Diutronomi 28 - Buka Blahi Ka Cheke Holo

Lordginauna fablahidi naikno te leghuni mana re

¹ Aonu mae Moses neke cheke eghu, “Jame te thofno leghuni ghotilo Lord, nomi God na, eghuteuna leghudi ghotilo famane cheke te tusu ari iara ka ghotilo gognaro gre teuna, mana ginauna fablahi ghami ghotilo mala hata nangha biꞌo salaꞌudi keha naikno ka nauthoglu igne.

² Jame te leghuni ghotilo Lord, nomi God na, mana ginauna tusu ari ka ghotilo fablahi igre:

³ “Nomi bisnis nei nomi nagare teu ghotilo are ginauna thofno keli fara.

⁴ “Ghotilo ginauna au kmana thumi. Eghuteuna ghemi nagare ghotilo are ginauna vuragha gano. Eghuteuna nomi glepo tautagu ghotilo are ginauna jaola au kmana thudi.

⁵ “Ghotilo ginauna au ghemi kmana wit mala ei ghemi bret.

⁶ “Lord ginauna reireghi ghami ghotilo ka vido aheva te tei ghotilo tagna na.

⁷ “Mana ginauna togho ghami ghotilo mala uludi nomi naoka te mei magra ka ghotilo are. Neuba naoka igre ne mei fodu ka narane te mala mei magra ka ghotilo na, mare ginauna rikha rikiraka tafri tei ka sopai nabrou.

⁸ “Lord ginauna fablahidi suga te mala lilisei gano ghotilo are mala fodu salaꞌui. Eghuteuna nomi gloku ghotilo are ginauna keli fara. Lord nomi God ghotilo igne ginauna fablahi ghami ghotilo ka glose teke tusu ari mana ka ghotilo igne.

⁹ “Jame te leghudi ghotilo nogna vetula mana re, eghuteuna leghudi puhigna mana re teuna, mana ginauna fablahi ghami ghotilo, eghuteuna ghotilo ginauna nogna naikno blahi mana, jateula teke nhaꞌa cheke hi mana ia eghu.

¹⁰ Eghume naikno te gnafa ka nauthoglu igne ginauna filo glani ghami ghotilo te nogna naikno Lord na, eghuteuna mare ginauna mhaghu ghami ghotilo.

¹¹ Kate au ghotilo ka glose aheva teke nhaꞌa chekeni Lord ka kuꞌemi ghotilo tifa ra, mana ginauna fablahi ghami ghotilo mala au kmana thumi, nei kmana nomi buluka, nei sipu, nei nanigot, nei dongki, nei kmana gano ka nagare.

¹² “Maloa gne jateula kaisei suga te mala liliseidi nogna famane glepo Lord ra eghu, eghuteuna mana ginauna tothora maloa gne mala soru mei nakhete ka thofno narane gna na. Lord ginauna fablahidi ghemi nagare ghotilo are mala au kmana gano. Eghume ghotilo ginauna au ghemi kmana gano, eghuteuna naiknodi keha kantri are tangomana te mei kaoni ka ghotilo. Eghuteuna theo kaisei glepo nate faꞌiho ghami ghotilo te mala tei kaoni ghotilo ka keha kantri delei.

¹³ Lord ginauna togho ghami ghotilo mala au nolaghi ke klignadi keha kantri are, eghuteuna mana theome snakre ghami ghotilo te au ke paridi nodi nolaghi keha kantri are. Jame te thofno leghudi nei ghatho tahuni teu ghotilo vetula te tusu ari iara ka ghotilo gognaro igre na, mana ginauna togho ghami ghotilo mala au ghotilo ke klignadi keha kantri are, eghuteuna Lord na theome snakre ghami ghotilo te mala au ke paridi mare na.

¹⁴ Ghotilo mala thofno leghu fakelidi vetula te tusu ari iara ka ghotilo gognaro igre, eghume ghotilo thosei ngolho leghudi keha god delei, eghuteuna ghotilo thosei tarai nei pogho soru eghu ka keha god te chaichaghi igre.”

