Diutronomi 3 - Buka Blahi Ka Cheke Holo

Naiknodi Israel ne uluni King Og

¹ Mae Moses neke cheke eghu, “Ke leghudi gobigna lepo igre, tahati neke tei fei ke raru, leghui nabrou te tei ka rijon Basan. Jare King Og baludi nogna soldiare neke mei mala magra ka tahati neku rhegna namono Edrei.

² Nu Lord neke cheke eghu ka iara, ‘Moses, iagho thosei mhaghuni king tuana! Iara ginauna lisa ari mana ka khamemu iagho baludi nogna soldia nei nogna namono te gnafa teu mana re. Ghotilo ginauna faleheni mana jateula teke eni ghotilo ka King Sihon vikegna mae Amoa teke funei Hesbon ia eghu.’

³ “Eghume, Lord neke lisa mei King Og baludi nogna soldia ka khameda tahati, eghuteuna tahati neke kafe aknu falehedi neke hui neke ghilei theo kaisei te karha na.

⁴ Eghuteuna ka narane tuana, tahati neke tei ruma neke hata namno salei namono ka mare. Tutuani, King Og neke funei frunidi kmana namono te gnafa ka rijon Agob. Tahati mala kafe hatadi gnafa mare.

⁵ Namono igre bara haghe kligna fara ka thina nei grengatha biꞌo te bibilakhi mare na. Eghuteuna tahati neke hata kmana namono ikodi te theome bara te lithui ka thina.

⁶ Ka narane igne, tahati neke goigonihi nodi namono biꞌo nei namono ikodi teu mare re, eghuteuna tahati neke aknu falehe nalhaꞌu, gaꞌase, nei goro sua, jateula teke eni tahati ka nogna namono King Sihon mae ihei teke funei Hesbo.

⁷ Eghuteuna tahati neke hata nodi buluka, sipu, nanigot, dongki nei hose teu mare ra, nei balu famane glepo ka nodi namono mare igre malada theda.

⁸ “Ka narane tuare, nodi namono phei mae king ka vikegna mae Amoa te au ke maghati Khoꞌu biꞌo Jordan, funu ke mata Khoꞌu Anon tei posa ke raru Thogele Hemon, namono te gnafa igre tahati neke hata fahui.”

⁹ (Naiknodi Saedon igre mare kiloi Thogele Hemon gne Sirion, nu vikegna mae Amoa igre mare kiloni namono igne Senia.)

¹⁰ Eghuteuna mae Moses neke cheke eghu, “Tahati la hata fanhighohi namono te funu ka sare biꞌo holo ke mata thogele te tei posa ka namono ke raru Gilead ghe Basan eghuteuna jaola tei posa ke maghatidi phei namono Saleka ghe Edrei, aheva te nogna kantri King Og.”

¹¹ King Og gna Basan igne, mana mae leghu lahu ka vikedi mae te nheta nei brahu teu te kilodi mare Refaem. Eghuteuna kate lehe King Og na, mare horo bokis gna mana na ka thina pipito te fati mita brahugna na eghuteuna namo phei mita krepagna na. Bokis thina igne au ngala posa gognaro ka namono Raba te au ka nodi nohi naiknodi Amon.

Vikegna Israel te au ke maghati Khoꞌu biꞌo Jordan

¹² Mae Moses neke cheke eghu, “Kate hata tahati nodi glose mare ke maghati Khoꞌu biꞌo Jordan ra, iara neke tufa glose igre ka thilo vike tahati igre. Glose ke biꞌogna na baludi namono te au ke lamnagna glose igne iara neke tusu lao ka vikedi mae Ruben, nei ka vikegna mae Gad teure, funu ka namono Aroa ke mata Khoꞌu Anon, eghuteuna tei posa ka nohi ke raru Gilead namono te au thogelero.

¹³ Eghuteuna keha vidogna nohi Gilead balugna nodi nohi maedi Basan, iara tusu lao ka vido vikegna mae Manase. Keha nanghagna rijon igne na Agob, aheva teke funei King Og ia.” Rijon Basan igne, tifa na neke nodi namono mae iheire te brahu nei nheta eghu, mae te kilodi Refaem.

¹⁴ Eghuteuna mae Jaea kaisei mae ka vikegna mae Manase, mana neke hata glose ka nohi thongana Agob ka rijon Basan te tei posa ka fofotagna namonodi naiknodi Gesua nei naiknodi ke mosu Maka. Eghuteuna mae Jaea ne fangangha rijon igne ka thegna ne kiloni Havot-Jaea. Nangha igne au ngala posa gognarogne.

