Diutronomi 33 - Buka Blahi Ka Cheke Holo

Nogna cheke leghu lahu mae Moses ka naiknodi Israel

¹ Moses nogna mae gloku God igne, mana la namohi nogna narane te mala lehe na. Aonu mana fablahidi naiknodi Israel ne cheke eghu:

² “Lord mei funugna Sanai neke mei ka ghotilo. Mana mei ka ghotilo jateula naprai te haghe ka keha phile nohi Idom ra eghu. Eghuteuna siasiglagna na phae funu ka thogele Paran mei posa ka ghotilo. Nabotho thogha engel te mei balugna mana na, eghuteuna mana louloku kaisei khaꞌaghi biꞌo fei khame nhetagna.

³ Tutuani, Lord namhadi nogna naiknore. Mana thofno reireghi fakeli ghami ghotilo nogna naikno blahi mana ra. Eghume ghotilo mei mala pogho soru ka mana, eghuteuna mana na farirhiu ghami ghotilo.

⁴ Iara chekeni nogna vetula mana igne ka ghotilo. Vetula igne nomi glepo ulu fara ghotilo naikno ka vikegna mae Jekop.

⁵ Kate salo fodu ghotilo mae biꞌo nei mae lida teu ka vikegna Israel ra, Lord na nomi King ghotilo.”

⁶ Mae Moses tudu ne cheke eghu ka vikedi Israel: “Vikegna mae Ruben, ghotilo ginauna theome kmana, nu ghotilo ginauna karha, eghuteuna jame te keli na ghotilo na theome tangomana nate lehe na.

⁷ Lord, fanomho ka vikegna Juda kate tarai ari mare ka iagho te mala toghodire. Lord, ke hata fapulo meidi keha vikemi ghehati ra. Tusu lao nolaghi ka vikegna Juda mala magra thedi ka nodi naoka re. Eghume iagho toghodi mala uludi mare nodi naokare.

⁸ Vikegna mae Livae, ghotilo mae pris te hata phei nogna thina Lord te kilodi Tumim ghe Urim. Lord laseni te ghotilo kolho te doglo kani teke fariuriu ghami mana namono Masa nei ka khoꞌu Meriba.

⁹ Eghuteuna keha fata na, ghotilo faꞌuveni Lord neke theome nangadi idomi kmami ra, ba kherami ba thumi teu ghotilo ra. Ghotilo neke reireghini kolho nogna nhaꞌa cheke Lord.

¹⁰ Ghotilo vikegna Livae ra tangomana te farirhiudi vikegna mae Jekop igre ka nogna vetula Lord. Ghotilo tangomana te toghodi naiknodi Israel igre te iuꞌijudi nogna vetula manare. Ghotilo gahu insens mala cheke fakelini Lord, ghotilo tangomana te gahu fafara ka nogna olta mana na.

¹¹ Lord, fablahidi vikegna mae Livae, eghuteuna iagho thofno kelitamu ka nodi gloku mare re. Iagho goigonidi nodi naoka mare are, mala thosei ke mei magra mare.

¹² Vikegna mae Benjamin, Lord thofno namha ghami ghotilo. Ghotilo tangomana te au muana balugna Lord. Mana au balumi ghotilo ka nomi thogele ghotilo are, eghuteuna mana reireghi ghami ghotilo fabrahu.

¹³ Vikegna mae Josep, snakreni Lord mala fablahini nomi glose ghotilo na. Snakreni mana mala kuru soru nakhete ka glose igne nei mala fura haghe glokha khoꞌu tagna.

¹⁴ Snakreni mana mala agha mei fakeli naprai na ka nomi nagare ghotilo are, eghuteuna leuleghu nhigra na nagare ghotilo are mala vuragha ka gano.

¹⁵ Uve, nagare te gnafa ghotilo ka thogele di tifa are, ginauna au kmana famane gano.

¹⁶ Snakredi nohi ghotilo are mala kafe fodu ka glepo te keli. Snakreni Lord, God mae ihei te au ke lamna khaꞌaghi te nhako kaisei gaju ikoi igne, mana keli fara ka ghotilo. Iara magnahaghedi fablahi te gnafa igre mala mei ka ghotilo vikegna mae Josep mae ihei te mae biꞌo ka mae thabusigna mana re.