¹⁵ Mae Moses ne cheke eghu, “Nu jame te tiromi fanomho ghotilo ka Lord nomi God, eghuteuna theome leghu fakelidi nogna cheke nei vetula teu mana te tusu ari iara ka ghotilo gognaro igre na, mana ginauna edi puhi biꞌo igre mala thoke ghami ghotilo:

¹⁶ “Nomi bisnis nei nomi nagare teu ghotilo are ginauna diꞌa salaꞌui.

¹⁷ “Ghotilo ginauna theo nagare wit te mala ei bret na.

¹⁸ “Ghotilo ginauna theo sua. Eghuteuna ghemi nagare ghotilo are ginauna theo ganodi. Eghuteuna nomi buluka nei nomi sipu nei nomi nanigot teu ghotilo are ginauna jaola theo thudi.

¹⁹ “Ghotilo ginauna thoke ghami puhi biꞌo ka vido te gnafa aheva te tei ghotilo tagna na.

²⁰ “Kate figri tagruni ghotilo Lord, te leghuni ghotilo puhi te diꞌa na, mana ginauna tusu ari puhi biꞌo mala thokedi gobigna lepo te edi ghotilo are. Mana ginauna tei koko ghami ghotilo, eghuteuna ghotilo ginauna mhaghu nomi na theome tangomana te laseni unha nate eni na, ghilei goigoni ghami fabrahu ghotilo.

²¹ Eghuteuna Lord ginauna snakre ari fogra biꞌo ka ghotilo mala ghilei lehe fahui ghotilo, eghuteuna theo kaisei naikno nate au ka glose aheva nate tei te au ghotilo tagna na.

²² Lord ginauna snakre ari thua nafnata fogra te diꞌa, eghuteuna ghotilo ginauna thoke ghami nhuge, nei fagrutu biꞌo. Eghuteuna nomi glose ghotilo are ginauna moja fara, eghuteuna mana na snakre mei nuri te thono brana fara mala flea nei mala goigoni eghu ghemi nagare ghotilo are. Puhi biꞌo igre ginauna goigoni ghami ghotilo mala ghilei kafe lehe ghotilo.

²³ Ginauna theo kaisei nakhete nate soru mei ka namono ghotilo are, eghuteuna nomi glose ghotilo are ginauna maku jateula aean eghu.

²⁴ Eghuteuna Lord ginauna snakre mei nusu nei gaughavu mala thofa soru funu kligna ka maloa gno jateula nakhete eghu mala ghilei goigoni fahui ghami ghotilo.

²⁵ “Lord ginauna toghodi mae naoka re mala ulu ghami ghotilo. Neuba ghotilo ne mei fodu ne kaisei mala magridi mare, ghotilo ginauna rikha ka soasopai nabrou. Eghuteuna naikno ka nauthoglu igne ginauna ghatho ghami ghotilo na kaisei glepo diꞌa kolho.

²⁶ Kate lehe ghotilo na, nanghaji nei glepo tautagu teu igre ginauna mei ghamu thinimi ghotilo re, eghuteuna ginauna na theo kaisei naikno nate au teu te mala bruedi re.

²⁷ Lord ginauna para ghami ghotilo ka nhuge jateula naiknodi Ijep tifa ra eghu. Thinimi ghotilore ginauna thafru ka thubu te fodu ka glotho. Eghuteuna thinimi ghotilore ginauna gharo fabrahu, nu theo kaisei meresin te au teu te mala teke keli fapulo ghotilo na.

²⁸ Lord ginauna eni ghami ghotilo mala fameomekro, eghuteuna ghotilo na noli nei dofu eghu.

²⁹ Fari hotei naublatha na, ghotilo ginauna ngafa khame tafri jateula mae te dofu ra eghu, eghuteuna ghotilo ginauna na theome tangomana te thafoni nabrou aheva te magnahaghei tei ghotilo tagna na. Eghuteuna gobigna lepo te edi ghotilo re ginauna theome keli. Leuleghu fata na nomi naoka ghotilo igre ginauna cheke fapari ghami, chaghi ghami nei blau ghami, eghuteuna theo kaisei naikno nate fakarhi ghami ghotilo na.

