Diutronomi 16 - Buka Blahi Ka Cheke Holo

Gaghamu Ghasa-Polho

¹ Aonu mae Moses ne cheke eghu, “Leuleghu finogha, ka nhigra Abib, ghotilo ei Gaghamu Ghasa-Polho. Ghotilo eni gaghamu igne, naugna kaisei bongi ka nhigra Abib, Lord, nomi God ghotilo na neke hata fajifla ghami ghotilo Ijep.

² Eghume ghotilo tei ka vido blahi aheva Lord vahini te mala falelehe ghotilo kaisei sipu ba nanigot ba buluka mala fafara ka Lord, nomi God.

³ Eghuteuna kate ghamu ghotilo gaghamu igne, ghotilo ghamu bret te theo isi gna na. Ka fitu narane igre ghotilo ghamu bret te theo isi tagna na. Igne unha teke ghamu tahati kani teke papara fara teke ghosei teke jifla Ijep. Ka puhi igne ghotilo tangomana te ghathoni fabrahu nakarhami ghotilo ka narane teke jifla ghotilo Ijep.

⁴ Ka fitu narane gaghamu tuare, blahi ranghini ihei te hata isi ke lamnami ghotilo na. Nafnahi te fafara ghotilo ka grafigna narane ulu lahu na, ghotilo thosei tokiu ghilei hamerane ka keha narane na.

⁵ “Ghotilo thosei fiti fafara tafri Gaghamu Ghasa-Polho igne ka namono teke tusu ari Lord nomi God ka ghotilo are.

⁶ Ghotilo mala fafara kolho ka vido blahi aheva Lord nomi God teke vahini te mala au nanghagna mana na. Ka vido blahi igne, ghotilo mala fafara ka vido narane te plulu naprai na, naugna tuana te doglo ka narane teke jifla tahati Ijep.

⁷ Ghotilo gahu nafnahi igne ghamu ka vido blahi teke vahini Lord nomi God. Aonu hamerane ka keha narane na ghotilo tangomana teke figri teke pulo ka nomi suga tapuale re.

⁸ Nabagna keha namno narane ka gaghamu na ghotilo mala ghamu bret te theo isi gna na. Aonu ka fafitu narane na, ghotilo mala ghamu fodu mala kilo fnaknoni Lord, nomi God. Eghuteuna ka narane tuana ghotilo thosei loku.”

Narane biꞌodi Fitu Wik

⁹ Mae Moses ne cheke eghu, “Funu ka narane te funu hata gano ghotilo ka nagare, ghotilo mala kaha fitu wik.

¹⁰ Aonu ka narane ululahu gna fahana gna wik, ghotilo ei Gaghamu biꞌo nabagna Fitu Wik. Ka narane biꞌo igne, ghotilo mala hata mei ka Lord leghuni unha ghotilo te magnahagheni. Unha te hata mei ghotilo na naba te leghudi glepo teke fablahi ghami Lord.

¹¹ Ghotilo balu thumi, nomi mae gloku nei gaꞌase gloku, nei mae Livaet ka namonomi ghotilo ra, maedi delei te au balumi ghotilo ra, goro sua glehe kokoi ra, goro naikno biꞌo ra, ghotilo te gnafa na kafe tei mala glealeꞌa ka vido blahi aheva Lord teke vahini te mala au nanghagna na.

¹² Ghotilo ke ghatho fapulodi narane teke au sneka Ijep ra, eghume ghotilo mala thofno leghudi vetula igre.”

Narane biꞌo te mala Au ka Grorofe Ikoi

¹³ Mae Moses ne cheke eghu, “Leuleghu fata kate gnafa gloku ghotilo ka nagare na, nei hata keha sisi grep ka nagare na teuna, ghotilo ei Gaghamu biꞌo te mala Au ka Grorofe Ikoi na. Gaghamu biꞌo igne nabagna fitu narane.

¹⁴ Ghotilo balu thumi, nomi mae gloku, nei gaꞌase gloku, nei mae Livaet te au ka namonomi ghotilo are, nei naiknodi delei te mei au balumi ghotilo are, nei goro sua glehe kokoi, nei goro naikno biꞌo te au ka namonomi ghotilo are, ghotilo te gnafa na mala kafe tei mala thofno glealeꞌa ka gaghamu igne.

¹⁵ Ka fitu narane te glealeꞌa ghotilo ka gaghamu biꞌo te eni ghotilo ka vido blahi te vahini Lord igne. Ghotilo tangomana te glealeꞌa na naugna Lord, nomi God neke fablahidi nomi nagare nei nomi gloku teu ghotilo re. Ka narane te eghu igre ghotilo ginauna thofno glealeꞌa nomi fara.

¹⁶ “Leuleghu finogha, ghotilo mae nalhaꞌu te gnafa Israel ra ghotilo mei thilo fata ka vido blahi teke vahini Lord igne. Thilo fata igre, Gaghamu Ghasa-Polho na, nei Narane biꞌodi Fitu Wik, nei mala Au ka Grorofe Ikoi teuna. Ka thilo gaghamu igre, theome tangomana kaisei naikno te fiti sasama te mei na.

¹⁷ Naikno te gnafare mala kafe hata mei unha te tangomana leghuni fablahi teke tusu ranghi ghami Lord, nomi God.”

Mae mala fate

¹⁸ Aonu mae Moses ne cheke eghu, “Ghotilo ginauna vavahi keha mae mala fate, eghuteuna keha mae mala mae biꞌo ka namono te gnafa aheva nate tusu ari Lord ka ghotilo na. Mae igre mala fatedi gobigna lepo ka puhi te doglo ka fate na.

¹⁹ Mare mala theome leghuni puhi te theome doglo na. Mare theome mala phile baludi keha mae kolho. Mare theome mala snakreni ihei mala famaemaheni kaisei naikno mala hata sileni ka mana, naugna puhi te famaemahe igre tangomana te fadofuni mae mala fate neuba mana ne mae glalase, eghuteuna mae mala fate ginauna theome cheke fadoglo ka kot.

²⁰ Leuleghu fata na ghotilo mala eni puhi te doglo na ka naiknore. Jame te eghu ghotilo na, ghotilo ginauna tangomana te khotogna glose teke tusu ari Lord ka ghotilo ana, eghuteuna ghotilo ginauna au raugha tagna.

²¹ “Kate eni ghotilo nogna olta Lord na, ghotilo thosei ke eni ka thaba mumuju gna god gaꞌase Astarot igne mala fakegra haghe rhegna nogna olta Lord igne.

²² Eghuteuna ghotilo mala thosei fakegra haghe kaisei mumuju thina, naugna Lord nomi God tirognadi fara nafnata mumuju igre.”