Diutronomi 26 - Buka Blahi Ka Cheke Holo

Gano saro ulu ka nagare

¹ Mae Moses ne cheke eghu, “Lord nomi God ghotilo igne neke tusu ari glose ka ghotilo mala hata khotogna. Eghume kate au fakeli ghotilo tagna na,

² ghotilo mala hata gano saro ulu ka nagare ghotilo are. Ghotilo mala lilisei gano igre ka kaisei kharaꞌo. Aonu ghotilo mala hata tei ka vido blahi teke vahini Lord aheva te mala au nanghagna mana na.

³ Eghuteuna ghotilo mala tei filoni pris mae ihei te loku ka narane tuana. Eghuteuna ghotilo cheke eghu ka mana, ‘Gognaro na, iara cheke ka Lord nogu God, eigna iara la meihi ka glose teke nhaꞌa cheke mana ka kuꞌeda ra.’

⁴ “Eghuteuna mae pris tuana ginauna hata kharaꞌo tuana ka khamemu iagho na, aonu mana ginauna tei lilisei ke ulugna nogna olta Lord.

⁵ Aonu iagho cheke eghu ke ulugna Lord nou God, “ ‘Kuꞌegu iara maegna Aram, mana theo kaisei nogna namono thegna. Mana hata tharaknagna na ne tei au Ijep. Kate tei mare na, mare theome kmana, nu kate au mare ka namono na, mare kaisei vike te rheta, nei au kmana vike tagna.

⁶ Naiknodi Ijep igre cheke fapari ghami ghehati, mare para ghami ghehati, eghuteuna mare huhuru ghami mala nodi sneka mare.

⁷ Nu ghehati tanhi ka Lord nodi God kuꞌemi ghehati ra. Lord nomhidi nomi natanhi ghehati re, eghuteuna mana filo ghami te papara fara, nei diꞌanagnafa nei au ka narane te ninhigrana.

⁸ Aonu Lord hata fajifla ghami Ijep ka khame nhetagna mana. Kate hata fajifla ghami mana Ijep mana neke edi kmana kofubobhoi nei nolaghi, nei glepo te mamhaghuana fara.

⁹ Mana hata mei ghami ka namono igne, eghuteuna mana tusu ranghi ghami glose te thofno keli fara, eigna glose igne au kmana gano tagna.

¹⁰ Eghume gognarona, iara hata mei gano saro ulu te kotu ka glose iagho, Lord God tela tusu meihi ka iara.’ “Aonu iagho lilisei kharaꞌo igne ke ulugna nogna olta Lord, eghuteuna iagho pogho soru mala kilo fnaknoni mana.

¹¹ Aonu iagho nei mae Livaet nei hatimare mae phosa te au balumu iagho igre, ghotilo tangomana te ghamu gano te keli ka gaghamu igne mala glealeꞌa ka gobigna lepo Lord teke tusu ari ka ghotilo ra.

¹² “Leuleghu thilo finogha, ghotilo eni fabothodi gano te hata ghotilo ka nagare are. Eghuteuna ka finogha tuana ghotilo tusu lao fabothodi gano igre ka mae Livaet, nei ka mae phosa te au balumi ghotilo, nei goro sua glehe kokoi, nei goro naikno biꞌo tela lehehi khetodi ra. Ghotilo eni igne, mala tangomana naikno te kuma igre te au ghedi naba gano ka namonomi ghotilo are.

¹³ Aonu ghotilo tangomana te tarai eghu ka Lord, ‘Lord nogu God. Iara hata mei funu ka sugagu na gano te blahi igne mala tusu ari ka iagho, theo kaisei vidogna te au teu ka sugagu iara na. Iara tusu lao gobigna lepo igre ka naikno te kuma nei ka mae Livaet, nei ka mae phosa, nei goro sua glehe kokoi, nei ka goro naikno biꞌo tela lehehi khetodi. Iara eni igne leghuni unha teke chekenihi iagho ia. Iara theome tei kokodi nou cheke iagho eidi glepo igre, eghuteuna iara theome ghatho ihoni kaisei nou cheke iagho.

¹⁴ Iara theome eni kaisei glepo te mala goigonidi gano blahi igre. Kate tanhi ni mae te lehe na, iara theome ghamuni katha vidogna. Eghuteuna kate thona iara ka tathamu iagho na, iara theome haboni. Eghuteuna iara theome hata kaisei vidogna mala tusu lao jateula kaisei fafara eghu ka ihei te lehe. Lord God, iara faꞌuve nighohi, eghuteuna iara leghudi gobigna lepo te chekedi iagho ka iara ra.

¹⁵ Iagho au kligna ka nou vido blahi na. Filo soru sagho ka ghehati naiknomi Israel, mala fablahi ghami, nei fablahini famane glose te keli tela tusu meihi iagho ka ghehati jateula teke nhaꞌa chekeni iagho ka kuꞌemi ghehati tifa ra.’ ”

Mae Moses cheke ne gnafa ka vetula eidi nogna nhaꞌa chekeLord

¹⁶ Aonu mae Moses ne cheke eghu ka mare, “Ka narane gognarogne, Lord nomi God ghotilo igne cheke ranghi ghami ghotilo mala leghudi nogna vetula nei farirhiu teu mana igre. Eghume ghotilo faghuai eghu ka gaoghathomi fateote'o nei ka nomi glalase fateote'o mala leghudi vetula nei farirhiu teu igre.

¹⁷ Gognarona, ghotilo chekeni te Lord na nomi God ghotilo. Eghuteuna ghotilo nhaꞌa cheke nate leghudi ghotilo puhigna mana re, eghuteuna ghotilo tangomana nate faꞌuvedi nogna cheke, nei nogna farirhiu, nei nogna vetula teu mana re, eghuteuna edi gobigna lepo te chekedi mana re.

¹⁸ Lord chekeni te gognarogne ghotilo nogna naikno mana, ghotilo thofno nogna naikno thegna mana, jateula teke nhaꞌa chekeni hi mana ia eghu. Eghuteuna mana chekehi ka ghotilo mala leghudi nogna vetula mana re.

¹⁹ Eghuteuna te chekeni mana na, mana ginauna fablahi ghami ghotilo mala au nangha biꞌo ghotilo salaꞌudi keha naikno ka nauthoglu igne, eghuteuna mare ginauna thofno ghatho tahu ghami ghotilo. Eghuteuna ghotilo ginauna nogna naikno blahi Lord nomi God, thofno jateula teke nhaꞌa chekenihi mana ia eghu.”