Diutronomi 14 - Buka Blahi Ka Cheke Holo

Vetula mala kokhoni ni ihei te lehe

¹ Mae Moses ne cheke eghu, “Ghotilo thugna Lord nomi God. Eghume kate lehe kaisei naikno na, ghotilo thosei vahe thinimi themi are, ba ghoighori khakla ka greremi are eigna te lehe naikno na.

² Ghotilo thosei diꞌanagnafa, jateula keha naikno te leghudi keha nafnata god delei ra eghu. Naugna ghotilo nogna naikno blahi Lord nomi God. Eghuteuna Mana neke vahi fadelei ghami ka keha naikno te gnafa ka nauthoglu igne mala nogna naikno mana kolho.”

Nafnata gano te naba te mala ghamu naikno na

³ Aonu mae Moses ne cheke eghu, “Ghotilo thosei ghamu kaisei gano te thono diꞌa fara.

⁴ Igre gano naba te mala ghamu ghotilo re: buluka, nei sipu, nei nanigot,

⁵ nei deer, nei sipu mata, nei nanigot mata.

⁶ Ghotilo tangomana te ghamu glepo te tautagu te fnota pea thatabladi re, eghuteuna ghamu buburu jateula buluka eghu.

⁷ Nu nafnata glepo te tautagu jateula kamel, nei gauha te au ka thina, nei rabet, neuba glepo igre ne ghamu buburu jateula buluka neu, nu thatabladi re theome fnota pea, eghume glepo igre blahi te mala ghamu ghotilo na. Nafnata glepo te tautagu igre theome klino ka tathagna Lord.

⁸ Eghuteuna ghotilo thosei ghamu bosu, eigna bosu na thona ka tathagna Lord na. Neubane fnota thatablagna ka phei vido, bosu na theome ghamu buburu jateula buluka eghu. Ghotilo thosei ghamu nafnahidi nafnata glepo te tautagu igre ba habodi thinidi te lehe re.

⁹ “Eghuteuna ghotilo tangomana te ghamu sasa te au sekudi nei khapudi teu are.

¹⁰ Blahi te ghamu ghotilo glepo te karha te au ke lamna thongna te theome au sekudi nei khapudi teu are, naugna theome gae ka tathagna Lord.

¹¹ “Ghotilo tangomana te ghamu nanghaji te gae ka tathagna Lord.

^12-18 Nu igre nafnata nanghaji te blahi te mala ghamu ghotilo re: Gaghata, saroko, thua nafnata nakrudu, thua nafnata jopla, thua nafnata khopi nei thua nafnata nasihe.

¹⁹ “Keha nanghaji te au baghidi te tagu pari ke kligna glose igre theome gae ka tathagna Lord, eghuteuna blahi te mala ghamu ghotilo na.

²⁰ Nu keha nanghaji te au baghi te gae ka tathagna Lord na, ghotilo tangomana te ghamu na.

²¹ “Ghotilo thosei ghamu buluka ba unha te filoni ghotilo tela lehehi thegna na. Ghotilo tangomana te tusu lao glepo igne ka maedi delei te mei au balumi ghotilo are mala ghamu mare, ba ghotilo tangomana te sabiri ka naiknodi keha kantri are. Ghotilo eni igne naugna ghotilo nogna naikno blahi Lord, nomi God. “Eghuteuna kate kuki ghotilo kaisei nanigot ikoi na, ghotilo thosei kuki ka milk gna idogna na.”

Fabothodi gobigna lepore

²² Mae Moses tudu ne cheke eghu, “Ghotilo lisei fadelei fabothodi gano teke hata ghotilo ka nomi nagare are, ba sisidi gaju te joꞌu ghotilo are, ghotilo lisei fadelei malagna Lord.

²³ Hata fabothodi gano, nei waen, nei oel, nei sua teke kulu karha ka nomi buluka ghotilo re. Hata tei glepo igre ka vido blahi aheva Lord teke vahini. Jare te mala ghamu ghotilo glepo igre ke ulugna Lord, nomi God. Ka puhi igne ghotilo ginauna laseni unha te magnahagheini mana na.

²⁴ Keha fata jame ninhigrana te mala hata te tei glepo igre naugna vido blahi aheva te au nanghagna Lord na khaba fara, ba naugna Lord neke fablahidi nomi nagare ghotilo re balu kmana gano.

²⁵ Jame te eghu na, ghotilo sabiri fabothodi nomi gobigna lepore, eghuteuna ghotilo hata tei sileni gna na ka nogna vido blahi Lord.

²⁶ Aonu ghotilo hata sileni igne mala foli buluka, ba sipu, ba waen, ba beer, ba keha nafnata ganoi. Eghuteuna ghotilo te gnafa baludi tharaknami are tangomana te ghamu nei glealeꞌa eghu ka vido blahi te au Lord nomi God.

²⁷ Eghuteuna ghotilo thosei ghatho ihodi vikegna mae Livae te au balumi are, naugna mare theome khotogna kaisei vido glose te mala tobi nagare na.

²⁸ “Ke leghudi thilo finoghare, ghotilo hata mei fabothodi gano ka nomi nagare are mala lilisei ka vido aheva te mala tathajidi teu ka nomi namono re.

²⁹ Ka puhi igne vikegna mae Livae te theo nodi glose igre ginauna tangomana te au ghedi gano na. Eghuteuna jaola naiknodi delei te mei au balumi ghotilo are, nei iheire te glehe kokoi, nei goro naikno biꞌo tela lehehi khetodire teu te au ka namonomi ghotilo are eghu tangomana te kafe mei ka vido igne mala hata gano te nabadi. Jame te eghu ghotilo na, Lord ginauna fablahidi nomi gloku te gnafa ghotilore.”