³⁰ “Jame iagho paru ka kaisei gaꞌase mala tolaghi ka naꞌa, nu keha mae ginauna mei goigoni gaꞌase igne. Jame kaisei mae horo kaisei suga, nu mana ginauna na theome tangomana te thuru tagna na. Jame kaisei mae joꞌu kaisei nagare grep, nu mana ginauna theome tangomana te ukli sisigna na.

³¹ Keha mae ginauna mei aknu falehe nou buluka iagho re kate filo teu iagho na, nu ghotilo ginauna na theome tangomana nate ghamu nafnahi gna na. Mare ginauna mei blau nou dongki iagho na, eghuteuna mare ginauna theome tusu fapulo ka ghotilo. Nomi naoka ghotilo re ginauna mei blau nomi sipu ghotilo re, eghuteuna ginauna na theo kaisei mae nate tangomana te togho ghami ghotilo na.

³² Mare ginauna mei hata thumi nalhaꞌu nei gaꞌase teu ghotilo are mala tei sneka ka keha kantri delei. Eghuteuna ghotilo ginauna magnahaghedi fara thumi re teke pulo mei, eghume leuleghu narane na ghotilo ginauna hiro na ghilei kabru tathami re, nu na theome tangomana kolho eghu.

³³ Ghotilo ginauna loku heta fara ka nagare mala kotu gano, nu maedi ka keha kantri delei ginauna mei hata ganodi re. Eghuteuna leuleghu fata na mare ginauna thofno goigoni ghami ghotilo.

³⁴ Ghotilo ginauna na ghilei noli kate filodi ghotilo glepo te diꞌa te au faligoho ghami ghotilo re.

³⁵ Lord ginauna toku tafru ghahemi ghotilo are ka nhuge te theome tangomana te gnafa dire, funu ka ghahemi are haghe posa ka phaꞌumi ghotilo are.

³⁶ “Lord ginauna kuru fajifla ghami ghotilo balugna nomi king na, eghuteuna ghotilo ginauna tei ka keha kantri te khaba fara aheva ghotilo nei kuꞌemi ra eghu te theome tangomana laseni. Kate au teu ghotilo ka kantri tuana, mare ginauna huhuru ghami ghotilo mala tarai nei pogho soru eghu ka mumuju god teke horo kolho ka thaba nei thina.

³⁷ Aonu ka namono aheva Lord nate kuru tei ghami ghotilo tuana, naiknore ginauna tirodi filo ghami, cheke goigoni ghami, nei na nagho ghami eghu ghotilo.

³⁸ “Neuba ghotilo ne joꞌu kmana sisi ka nagare biꞌo are, ghotilo ginauna theome tangomana te hata kmana gano tagna na, naugna cheche ginauna ghamu fahui ghemi gano ghotilo re.

³⁹ Ghotilo ginauna joꞌu nei reireghidi eghu nagare grep, nu ginauna theome au kmana sisidi eghuteuna ghotilo na theome tangomana te eni waen te mala koꞌu na, naugna siosilo ginauna goigoni fahui.

⁴⁰ Nomi glose ghotilo na au kmana sisi ka gaju oliv, nu ghotilo ginauna theome tangomana te eni oel mala kuki na, naugna kate ikodi teu sisidire, ginauna na brusu khoko pari.

⁴¹ Ghotilo ginauna au thumi nalhaꞌu nei gaꞌase, nu ghotilo ginauna theome tajidi naugna mae soldia ginauna hata tei ka sosolo.

⁴² Eghuteuna kmana cheche ginauna mei goigoni nomi gaju nei nagare teu ghotilo re.

⁴³ “Naikno phosa te au balumi ghotilo are ginauna nheta e nheta, nu ghotilo ginauna na nigra e nigra.

⁴⁴ Naikno phosa igre ginauna dedei fara, nu ghotilo ginauna au kuma, aonu mare ginauna snakreni kaoni ka ghotilo. Eghuteuna mare ginauna theome tangomana te mei kaoni ka ghotilo na. Naikno phosa igre ginauna au nodi nolaghi ke klignami ghotilo, eghuteuna ghotilo tangomana te au ke parigna nodi nolaghi mare.

