Diutronomi 30 - Buka Blahi Ka Cheke Holo

Naiknodi Israel tangomana teke figri mei kaLord

¹ Mae Moses ne cheke eghu, “Iara la chekehi puhi nate tangomana Lord nate fablahi ghami ghotilo na, nei puhi nate tangomana te mala thoke ghami ghotilo puhi biꞌo na. Eghume kate thoke ghami ghotilo gobigna lepo igre na, neuba ne unha nafnata kantri Lord nomi God vahini mala au ghotilo teku na, ghotilo mala ghaoghatho eidi u farirhiu igre.

² Eghuteuna kate ghathodi ghotilo nei thumi re teu farirhiu igre, ghotilo ke figri gaoghathomi re mala ke pulo mei ka Lord nomi God. Ghotilo mala leghudi ka gaoghathomi fateote'o, nei ka nomi glalase fateote'o eghu cheke te tusu ari iara ka ghotilo gognaro igre.

³ Jame te eghu ghotilo na, Lord ginauna kelitagna ka ghotilo, eghuteuna mana ginauna tangomana nate atha fajifla ghami ka keha namono aheva teke brue ghami mana teke tei ghotilo tadi are.

⁴ Neuba mana neke brue fajifla ghami ghotilo neke tei ka keha phile nauthoglu te khaba fara, nu mana ginauna nake hata fapulo mei ghami ghotilo.

⁵ Lord nomi God ginauna nake hata fapulo mei ghami ghotilo ka glose teke kulu au ghotilo tagna igne. Eghuteuna ka narane tuana, mana ginauna nake snakreni ka ghotilo mala ke khotogna glose tuana, mala au ka nakarha te keli, nei mala ke rheta salaꞌui ghotilo gognaro gne.

⁶ Aonu Lord nomi God ginauna hata koko glepo te diꞌa fateote'o ka gaoghathomi ghotilo are, nei ka gaoghathodi vikemi ghotilo are eghu. Eghume ghotilo te gnafa ginauna namhani mana ka gaoghathomi fateote'o, nei ka nomi glalase fateote'o mala tangomana ghotilo te karha na.

⁷ Aonu Lord ginauna lisa lao puhi biꞌo igre mala thokedi nomi naoka ghotilo te tirodi ghami nei goigoni ghami teu are.

⁸ Eghuteuna ghotilo ginauna leghuni mana, eghuteuna tajidi nogna vetula mana te tusu ari iara ka ghotilo gognaro igre.

^9-10 Ghotilo mala leghuni Lord nomi God, eghuteuna leghudi nogna vetula nei nogna farirhiu teu mana te rioriso soru ka Buka na igre. Eghuteuna ghotilo mala ke figri mei ka Lord nomi God gaoghathomi fateote'o nei nomi glalase fateote'o. Jame te eghu ghotilo na, mana ginauna tusu ranghi ghami nakarha te keli, eghuteuna ghotilo ginauna na au kmana thumi, nei kmana nomi buluka, sipu, nanigot, dongki nei hose, eghuteuna ghemi nagare ghotilo re ginauna au kmana gano tadi. Eghuteuna Lord ginauna keli tagna fara ka ghotilo eghuteuna togho ghami ghotilo mala au ka nakarha te keli te salaꞌui, jateula mana te keli tagna ka ghotilo gognarogne eghu.”

Vahini nabrou gna karha na

¹¹ Mae Moses ne cheke eghu, “Vetula te tusu ari iara ka ghotilo gognaro igne theome ninhigrana fara, nei theome au delei eghu mala theome leghuni ghotilo. Theo!

¹² Theome au ka maloa kligna mala cheke eghu ghotilo, ‘Ihei gne nate haghe kligna te mala hata te soru vetula igne ka tahati na, mala tangomana tahati te nomhini nei leghuni teuna?’

¹³ Theome au ke lamna nhorora, eghume iagho theome tangomana te cheke eghu na, ‘Ihei nate soru lamna nhorora te mala hata te mei ka tahati na, mala tangomana tahati te nomhi ni nei leghuni teuna?’

¹⁴ Vetula igne au ngala balumi ghotilo. Ghotilo la lasenihi, eghuteuna ghotilo tangomana te iju poloni, eghume ghotilo tangomana te leghuni na.

¹⁵ “Fanomho ghotilo ia! Gognarona iara chekedi cheke igre mala tangomana ghotilo te vahini nabrou gna karha na, mala keli nakarhami ghotilo re, ba nabrou gna glehe na mala goigoni ghami ghotilo re.

¹⁶ Iara cheke faheta ka ghotilo gognaro na, mala namhani Lord nomi God. Ghotilo mala leghudi nogna cheke, nogna farirhiu nei nogna vetula teu mana re. Jame te eghu ghotilo na, ghotilo ginauna au ka nakarha te keli, nei vikemi, nei thumi teu ghotilore ginauna kmana fara, eghuteuna Lord nomi God ginauna fablahi ghami ghotilo ka glose nate tei ghotilo te au tagna na.

¹⁷ “Nu jame te figri tagru ghotilo te tiromi fanomho, eghuteuna tei tarai ka keha god delei teuna,

¹⁸ Lord ginauna goigoni ghami ghotilo. Gognarona iara cheke faheta ka ghotilo jame te eghu ghotilo na, ghotilo ginauna na theome au raugha ka glose nate tei kasa ghotilo ka Khoꞌu biꞌo Jordan te mala tei au tagna na.

^19-20 “Gognarona iara cheke fadoglo ari ka ghotilo jame ghotilo kolho te mala vahidi puhimi ghotilo re. Iara eha tei ka maloa ghe glose mala jateula witnes eghu repa ka nogu cheke iara gre. Eghume, ghotilo magnahaghei karha, ba ghotilo magnahaghei lehe? Ghotilo magnahagheni Lord te mala fablahi ghami, ba ghotilo magnahaghei ni Lord te goigoni ghami? Iara magnahaghei ghami ghotilo fara te mala vahini u karha na! Ghotilo mala namhani Lord nomi God, eghuteuna ghotilo mala fanomho ka mana nei leghuni fabrahu eghu mana. Lord kolho te tangomana te tusu ari karha ka ghotilo nei ka vikemi ghotilo ra eghu. Eghuteuna ghotilo ginauna tangomana te au raugha ka glose teke nhaꞌa cheke mana ka thilo mae kuꞌemi ghotilo ra Ebraham, Isak nei mae Jekop.”