¹⁵ Eghuteuna mae Moses neke cheke eghu, “Iara tusu lao vidogna rijon ke raru Gilead igne ka vikegna Makia.

¹⁶ Eghuteuna keha vidogna rijon igne balugna glose te tei posa ke mata Khoꞌu Anon iara neke tusu lao ka vikegna mae Ruben nei ka vikegna mae Gad. Nodi glose mare na, fofotagna ke mosu na doglo farihotei Khoꞌu Anon, eghuteuna fofotagna ke maghati na ka Khoꞌu Jabok, eghuteuna naiknodi Amon igre mare au ka keha phile na.

¹⁷ Eghuteuna ke maghatigna glogu Khoꞌu biꞌo Jordan igne iara neke jaola neke tusu lao ka mare. Eghuteuna fofotagna nodi glose mare ke mosu na ka Khoꞌu biꞌo Jordan, iara neke tusu lao glose funu ke raru Kholo Galili ke posa fei Thongna Lehe ke mata, eghuteuna tei posa ke maghati pesi thogele Pisga.

¹⁸ “Eghuteuna ka narane tuana, iara neke cheke faheta eghu ka vikedi mae Ruben, mae Gad nei mae Manase, ‘Lord, nomi God ghotilo, mana neke tusu arihi glose igne ka ghotilo mala khotogna. Nu kate kasa ghotilo ka Khoꞌu biꞌo Jordan igne, nomi soldia ghotilo re ginauna hata tei baludi nodi glepo mala magra re mala tei magra ke uludi vikemi themi ghotilo naiknodi Israel.

¹⁹ Nu khetomi, thumi, nei nomi buluka, nei sipu, nei nanigot, nei dongki, nei hose teu ghotilo are kmana fara, reꞌe ginauna tangomana te au ka namono tela tusu arihi iara ka ghotilo.

²⁰ Ghotilo mala toghodi kherami are ghilei au nodi namono mare te mala au tagna na. Eghuteuna mare jaola neke hata glose ka keha phile ke mosu Khoꞌu biꞌo Jordan aheva Lord nomi God ghotilo nate tusu ari ka ghotilo. Eghuteuna ghotilo mala au baludi mare ghilei gnafa magra na, eghuteuna Lord ginauna toghodi mare mala au fakeli, jateula ghotilo te au fakeli ka glose teke tusu ari iara ka ghotilo igne. Eghuteuna ke leghudi glepo igre, ghotilo ginauna tangomana na teke pulo mei mala au ka glose tekela tusu arihi iara ka ghotilo igne.’

²¹ “Eghuteuna ka narane tuana, iara neke cheke eghu balugna mae Josua, ‘Iagho la filodihi gobigna lepo teke edi Lord nomi God ghotilo ka phei king igre. Mana ginauna nake enila puhi igne ka naikno nate tei ghotilo ka nodi glose re.

²² Ghotilo thosei mhaghudi mare, naugna Lord nomi God ghotilo ginauna magra ranghi ghami ka mare.’ ”

Lordtheome snakreni mae Moses te tei ruma Kenan

²³ Mae Moses tudu neke cheke eghu, “Ka narane tuana, iara neke tarai eghu ka Lord,

²⁴ ‘Lord, iagho nogu Funei iara, iara lase nigho iagho teke fufunu fakakhana nou nolaghi biꞌo na. Theo kaisei god kligna nei ka nauthoglu igne eghu tangomana te edi re nafnata glepo biꞌo te nolaghi te edi iagho igre.

²⁵ Snakre ghau iara sagho mala tei filodi iara famane glose te au ke kasa Khoꞌu biꞌo Jordan, nei famane glose ka gukhu nei ka Thogele Lebanon.’

²⁶ “Nu Lord neke diꞌatagna fara ka iara eidi puhimi ghotilo re neke tirogna fanomho ka iara. Mana neke cheke eghu, ‘Moses! Iagho au kmu! Iagho thosei chekeni kaisei cheke eigna glepo igne!

²⁷ Iagho haghe ka thogele Pisga. Eghuteuna iagho filo thongana ka vido te gnafa are. Filo fakeli ka gobigna lepo te filodi iaghore, naugna iagho ginauna theome tangomana te kasa ka Khoꞌu biꞌo Jordan.

²⁸ Nu iara magnahaghei te famane cheke ka mae Josua, eghuteuna iagho farerheta gaoghathogna mana na, naugna ginauna mana u ngala te mala batudi naiknore te kasa ka Khoꞌu biꞌo Jordan mala hata glose nate filoni iagho na.’

²⁹ Eghume tahati neke au ka glogu rhegna namono Bet-Peo.”