⁴⁵ “Jame te tiromi fanomho ghotilo ka Lord nomi God eghuteuna theome leghudi cheke nei vetula eghu teke tusu ari mana ka ghotilo igre teuna, puhi biꞌo te gnafa igre ginauna thoke ghami ghotilo ghilei kafe lehe fahui ghotilo.

⁴⁶ Puhi biꞌo igre kaisei fagaglana ke lamnami ghotilo nei vikemi teu ghotilore tifa tifa.

⁴⁷ Kate fablahi ghami Lord ka glepo te kmana re, eghuteuna ghotilo theome thofno keli tami te pogho soru ka mana teuna,

⁴⁸ ghotilo ginauna rofo, nei roi koꞌu, nei soesole nei kmoꞌe ka gobigna lepo fateote'o. Glepo igre ginauna thoke ghami ghotilo naugna ghotilo ginauna na loku ranghidi nomi naoka ghotilo teke kuru mei Lord ka ghotilo are. Mare ginauna thofno para ghami fara ghotilo ka gloku biꞌo te ninhigrana fara ghilei ghotilo te gnafa na kafe lehe hui.

⁴⁹ “Lord ginauna hata mei kaisei armi gna kaisei kantri te khaba fara mala mei magra ka ghotilo. Nodi namono na au ka keha philegna nauthoglu igne, eghuteuna ghotilo theome laseni nodi cheke mare na. Mare ginauna mei ka ghotilo jateula kaisei gaghata te flalo te sukha ra eghu.

⁵⁰ Ghotilo ginauna thono mhaghudi mare, eghuteuna mare theome tangomana te kokhonidi naikno biꞌo, mae biꞌo nei goro sua.

⁵¹ Mare ginauna aknu falehe nomi buluka, sipu, nanigot nei dongki teu ghotilo re, eghuteuna mare na jaola hata gano ka nagare ghotilo re. Eghume ghotilo ginauna rofo ghilei lehe. Mare ginauna theome lisei soru kaisei wit, ba waen majaghani, ba oliv oel, ba buluka, ba sipu, eghuteuna ghotilo ginauna rofo ghilei lehe.

⁵² Naoka igre ginauna mei magra ka nomi namono biꞌo ghotilo are, eghuteuna mare ginauna paꞌe soru gringnidi namono aheva te rouronudi ghotilo na reireghi ghami ka glose aheva Lord teke tusu ari ka ghotilo teku are.

⁵³ “Ka narane te mei nomi naoka ghotilo igre te au falithu ka nomi namono ghotilo re, ghotilo ginauna diꞌa nagnafami fara naugna ghotilo ne theo ghemi gano. Ghotilo ginauna thono rofo fara na ghilei hata ghamu thinidi thumi nalhaꞌu nei thumi gaꞌase teu teke tusu ari Lord ka ghotilo are.

^54-55 Eghuteuna neuba kaisei mae te keli te thofno ke keli fara puhigna na, nu ka narane tuana, mana ginauna diꞌa nagnafagna fara ka grofo, aonu mana ginauna aknu falehe kaisei thugna mala ghamu nafnahigna na. Nu mana ginauna na theome tangomana te tufa kaisei nafnahi ka mae kheragna na, ba ka khetogna te namhani fara mana na, ba ka keha thugna te karha teure.

^56-57 Kate mei naokare te goigoni ni nomi namono ghotilo na, neuba kaisei famane gaꞌase te thono dedei fara te au ka suga gna na, nu ka narane tuana, naꞌa ginauna kokhoni ni fara ka grofo. Eghume naꞌa ginauna ghamu thugna teke karhala na, eghuteuna naꞌa ginauna jaola ghamu glepo te jifla mei ka nathuthuru gna sua teke karha la. Eghuteuna naꞌa pophoru mala ghamu, mala theome tangomana naꞌa te tufa kaisei ghegna nafnahi ka khetogna te namhani fara na, ba ka keha thugna re.

