Diutronomi 15 - Buka Blahi Ka Cheke Holo

Vetula mala kaoni

¹ Mae Moses ne cheke eghu, “Leuleghu fata ka fafitu finogha na, ghotilo ghiha koko kaoni are.

² Igne puhi te mala eni ghotilo na, jame kaisei mae kheramu iagho kaoni ka iagho, iagho ghatho ihoni kaoni tuana, naugna nogna narane Lord te mala ghiha koko kaoni na la thoke meihi.

³ Te mala ghiha koko kaoni igne maladi kolho maedi Israel, theome naiknodi delei te mei au balumi ghotilo are.

^4-6 Ghotilo mala thofno leghuni Lord, nomi God, eghuteuna ghotilo leghudi cheke te gnafa te tusu ari iara ka ghotilo gognaro igre. Jame te leghudi ghotilo unha te chekedi iara ka ghotilo igre na, Lord ginauna tangomana te fablahi ghami ghotilo ka glose teke tusu ari mala khotogna ghotilo teku igne. Eghuteuna ginauna theo kaisei ka ghotilo nate kuma na. Eghuteuna jame te leghudi ghotilo cheke igre na, Lord ginauna fablahi ghami ghotilo jateula teke nhaꞌa chekeni hi mana ia eghu. Eghume naiknodi keha kantri are ginauna tore kaoni ka ghotilo, nu ghotilo thosei tei kaoni ka ihei nga. Keha kantri are ginauna au ke parigna nomi nolaghi ghotilo na, nu theo kaisei ka keha kantri are nate au nodi nolaghi ke klignami ghotilo ginauna.

⁷ “Kate tei te au ghotilo ka glose teke tusu ari Lord nomi God ka ghotilo na, jame kaisei kherami ghotilo ka namonomi na kmoꞌe ka glepo, ghotilo thosei hongo ghami ka mana, eghuteuna thosei thodo te toghoni na.

⁸ Nu ghotilo mala keli ranghini nei glealeꞌa te tusu lao kaoni tagna ka kaisei glepo te magnahagheni mana na.

⁹ Ghotilo thosei au gaoghatho te diꞌa nei tiromi te tusu lao kaoni ka ihei nga eghu naugna fafitu finogha te mala ghiha koko kaoni na la namohi. Ghotilo thosei snakreni gaoghatho ghamu nhoto tuana mala tiromi toghoni kherami te au ka puhi biꞌo na. Naugna jame te theome toghoni ghotilo mana na, mana ginauna tanhi lao ka Lord, eghuteuna Lord ginauna ghathoni te ghotilo nabami te au papara eigna igne.

¹⁰ Ghotilo glealeꞌa eghuteuna thosei thodo te toghoni ihei te kuma. Eghuteuna jame te eni ghotilo igne na, Lord ginauna fablahi ghami ghotilo ka gobigna lepo te edi ghotilore.

¹¹ Naikno te kuma igre ginauna au fabrahu ke lamnadi nomi glose ghotilore. Naugna igne te chekeni iara ka ghotilo te mala glealeꞌa te mala thofno toghodi kherami maedi Israel te kmoꞌe ka glepo igre.”

Vetula eidi naikno te sneka

¹² Aonu mae Moses tudu ne cheke eghu, “Jame kaisei ka ghotilo Hibru, nalhaꞌu ba gaꞌase sabirini thegna ka ghotilo mala nomi sneka ghotilo. Kate salaꞌu namno finogha teke loku ranghi ghami ghotilo na, ghotilo ginauna theome tangomana teke loku fapuloni na. Ka fafitu finogha na, ghotilo snakreni naikno gloku igne mala snagla ke tei nogna.

¹³ Eghuteuna kate snakre teini iagho na, iagho thosei fiti kuru teini kolho, iagho tusu ranghini keha nogna glepo.

¹⁴ Iagho kubae namha ranghini sipu, nei gano, nei waen. Tusu ranghini kmana glepo jateula te eni Lord, nomi God teke fablahi ghami balu kmana glepo ra eghu.

¹⁵ Ghotilo ke ghathodi narane teke sneka ghotilo Ijep ra eghuteuna Lord nomi God neke hata fajifla ghami ka khamegna Fero, king gna Ijep. Naugna igne teke cheke faheta iara ka ghotilo gognarogne.

¹⁶ “Nu jame kaisei nomi naikno sneka ghotilo cheke eghu, ‘Iara tirogu tei koko nigho iagho naugna iara namha nigho iagho baludi tharaknamu iagho gne, eghume te keli na iara na au balumi ghotilo.’

¹⁷ Jame te eghuna, iagho hatani tei ka grengathagna suga na, eghuteuna iagho hata nila, aonu iagho huta nila igne churu ka khuligna tei posa ka grengatha na. Ka puhi igne mana ginauna nou naikno gloku iagho fabrahu ka nakarhagna na. Eghuteuna iagho jaola eni igne ka nou gaꞌase gloku na.

¹⁸ “Nu jame iagho snakre teini kaisei nou naikno gloku, iagho thosei diꞌanagnafa. Iagho snakreni mala snagla tei nogna naugna namno finogha teke loku ranghi nigho iagho ra, tabagna gloku igne vidogna ka unha te nabagna te mala foli mana eigna unha teke eni mana na. Jame te edi ghotilo glepo igre, Lord, nomi God ginauna fablahidi nomi gloku ghotilore.”

Fafara buluka teke kulu karha

¹⁹ Mae Moses tudu ne cheke eghu, “Kaisei buluka nalhaꞌugna teke kulu karha, ba nanigot, ba nomi sipu ghotilo, ghotilo fablahidi naugna nogna Lord, nomi God ghotilo. Ghotilo ginauna thosei hata kaisei buluka teke kulu karha mala loku, eghuteuna ghotilo thosei kuchi khaklagna kaisei sipu teke kulu karha.

²⁰ Aonu leuleghu finogha kate tei ghotilo balu tharaknami ka vido blahi aheva teke vahini Lord nomi God igne, ghotilo mala fafara nei ghamu eghu gano igre jare.

²¹ Nu jame kaisei buluka ba kaisei sipu ba dongki diꞌa ghahegna na, ba dofu tathagna na, ba au keha nafnata khabru tagna, ghotilo thosei fafara ka Lord, nomi God.

²² Nafnata glepo tautagu te diꞌa igre ghotilo tangomana te hata tei ghamu ka nomi namonore, jateula te ghamu ghotilo glepo ka namhata ra eghu te kilodi gasele ba deer. Neuba ghotilo ne klino ka tathagna Lord ba theo, ghotilo te gnafa na tangomana te ghamu glepo igre.

²³ Nu ghotilo thosei ghamu dadaradi glepo tautagu igre, ghotilo totofa koko dadara igre.”