Diutronomi 20 - Buka Blahi Ka Cheke Holo

Vetula eigna magra biꞌo

¹ Mae Moses ne cheke eghu, “Kate tei ghotilo te magra ka nomi naokare, ghotilo jame filodi kmana hose nei kmana chariot mala magra, nei kmana soldia salaꞌu ghami ghotilo. Nu ghotilo thosei mhaghudi mare, naugna Lord nomi God, mae ihei teke hata fajifla ghami ghotilo Ijep ia ginauna au balumi ghotilo.

² Aonu kate tarabana ghotilo te mala tei ka magra na, kaisei mae pris mala mei kegra ke ulumi ghotilo mala cheke ka nomi armi ghotilo na.

³ Mana ginauna cheke eghu, ‘Ghotilo maemi Israel fanomho mei ka nogu cheke iara igne! Gognarona ghotilo tarabana mala tei magra ka nomi naokare. Ghotilo thosei mhaghu ba ghatho peapea ba nanga nomi ba farikha ghami!

⁴ Naugna Lord nomi God ghotilo na ginauna tei balumi ghotilo mala magra balumi ghotilo ka nomi naoka re, eghuteuna mana ginauna togho ghami ghotilo mala uluni ghotilo magra tuana.’

⁵ “Aonu mae biꞌore ginauna cheke eghu ka mae soldiare, ‘Jame kaisei mae ka ghotilo horo kaisei suga majaghani, mare theome fablahi nga meu suga igne, te eghuna, mana ke pulo au tagna. Glahu lehe mana ka magra eghuteuna keha maei na teke fablahi teke au tagna na.

⁶ Eghuteuna jame ao ngala joꞌu ngau nagare grep na, nu mana theome ukli ngau ghegna sisi saro ulu na, te eghu na mana ke pulo ka namono. Glahu lehe ka magra eghuteuna keha maei na teke glealeꞌa ka sisigna na.

⁷ Eghuteuna jame kaisei mae paruhi ka kaisei gaꞌase, nu repa theome tolaghi ngau, te eghuna mana ke pulo ka namono. Glahu lehe ka magra eghuteuna keha maei na teke tolaghi ka gaꞌase igne.’

⁸ Eghuteuna goro mae biꞌo re ginauna jaola cheke eghu, ‘Jame gaoghathogna kaisei mae na glaꞌe soru ba mana mhaghu nogna, mana ke pulo ka namono. Glahula eni mana igne jaola glaꞌe soru gaoghathogna keha mae soldia na.’

⁹ Eghuteuna kate cheke te gnafa mare ka nodi mae soldia re, mare ne vavahi komandadi soasopai tothoghei soldia.

¹⁰ “Kate tei magra ghotilo ka kaisei namono biꞌo na, ulu lahu na ghotilo tusu ranghidi pharikeli.

¹¹ Jame te faꞌuveni mare nomi cheke ghotilo na te tothora ka ghotilo grengathagna namono na, naikno te gnafa te au ke lamnagna namono igne ginauna mala nomi naikno sneka ghotilo, eghuteuna ghotilo ginauna tangomana te huhurudi mare te mala edi nomi gloku ghotilo re.

¹² Nu jame tirodi au ka pharikeli naiknogna namono tuana te magnahaghei magra mare na, nomi soldia ghotilo are kegra faligohoni namono tuana mala magra.

¹³ Aonu kate snakre ghami ghotilo Lord nomi God te mala hata namono tuana na, ghotilo ginauna aknu falehe mae te gnafa ka namono tuana.

¹⁴ Nu ghotilo ginauna tangomana te hata goro gaꞌase, goro sua, buluka nei keha glepo eghu te au ka namono tuana. Ghotilo ginauna tangomana te tathaji nodi gobigna lepo nomi naoka ghotilo re, naugna Lord nomi God la tusu arihi ka ghotilo glepo igre.

¹⁵ Igne unha nate eni ghotilo ka naiknodi namono te khaba fara te au ke kosigna nomi glose ghotilo igne.

¹⁶ “Nu kate tei te hata ghotilo namono ka glose teke tusu ari Lord mala khotogna ghotilo teku igne, ghotilo aknu falehe naikno te gnafa nei gobigna lepo te tautagu te gnafa teure.

¹⁷ Ghotilo mala aknu falehe hui naikno ka vike igre: vikegna mae Het, nei vikegna mae Amoa, nei vikegna mae Kenan, nei vikegna mae Peris, nei vikegna mae Hivi, nei vikegna mae Jebus. Ghotilo kafe falehedi hui, jateula teke cheke ranghi ghami Lord ia eghu.

¹⁸ Jame te theo na, mare ginauna farirhiu ghami ghotilo mala leghudi ghotilo puhidi mare te diꞌa re mala tarai ka nodi god mare are. Eghuteuna jame te eghu ghotilo na, ghotilo ginauna eni nakhibo biꞌo ranghini Lord nomi God.

¹⁹ “Kate au faligohoni te magra ghotilo ka kaisei namono na, ghotilo kato soru gaju mala hata paꞌe soru gringni thina biꞌogna namono tuana, nu neuba ghotilo ne au raugha jare, ghotilo thosei kato soru gaju te au sisidi re eghu. Naugna gaju igre theome naoka ranghi ghami ghotilo, eghume ghotilo tangomana te ghamu sisidi gaju igre.

²⁰ Ghotilo ginauna tangomana te kato soru gaju te theo sisidi are, mala horo glepo mala magra, mala ghilei uluni ghotilo namono tuana.”