⁵⁸ “Nanghagna Lord nomi God ghotilo na thono haghe fara, eghuteuna ghotilo mala ghatho tahuni mana. Eghume jame te theome ghatho tahuni nei theome leghudi teu ghotilo nogna cheke mana tela riorisohi iara ka Buka gna vetula na igre,

⁵⁹ mana ginauna kuru mei fogra te diꞌa tulao ka ghotilo nei thumi teu ka tharaknami ghotilo are. Mana ginauna kuru mei keha fogra te diꞌa mala thoke ghami ghotilo gnafa, fogra igre ginauna theome tangomana nate ari te gnafa dire.

⁶⁰ Fogra te diꞌa teke filodi ghotilo Ijep teke mhaghu nomidi fara ghotilo tifa ra, ginauna nake thoke ghami ghotilo, eghuteuna fogra igre ginauna theome tangomana nate ari te gnafa na.

⁶¹ Eghuteuna Lord ginauna kuru ari keha nafnata fogra nei puhi biꞌo eghu mala thoke ghami ghotilo. Eghuteuna theo kaisei mae teke rioriso soruhi fogra igre ka Buka vetula igne. Eghuteuna fogra igre ginauna goigoni ghami ghotilo.

⁶² Neuba ghotilo ne kmana naikno ne jateula nathunu ka maloa na are neu, nu jame te theome leghuni ghotilo Lord nomi God na, phei ba thiloi kolho nate karha na.

⁶³ Mei te posa gognarogne, kate leghuni Lord ghotilo na mana neke keli tagna ka ghotilo neke tusu ranghi ghami nakarha te keli neke thovu neke kmana naikno. Nu jame te theome leghuni ghotilo mana na, mana ginauna keli tagnau kolho te thofno goigoni ghami ghotilo na. Jateula mae ihei te rathu koko buburu te diꞌa ka nagare ra eghu, mae naoka igre ginauna mei hata fajifla ghami ghotilo ka glose nate tei te hata ghotilo igne.

⁶⁴ “Jame te theome ghatho tahuni ghotilo Lord na, mana ginauna fariki raka ghami ghotilo ka keha kantri are, funu ka keha philegna nauthoglu na tei posa ka keha philegna nauthoglu na. Kate au ghotilo ka kantri igre, mare ginauna huhuru ghami ghotilo mala tarai pogho soru ka keha god teke horo ka thaba nei thina eghu kolho, eghuteuna ghotilo nei kuꞌemi ra eghu neke theome lasedi mumuju igre.

⁶⁵ Eghuteuna ka keha namonore, ghotilo ginauna na theome tangomana te filoni pharikeli ba vido mala gnafa. Eghuteuna theo kaisei namono te ghathoni ghotilo ne nomi namono themi teuna. Ghotilo ginauna nanga nomi fabrahu, eghuteuna gaoghathomi ghotilo re na theome tangomana te au blagna na, aonu gaoghathomi ghotilo re ginauna glaꞌe soru.

⁶⁶ Leuleghu fata na ghotilo ginauna au ka puhi biꞌo, eghuteuna glehe na au namo kolho ka ghotilo bongi narane na.

⁶⁷ Gaoghathomi ghotilo re ginauna faꞌiho fara, naugna ghotilo mhaghu nomi fara ka glepo te filodi ghotilo re. Kate dofra haghe hamerane na, ghotilo ginauna magnahaghei fara teke romno na. Eghuteuna kate romno na, ghotilo ginauna magnahaghei fara teke phae na.

⁶⁸ Neuba Lord neke chekenihi ka ghotilo na teke theome tangomana na teke pulo Ijep na, nu mana ginauna nake lilisei ghami ghotilo ka vaka mala ke kuru fapulo ghami jare. Eghuteuna kate au teu ghotilo jare na, ghotilo ginauna tangomana te toredi nomi mae naokare mala mei foli ghami ghotilo mala tei loku jateula naikno sneka eghu ka mare, nu ginauna na theo kaisei mae nate keli tagna te foli ghami ghotilo na.”