Diutronomi 21 - Buka Blahi Ka Cheke Holo

Unha te mala eni kate lehe naikno na

¹ Mae Moses ne cheke eghu, “Kate au ghotilo ka glose aheva Lord nomi God nate tusu ari ka ghotilo na, jame keha mae filoni kaisei mae na lehe mata nu ghotilo theome laseni mae ihei teke falehe gna na.

² Jame te eghu na, nomi mae lida nei nomi mae mala fate teu ghotilo re tei ka vido aheva te au thinigna mae te lehe igne. Ghotilo falaseni vido aheva te au rhegna namono tuana.

³ Aonu, mae lida gna namono tuana tei vahini kaisei sua buluka te theome eni teu kaisei gloku.

⁴ Aonu mare batuni sua buluka igne soru ka kaisei vido te au khoꞌu tagna. Vido igne theome au kaisei nagare tagna. Aonu ka vido igne nate lolhopa mare graragna na mala aknu falehe.

⁵ Eghuteuna mae pris ka vikegna mae Livae igne jaola mala tei ka vido igne. Lord nomi God ghotilo na neke vahidi mae pris mala edi nogna gloku re, nei mala chekeni fablahi na ka nanghagna mana, nei mala fatedi puhi biꞌo teke fari pholai nei magra teku re.

⁶ Aonu mae lida te gnafa ka namono tuana mare ginauna titihi khamedi re ke kligna gna buluka tela aknu falehehi igne.

⁷ Eghuteuna mare na cheke eghu, ‘Ghehati neke theome aknu falehe mae igne, eghuteuna ghehati theome laseni mae ihei teke aknu faleheni mana na.

⁸ Lord, iagho gleꞌani fafara igne mala hata fadelei nakhibodi nou naikno iagho teke fakarhidi iagho gre. Thosei lisa mei ke klignami nakhibo igne mala para ghami naugna keha mae neke aknu faleheni mae te doglo igne.’ Eghume, Lord ginauna tangomana hata fadelei nakhibomi ghotilo re ka glehegna mae igne.

⁹ Ka puhi igne, ghotilo ginauna theome naba te papara ka glehegna mae ihei te doglo igne, naugna ghotilo ne edi glepo te magnahaghedi Lord re.”

Puhi te mala tolaghi ka gaꞌase teke hata hatimare mae soldia ka magra

¹⁰ Aonu mae Moses ne cheke eghu, “Kate togho ghami Lord nomi God te uluni ghotilo magra na ka nomi naokare, ghotilo ginauna tangomana te hata naikno te uludi ghotilo re.

¹¹ Eghuteuna jame kaisei mae ka ghotilo filoni kaisei famane gaꞌase fara, eghuteuna mana khaeni fara naꞌa magnahaghei te tolaghi ka gaꞌase igne. Uve, jame te eghuna, mana tangomana te tolaghi ka gaꞌase igne.

¹² Mana hata gaꞌase igne tei ka sugagna. Gaꞌase na mala ghoighori phaꞌugna na, eghuteuna kusu geghesugna re.

¹³ Aonu naꞌa hata koko nogna kastom pohe thegna na ke tughu ka nomi nafnata pohe ghotilo na. Naꞌa ginauna au nabagna kaisei nhigra ka nogna suga na, mala tanhidi idogna kmagna re. Aonu ke leghugna igne, mae igne tangomana te tolaghi ka naꞌa te mala thuru balugna naꞌa na.

¹⁴ Nu jame mae igne theome magnahagheni gaꞌase igne ke leghugna te tolaghi ka naꞌa na, mana snakreni gaꞌase igne mala snagla tei nogna kolho. Mana theome tangomana te sabirini naꞌa ba ghathoni naꞌa jateula naikno sneka teuna, naugna mana neke thuruhi balugna naꞌa.”

¹⁵ Eghuteuna mae Moses ne cheke eghu, “Jame kaisei mae au phei khetogna, nu mana namhani kolho kaisei, eghuteuna mana theome namhani keha na. Repa kafe au thudi nalhaꞌu ka mana, nu teke kulu karha na thugna gaꞌase te theome namhani fara mana na.

¹⁶ Uve, kate tufa mana nogna gobigna lepore ka phia thugna nalhaꞌu re, mana na theome ghatho tahuni fapea thugna nalhaꞌu teke karha ka gaꞌase te namhani fara mana na. Eghuteuna mana theome tusu lao glepo ka fapea teke thofno kulu karha na, thugna gaꞌase teke theome namhani fara na.

¹⁷ Kate tufa mana nogna gobigna lepo re, mana falalase ihei teke kulu karha na, thugna gaꞌase teke theome namhani fara mana na. Neuba glepo te tusu lao mana ka fapea nalhaꞌu na igre, mana mala tusu lao phia fata ka glepo igre ka thugna ulu lahu na naugna ulu lahu nei nogna nolaghi eghu mana.”

Mae majaghani te theome leghudi idogna kmagnare

¹⁸ Mae Moses ne cheke eghu, “Jame kaisei mae au kaisei thugna mae ihei te theome leghudi idogna kmagna re, neuba repa ne purini ngau mana.

¹⁹ Idogna kmagna mae sitei igne na hatani tei mana ka hatimare mae lida rhegna grengatha gna namono igne mala fateni mana.

²⁰ Aonu repa mala cheke eghu ka hatimare mae lida igre, ‘Thumi ghepa igne patu gama fara nei tirogna leghu ghami ghepa eghu. Mana jojokei nomi sileni ghepa re, eghuteuna mana kaisei koꞌu thaviru toghei kolho.’

²¹ Eghume nabagna na maegna ka namono igne fada faleheni mana ka thina mala ghilei lehe mana. Ka puhi igne, ghotilo ginauna fahuhui puhi te diꞌa igne ke lamnami ghotilo. Aonu kate nomhini igne, naiknodi Israel igre ginauna mhaghu nodi fara.”

Keha vetula

²² Mae Moses ne cheke eghu, “Jame kaisei mae eni kaisei najafra te nabagna te lehe na, eghuteuna ghotilo aknu faleheni mana eghuteuna fagefe hagheni thinigna mana na ka kaisei gaju.

²³ Thini igne thosei gefeu ka gaju na jare ghilei rane. Ghotilo giugilui thinigna mana na ka narane tuanala. Naugna ihei te lehe ke kligna gaju na, God ginauna parani mana. Eghume, ghotilo mala giugilui thinigna mae ihei teke eni puhi te diꞌa na mala theome goigoni ghotilo glose teke tusu ari Lord ka ghotilo igne.”