Diutronomi 25 - Buka Blahi Ka Cheke Holo

¹ Mae Moses neke cheke eghu, “Jame phia mae fari fapholai, phia mare tei ka fate mala fadoglini fapholai igne. Eghuteuna mae fate na ginauna cheke fajiflani ihei te doglo na, nei ihei te nabagna te au papara na.

² Jame mae fate cheke ka mare mala purini kaisei mae, mae igne thuru pari ka glose na ke ulugna mae fate. Aonu mare puphuri ka thagrugna mae igne niha fata te nabagna puhi biꞌo teke eni mana na.

³ Nu mare theome tangomana te puphuri te salaꞌuni phiatutu fata na. Jame te salaꞌuni phiatutu fata na, ginauna goigonini fara kherami na ka tathadi naikno te gnafa re.

⁴ “Jame hata te mei ghotilo buluka na te nolo ka phaꞌudi wit te mala koko kunedi sisi wit igre na, ghotilo thosei fofotho foflogna buluka igne, ghotilo lisani mala ghamu ka keha wit igre.”

⁵ Mae Moses ne cheke eghu, “Jame phei mae thabusigna au fodu, eghuteuna kaisei ka phei mae igre lehe, nu mana theo thugna nalhaꞌu. Jame te eghu na, khetogna mana teke lehe kokoi igne thosei tolaghi ka keha tharaknai. Thabusigna mae te lehe igne mala ke tolaghi ka naꞌa.

⁶ Mae sua nalhaꞌu teke kulu karha ka repa na, igne thofno thugna mae teke lehe ia, eghuteuna nanghagna na ke fangangha ka mae teke lehe na. Ka puhi igne nanghagna mae teke lehe na theome tangomana te gnafa ke lamnadi naiknodi Israel.

⁷ Nu jame thabusigna mae teke lehe igne tirogna tolaghi ka naikno biꞌo igne, naꞌa tei filodi mae lida rhegna grengathagna namono na. Naꞌa na cheke eghu ka mare, ‘Thabusigna khetogu iara te lehe ia tirogna te tolaghi ka iara na jateula te chekeni ka vetula na ia eghu. Naꞌa theome magnahagheni nanghagna thabusigna na te au fabrahu ka naiknodi Israel.’

⁸ “Aonu mae lida gna namono na igre kilo meini mae thabusigna igne mala cheke ranghini mana. Nu jame chekeni meu ngala mana te tirogna teuna,

⁹ uve, ka tathadi mae lida igre, naikno biꞌo igne tei hata koko nogna slipa mae thabusigna igne, eghuteuna kmisu ka tathagna re, eghuteuna cheke eghu tagna, ‘Igne thofno puhi te mala eni ka iagho na, naugna iagho ne tirouni nanghagna thabusimu na te au fabrahu ka naiknodi Israel.’

¹⁰ Aonu ghotilo te gnafa na ginauna kiloni tharaknagna mae thabusigna igne, ‘Tharaknagna mae ihei te koko nogna slipa na.’ ” Naugna mana ne theome magnahagheini nanghagna mae thabusigna thegna na.

Keha vetula

¹¹ Aonu mae Moses ne cheke eghu, “Jame phia mae magra, eghuteuna khetogna keha mae na toghoni khetogna na, eghuteuna loku ka khoa keha mae na.

¹² Jame te eghu na, ghotilo kusu koko khamegna gaꞌase igne, eghuteuna ghotilo thosei kokhoni ni naꞌa.

¹³ “Ghotilo thosei edi phei sopai glepo kate skel gano ghotilo ka ihei na.

¹⁴ Eghuteuna ghotilo thosei edi phei sopai botol mala skel gano mala theome tangomana ghotilo te chaghini ihei na.

¹⁵ “Kate skel ghotilo tahudi glepo, ba ghotilo skel niha lita glepo igre, ghotilo mala famane edi fadoglo fara. Jame te eni ghotilo igne na, ghotilo ginauna tangomana te au raugha ka glose teke tusu ari Lord ka ghotilo igne.

¹⁶ Nu Lord nomi God thono tirognani fara naikno te chaghini ihei ka nogna bisnis na.”

Naiknodi Israel mala aknu falehe tharaknagna mae Amalek

¹⁷ Mae Moses ne cheke eghu, “Ghotilo thosei ghatho ihoni unha teke eni vikegna mae Amalek ka ghotilo kani teke jifla ghotilo Ijep ia.

¹⁸ Ka narane tuana, mare neke theome mhaghuni God, aonu neuba ghotilo ne babaꞌo fara, nei glaꞌe soru neu, mare ngolhi ghami ghotilo aknu falehedi iheire te thoghei fara te nolo leghui.

¹⁹ Lord nomi God ghotilo igne ginauna togho ghami ghotilo mala gnafa ka glose teke tusu ari mana te mala khotogna na, eghuteuna mae naoka te au faligoho ghami ghotilo are ginauna theome eni kaisei puhi te diꞌa ka ghotilo. Aonu ka narane tuare, ghotilo ginauna tei falehedi gnafa vikegna mae Amalek. Ghotilo ginauna goigonidi gnafa, mala theome tangomana kaisei naikno teke ghathodi re. Ghotilo thosei ghatho ihoni igne!”