Diutronomi 24 - Buka Blahi Ka Cheke Holo

Gaꞌase te koko khetogna na, ke leghu naꞌa ke tolaghi

¹ Mae Moses ne cheke eghu, “Jame kaisei mae tolaghi ka kaisei gaꞌase, eghuteuna ke leghu, mae igne ke tirognani gaꞌase igne naugna mana neke laseni kaisei glepo te diꞌa eigna naꞌa. Aonu mana rioriso pepa mala koko, eghuteuna tusu lao ka gaꞌase igne, eghuteuna mana kuru fajiflani naꞌa ka nogna suga na.

² Eghume, gaꞌase igne jame ke tolaghi ka keha mae na.

³ Ke leghu, fapea khetogna na ke tirognani gaꞌase igne. Aonu mana rioriso pepa mala koko, eghuteuna tusu lao ka gaꞌase igne, eghuteuna mana jaola kuru fajiflani ka nogna suga na. Ba fapea khetogna naꞌa igne lehe.

⁴ Jame te thoke mei puhi igre na, khetogna ulu lahu naꞌa igne theome tangomana teke tolaghi ka naꞌa na, naugna gaꞌase igne theome klino ka tathagna God, eghuteuna theome keli ka tathagna Lord na khetogna ulu lahu naꞌa igne teke tolaghi ka naꞌa na. Ghotilo ginauna thosei eni nafnata puhi te diꞌa igne ka glose teke tusu ari Lord ka ghotilo igne.”

⁵ Mae Moses ne cheke eghu, “Jame kaisei mae ao ngala tolaghi nga, ghotilo theome tangomana te kuruni mana tei magra ka armi. Eghuteuna ghotilo theome tangomana teke tusu lao keha gloku ka armi. Ghotilo lisani mana mala au kaisei finogha thongana balugna khetogna na, mala glealeꞌa khetogna na.

⁶ “Kate kaoni kaisei mae ka ghotilo na, ghotilo tangomana te hata glepo mala ke tughu fapulo mana nogna kaoni na. Nu ghotilo thosei hata kaisei ba phei thina te mala ghorhu wit, naugna igre glepo te mala edi mana te au gano tharaknagna mana na.

⁷ “Jame kaisei mae lokini mae kheragna na eghuteuna huhuruni mana mala nogna naikno sneka, ba foli mala kaisei nogna sneka, te eghuna, ghotilo aknu falehe mae igne. Ghotilo aknu falehe mae igne mala koko puhi te diꞌa igne ka ghotilo.

⁸ “Jame kaisei ka ghotilo au fogra diꞌa ka guligna na, mana mala edi gobigna lepo mae pris ka vikegna Livae te chekedi ka mana re.

⁹ Ghotilo ghathoni unha Lord nomi God teke eni ka Miriam kani teke jifla ghotilo Ijep ia.

¹⁰ “Jame te snakreni ghotilo kaoni na ka mae kherami na, ghotilo ginauna theome tangomana te tei ruma ka nogna suga mana na mala hata nogna pohe mana mala ke tughu fapulo nogna kaoni na.

¹¹ Ghotilo ofou ke kosi, mala mei faꞌari kolho mana ka iagho.

¹² Jame mae igne kuma fara, ghotilo thosei hata nogna pohe na bongiro.

¹³ Leuleghu narane na, ghotilo hata fapulo pohe igne ka mana grafiro, mala totoku mana kate thuru na. Jame te eghu na, mana ginauna glealeꞌa ka iagho. Eghuteuna Lord ginauna filoni puhimi ghotilo te doglo fara na.

¹⁴ “Jame kaisei nomi mae gloku ghotilo kuma fara, neuba ne kherami, ba mae phosa te au ka nomi namono ghotilo na, ghotilo thosei chaghini mana.

¹⁵ Leuleghu narane na, ame plulu nga naprai na teuna, ghotilo folini teke loku mana na, naugna mae igne kuma fara eghuteuna mana magnahaghei sileni. Jame te theome folini ghotilo mana na, mana ginauna tei tanhi ka Lord, eghuteuna ghotilo ginauna naba te papara ka nakhibo igne.

¹⁶ “Jame kaisei sua huhughuni vetula na eghuteuna nabagna te lehe na, ghotilo thosei faleheni mae kmagna na. Eghuteuna jame kaisei mae huhughuni vetula te nabagna te lehe na, ghotilo ginauna thosei faleheni thugna mana na. Naikno na tangomana te lehe eigna nakhibo gna thegna na.

¹⁷ “Ghotilo leghuni puhi te doglo ka fate na ranghidi naikno phosa nei goro sua te glehe kokoi. Eghuteuna jame kaisei naikno biꞌo tela lehehi khetogna na kaoni ka ghotilo, ghotilo thosei hata nogna pohe na mala ke tughu fapulo nogna kaoni na.

¹⁸ Leuleghu fata na ghotilo ke ghathoni teke sneka ghotilo Ijep ia, eghuteuna Lord nomi God neke hata fajifla ghami ka na au sosolo igne. Naugna igne iara tusu ari ka ghotilo nafnata vetula igre.

¹⁹ “Kate hata gano ghotilo ka nagare na, glahu ghatho ihodi ghotilo keha gano. Jame te eghu na, ghotilo thosei pulo ke hata. Ghotilo khudau maladi naikno phosa, nei goro sua glehe kokoi, nei goro naikno biꞌo. Kate eghu ghotilo na, Lord nomi God ghotilo igne ginauna fablahidi nomi gloku te gnafa ghotilo re.

²⁰ Eghuteuna kate tei ghotilo te hata ghemi sisi gaju oliv na, eghuteuna keha au meu ka gaju re teuna, ghotilo thosei ke figri mala ke hata sisi igre. Ghotilo khudau, ghedi naikno phosa, nei goro sua glehe kokoi, nei goro naikno biꞌo.

²¹ Eghuteuna jame ghotilo tei ka nagare mala hata ghemi keha sisi grep, eghuteuna keha sisi au meu teuna, ghotilo thosei ke figri mala ke hata. Ghotilo khudau, ghedi naikno phosa, nei goro sua, nei goro naikno biꞌo.

²² Leuleghu fata na ghotilo ghathoni narane teke sneka ghotilo Ijep ia. Naugna igne te tusu ari iara nafnata vetula igre ka ghotilo.”