¹⁷ Vikegna mae Efrem au kmana thogha mae, eghuteuna vikegna mae Manase, jaola au kmana thogha mae. Ghopa phei vike igre nheta jateula buluka teke kulu karha ra eghu, eghuteuna ghotilo lase magra jateula buluka nalhaꞌugna mata ra eghu. Ghopa phei vike igre ginauna tangomana te goigonidi naiknodi keha kantri are, eghuteuna huhurudi naikno igre mala au ka khukrugna nauthoglu igne, ghopa ginauna tangomana te goigonidi mare.

¹⁸ Vikegna Sebulun, ghotilo tangomana te glealeꞌa te tei ka nomi vaka re. Vikegna mae Isak, ghotilo tangomana te glealeꞌa ka nomi suga tapuale te mala au nomi tadi are.

¹⁹ Ghopa phei vike igre tangomana te toredi keha vike are mala mei loku fodu balumi ghotilo ka vido blahi ka thogele are. Jare ghopa tangomana te gahu thofno fafara re, eghuteuna ghotilo tangomana te ei gaghamu ka gobigna lepo te au ka nomi bisnis ghopa ka thongna nei ka geri thongna.

²⁰ Vikegna mae Gad, ghotilo cheke fakelini Lord, naugna mana eni ne krepa nomi glose ghotilo na. Ghotilo lase magra jateula kaisei lion te thofno ghamu fahui khamegna ba phaꞌugna buluka teke kathu falehe thegnara neu.

²¹ Ghotilo vavahi vido glose te keli te magnahagheni themi na. Ghotilo hata vido glose te nabadi mae biꞌo. Eghuteuna kate mei loku fodu nodi lida naiknodi Israel re, ghotilo leghudi nogna famane vetula nei nogna cheke teu Lord re.

²² Vikegna mae Dan, ghotilo jateula kaisei lion majaghani gna Basan eghu. Ghotilo tangomana te ghosei te tei goigonidi nomi naokare.

²³ Vikegna mae Naftali, Lord ginauna thofno fablahi ghami ghotilo ka thua glepo te keli. Ghotilo mala hata glose ke mosu nei ke mata Kholo Galili.

²⁴ Vikegna mae Asa, Lord ginauna fablahi ghami ghotilo salaꞌudi keha vike are. Mana ginauna magnahaghei ghami ghotilo salaꞌudi keha vike are. Eghuteuna nomi namono ghotilore ginauna fodu salaꞌui ka oliv.

²⁵ Ghotilo tangomana te au fakeli fabrahu naugna ghotilo tangomana te hata aean nei bras eghu mala horo grengathadi gringni thinagna nomi namono na mala maku fakeli. Eghuteuna nakarhami ghotilore ginauna rheta fabrahu leghu rane.”

²⁶ Aonu mae Moses neke cheke eghu ka naikno te gnafadi Israel, “Theo kaisei god te jateula nomi God ghotilo naiknomi Israel te doglo ra. Mana tangomana te kasa ka maloa na te togho ghami ghotilo, eghuteuna mana tei ke lamna khoveo ka nogna nolaghi biꞌo.

²⁷ Ghotilo tangomana te au fakeli ka God mae ihei te karha te tifa. Leuleghu fata na, mana theome gnafa te loku ka khamemi ghotilore te mala togho ghami ghotilo na. Ka narane te cheke ka ghotilo te mala goigonidi nomi naoka ghotilore, mana ginauna ngolhi fajifladi.

²⁸ Eghume ghotilo Israel ginauna au ka pharikeli. Eghuteuna nomi namono ghotilo ka vikegna mae Jekop ra na au fakeli. Nomi glose ghotilo are ginauna au kmana gano nei waen, eghuteuna leuleghu fata na nakhete fabrahu.

²⁹ Gognarona ghotilo Israel glealeꞌa fara. Theo kaisei naikno te jateula ghotilo te fakarhi ghamihi Lord teu igre. Lord na jateula nomi greoreo eghu ghotilo mala theome tangomana nodi jata nomi naoka ghotilo are te fadi ghami ghotilo na. Eghuteuna mana jateula nomi famane naflahi eghu ghotilo mala uludi ghotilo naokare. Naoka igre ginauna mei mhaghu fififri balu tanhi ke ulumi ghotilo, nu ghotilo ginauna tapla ke klignadi nei goigonidi eghu mare.”