Diutronomi 23 - Buka Blahi Ka Cheke Holo

Mae ihei te theome au ka nodi faidu nogna naiknoLord

¹ Mae Moses ne cheke eghu, “Jame kaisei mae au jare mae ihei teke vahe mamajagna na ba vahe koko glepogna na. Nafnata mae igne theo nogna nolaghi te mala mei au ka nodi faidu nogna naikno Lord igne.

² “Jame kaisei mae karha kate theome thofno tolaghi leghuni nodi vetula naiknodi Israel, eghuteuna iheire ginauna nate karha mei ka vikegna mae igne, nafnata mae igne theo nogna nolaghi te au ka nodi faidu nogna naikno Lord igne.

³ “Jame kaisei ka vikegna Amon, ba vikegna Moab, eghuteuna iheire ginau nate karha mei ka phei vike igre, nafnata naikno igre jateula te theo nodi nolaghi eghu te mala au ka kaisei nodi faidu nogna naikno Lord igne.

⁴ Naugna tifa kani teke jifla ghotilo Ijep ia, ghotilo neke mei salaꞌu ka nodi nohi naiknodi Amon, eghuteuna mare neke theome kelitadi te tufa gano nei khoꞌu teu ka ghotilo na. Eghuteuna kate mei ghotilo ka nodi nohi naiknodi Moab, mare neke kilo meini mae Balam thugna mae Beo, maegna ka namono Petoa jare Mesopotemia. Mare folini mae Balam mala tibri ghami ghotilo.

⁵ Nu Lord nomi God ghotilo igne neke tirogna fanomho ka mae Balam. Eghuteuna neuba mae Balam ne tibri ghami ghotilo, God figri thibri igne ka kaisei fablahi, naugna mana namha ghami ghotilo.

⁶ Eghume ghotilo ginauna thosei toghodi naikno tuare nei thosei eni kaisei glepo te keli eghu ranghidi nafnata naikno tuare mala au mare ka nakarha te keli.

⁷ “Nu ghotilo theome tiromini kaisei maegna Idom, naugna ghotilo kheragna mana. Eghuteuna ghotilo theome thofno tiromini maegna Ijep, naugna tifa na ghotilo neke au ka nodi kantri mare na jateula mae phosa neku.

⁸ Gradi nafnata mae igre au nogna nolaghi te mala au ka kaisei nodi faidu nogna naikno Lord.”

Mae soldia re mala klino ka tathagnaLord

⁹ Mae Moses ne cheke eghu, “Kate tei ghotilo te au ka kaisei namono te mala magra ka nomi naokare, ghotilo faghuai eghu mala theo kaisei glepo te fathona ghami ghotilo ka tathagna Lord.

¹⁰ Jame kaisei mae theome klino, naugna mana neke mifini te thofa khoꞌu bongiro na, mae igne tei au fadelei thegna narane thongana tuana.

¹¹ Fei grafi ke apu nga mana. Eghuteuna kate plulu naprai na, mana tangomana teke pulo mei ka vido te au ghotilo na.

¹² “Leuleghu fata na, ghotilo lilisei kaisei vido ke kosigna te au mae armi tagna tuana, mala tangomana mare te tei tagna na.

¹³ Eghuteuna leuleghu fata kate tei mata na, ghotilo hata khodo tei balumi mala dokha khora mala fufruni charami re.

¹⁴ Ghotilo edi glepo igre naugna Lord nomi God ghotilo igne, mana au balumi ghotilo, eghuteuna mana ginauna reireghi ghami ghotilo, eghuteuna mana ginauna togho ghami ghotilo mala tangomana ghotilo te uludi nomi naokare. Eghume vido te au ghotilo igne mala kaisei vido blahi, eghuteuna Lord theome magnahagheni te filoni kaisei glepo te famamaja ikno ka ghotilo, ba glahu figri tagru ghami mana.”

¹⁵ Mae Moses ne cheke eghu, “Jame kaisei naikno sneka rikha ka nogna funei na mei poru ka ghotilo, ghotilo thosei ke kuru fapuloni.

¹⁶ Keliu mala au balumi ghotilo ka namono aheva te vahini mana na. Eghuteuna kate au mana balumi ghotilo na, ghotilo thosei cheke faparini.

¹⁷ Theo kaisei mae ba gaꞌasegna Israel, te tangomana te vinegna kaisei vido blahi na.

¹⁸ Thosei hata mei kaisei sileni jateula fafara teke nhaꞌa chekeni ka Lord nomi God na eghu, glahu neke hata mana sileni igne ka nogna gloku vine nalhaꞌu ba gaꞌase. Lord thofno tirognadi fara phei nafnata vinegna vido blahi na.

¹⁹ “Kate kaoni sileni, ba gano, ba keha glepo ka ghotilo mae kherami ghotilo na, ghotilo thosei foli kaisei intres ka mana.

²⁰ Ghotilo tangomana te eni kaisei mae phosa te mala foli intres na. Nu ghotilo theome tangomana te eni mae kherami na te mala foli intres mana na. Ka puhi igne, Lord nomi God ghotilo na ginauna fablahi ghami ghotilo ka gobigna lepo te edi ghotilo ka glose nate hata ghotilo igne.

²¹ “Kate nhaꞌa cheke ghotilo ka Lord nomi God na, ghotilo thosei paipalighi fara te mala eni unha teke nhaꞌa chekeni ghotilo na. Lord ginauna theome ghatho ihodi nomi nhaꞌa cheke ghotilo ra, eghuteuna jame te theome edi ghotilo re, ghotilo ginauna nabami te mala au papara ka nakhibo igne.

²² Nu jame te theome eni ghotilo kaisei nhaꞌa cheke ka Lord na, igne theome nakhibo, keliu kolho.

²³ Nu kate nhaꞌa cheke na, ghotilo tajini nhaꞌa cheke igne, naugna ghotilo eni cheke igne leghuni unha te magnahagheni ghotilo te mala tusu lao ka Lord nomi God.

²⁴ “Kate tei ghotilo ka nogna nagare grep mae kherami na, ghotilo tangomana te ghamu keha sisi. Ghotilo tangomana te ghamu te magnahagheni iagho na, nu blahi iagho te fafofodu te nhiꞌo te tei nou kharaꞌo na.

²⁵ Eghuteuna kate tei ghotilo ka nogna nagare wit mae kherami na, ghotilo ginauna tangomana te hata keha gano tagna mala ghamu, nu ghotilo hata ka khame kolho, blahi te kato ghotilo ka naflahi te mala hata kmana gano tagna na.”