Diutronomi 19 - Buka Blahi Ka Cheke Holo

Namono mala poru

¹ Mae Moses ne cheke eghu, “Lord nomi God ghotilo igne, mana ginauna goigonidi naikno te au ka glose teke tusu ari mana ka ghotilo are. Eghuteuna ghotilo ginauna ngolhi fajifladi naiknore eghuteuna ghotilo hata nodi namono nei nodi suga teu mare re mala au jare.

^2-3 Ka narane tuana, ghotilo ginauna fofota glose igne ka thilo nohi. Aonu ghotilo mala vavahi thilo namono mala poru. Nohi te gnafa ka thilo nohi igre au kaisei namono mala poru. Ghotilo lase fakelini igne, namono mala poru igre au farihotei nohi. Ka puhi igne, jame ihei te aknu faleheni kaisei mae na, mana ginauna tangomana te rikha te tei poru ka kaisei ka thilo namono igre.

⁴ “Jame kaisei mae theome ghathoni te mala diꞌatagna na nei theome ghathoni kolho te mala aknu faleheni keha mae na, nu keha mae igne lehe teuna, ghotilo snakreni mae igne rikha tei mala poru ka kaisei ka thilo namono igre.

⁵ Kaisei cheke naba, jame kaisei mae balu kheragna, phiamare nolo tei mata mala uge gaju. Eghuteuna mae igne kato soru kaisei gaju, aonu nogna nhirama mana na snamhu flada tei kahini mae kheragna mana na aonu mala lehe ka narane tuana. Te eghu na, mae igne tangomana te rikha te tei poru ka kaisei namono mala poru, mala karha jare.

⁶ Jame kaisei namono kolho ghotilo te mala poru na, eghuteuna khaba fara te mala ghosei te tei thoke ka namono mala poru igne, kheragna mae te lehe igne na hironi mae igne ghilei thokeni mana. Eghuteuna ke tughu fapulo glehe igne naugna mana thono diꞌatagna fara. Nafnata puhi igne theome doglo, naugna mae igne theome ghathoni te mala diꞌatagna na nei theome ghathoni kolho te mala faleheni mae kheragna na.

⁷ Naugna igne iara cheke faheta ka ghotilo mala vavahi thilo namono mala poru.

^8-9 “Jame te leghudi ghotilo gobigna lepo te chekedi iara ka ghotilo gognaro igre, eghuteuna ghotilo namhani Lord nomi God, nei leghudi ghotilo nogna vetula mana re teuna, mana ginauna tuthugha tei krepa biꞌo nomi glose ghotilo igne jateula teke cheke ranghidi mana kuꞌemi ghotilo tifa ra eghu, eghuteuna mana neke tusu ari ka vido te gnafa ka glose teke nhaꞌa chekedi mana ka ghotilo ra. Eghume kate biꞌo te krepa nomi glose ghotilo igne na, ghotilo ginauna vavahi thilo namono mala poru.

¹⁰ Ghotilo eni igne, naugna glahu mae ihei teke theome eni kaisei najafra na fiti lehe kolho naugna namono mala poru igre khaba fara. Jame mae te doglo na lehe ka glose teke tusu ari Lord nomi God mala khotogna ghotilo teku na, ghotilo nabami te papara ka glehegna mae igne.

¹¹ “Nu jame kaisei mae theome keli ranghini keha mae na, eghuteuna leghuni gaoghatho te diꞌa na ne magrini nei faleheni eghu mana teuna, aonu mana rikha tei ka kaisei namono mala poru igre.

¹² Jame te eghu na, hatimare mae mala baubatu ka namono di mare na fatei cheke mala ke pulo mei mana. Aonu mare snakre laoni mana ka kheragna mae ihei te lehe igne mala ke tughu fapulo glehegna mana na.

¹³ Ghotilo thosei kokhoni ni nafnata mae igne. Mae te diꞌa igne mala lehe, eghume ghotilo maemi Israel igre theome naba te mala papara ka unha te eni kate faleheni mae ihei te doglo na. Ka puhi igne ghotilo ginauna tangomana te au ka nakarha te keli.”

Puhi te mala eni puhi te doglo na

¹⁴ Mae Moses ne cheke eghu, “Ka glose teke tusu ari Lord nomi God mala khotogna ghotilo teku igne, ghotilo ginauna thosei tuthugha thina teke lilisei kuꞌemi ghotilo ra fagaglana eigna fofotagna nohigna nodi vido glose kherami ghotilo are.”

¹⁵ Aonu mae Moses ne cheke eghu, “Ghotilo theome tangomana te fateni ihei jame te kaisei witnes kolho te chekeni najafragna mana na. Phei ba thilo mae te mala witnes ka najafra teke eni mana na ame fateni nga ghotilo mana eghu.

¹⁶ “Jame kaisei mae vuavuha cheke eigna keha mae na mala goigonini mana,

¹⁷ te keli na phiamare kafe tei ka nogna vido blahi Lord. Jare phiamare mala mei ka mae pris nei ka mae mala fate teu te loku ka narane tuana.

¹⁸ Mare te mala fifilo fakeli ka puhi biꞌo igne. Jame laseni mare te mae igne chaghi mala goigonini mae kheragna na teuna,

¹⁹ ghotilo ginauna parani mana ka nafnata puhi te magnahagheni mana teke parani keha mae na. Ka puhi igne, ghotilo ginauna hata fadelei ke lamnami puhi te diꞌa igne.

²⁰ Eghuteuna kate nomhini keha naiknore puhi igne, mare ginauna mhaghu, eghuteuna theo kaisei naikno ginauna nate eni glepo te diꞌa te chaghini kheragna na ka fate igne.

²¹ Ghotilo thosei kokhonini ihei te chaghi ka fate te mala goigonini keha mae na. Nafnata papara te magnahaghei eni mana ka keha mae na igne, ghotilo mala parani mana ka nafnata puhi teke enila mana na. Eghume, ghotilo mala hata tathagna, kheꞌigna, khamegna, gahegna, nei nakarhagna eghu naikno tuana nabagna unha teke eni mana na.”