna ka thogele Nebo ka keha phile Khoꞌu biꞌo Jordan funu Jeriko. Kate au teu jare na, Lord ne fakakhana ka mana glose te gnafa ke lamna nohi Kenan. Mana fakakhana vido te gnafa funu ka nohi Gilead ke maghati Jordan tei posa ke raru Dan.

² Eghuteuna mana jaola filo laoni nogna nohi Naftali, nei nogna nohi Efrem, nei nogna nohi Manase. Eghuteuna mana jaola filo tongana heva heva ka nogna nohi Juda ke mosu tei posa Thongna Mediterenian,

³ nei nogna nohi Juda ke mata aheva te kiloi Negev, nei glogu Jeriko namonodi gaju thubo, nei nohi ke mata tei posa ka namono Soa.

⁴ Aonu Lord ne cheke eghu ka mana, “Glose igne iara neke nhaꞌa cheke hi ka mae Ebraham, nei mae Isak nei mae Jekop. Iara neke chekeni nate tusu lao iara glose igne ka vikedi thilo mare. Iara snakre nigho iagho mala filo kolho tagna, nu iara theome snakre nigho iagho te tei ruma tagna na.”

⁵ Aonu, mae Moses nogna mae gloku Lord igne ne lehe jare Moab, ne thofno horoghoto ka chekegna Lord na.

⁶ Lord ne giugiluni mana ka kaisei glogu jare Moab rhegna namono Bet-Peo. Nu funu ka narane tuana te mei posa gognarogne theo kaisei naikno te thofno laseni ka vido aheva te au bekugna mana na.

⁷ Mae Moses neke thokeni kaisei gobi varadaki finogha neke lehe nga. Mana nheta fabrahu, eghuteuna tathagnare jaola keli kolho.

⁸ Ka narane tuare naiknodi Israel teke au ka sare biꞌo Moab igre ne diꞌanagnafadi fara ne tanhi ka glehegna mana na ne ghilei thokeni tolufulu narane, tuare gnafadi narane te mala tanhire.

⁹ Eghuteuna mae Josua thugna mae Nun neke tughuni mae Moses, eghuteuna Lord ne toghoni mae Josua ne lalase fara, naugna mae Moses neke taofinihi mana. Aonu naiknodi Israel igre ne leghuni mana ne edi jateula teke chekedi Lord ka mae Moses ra neu.

Theo kaisei profet jateula mae Moses teuna

¹⁰ Mae Moses gne kaisei mae profet biꞌogna Israel ghilei mei posa gognarogne, eigna theo kaisei profet te jateula mana teu te thofno filoni tathagna Lord na te cheke balugna mana na.

¹¹ Lord neke kuruni mae Moses neke tei Ijep neke edi kofubobhoi nei fagaglana ranghini king gna Ijep, nei nogna mae biꞌo, nei naiknodi Ijep.

¹² Theo kaisei profet tangomana te fakakhana nolaghi biꞌo te mamhaghuana te edi mae Moses ke uludi naiknodi Israel.