Diutronomi 12 - Buka Blahi Ka Cheke Holo

Vetula te mala leghudi naiknodi Israel kate au mare ka kantri Kenan Mare mala au kaisei vido blahi kolho

¹ Mae Moses tudu ne cheke eghu, “Gognarona iara na chekedi vetula nei farirhiu eghu te mala thofno leghudi fabrahu ghotilo ka glose Lord nodi God kuꞌemi ghotilo teke tusu ari ka ghotilo ra. Vetula igre:

² Kate ngolhi fajifladi ghotilo naikno teke au ka glose igne na, ghotilo mala goigoni fahui nodi vido blahi te gnafa nodi god mare te au ka thogele nei ka gukhu, nei ke pari gaju.

³ Ghotilo mala paꞌe sukha nodi olta re, eghuteuna goigoni nodi mumuju thina re. Eghuteuna ghotilo gnubra ka khaꞌaghi mumujugna god gaꞌase Astarot, eghuteuna kato sukha mumujudi nodi god re. Eghuteuna ghiha koko nanghadi nodi god re ka vido tuare mala theome tangomana kaisei naikno na teke ghathodi re.

⁴ “Ghotilo thosei leghudi puhidi naikno bongihehe te au ka glose tuana kate pogho soruni ghotilo Lord nomi God na.

⁵ Nu ghotilo mala filoni kaisei vido blahi kolho aheva Lord nomi God nate vahini te mala au fabrahu nanghagna mana na jare eghuteuna ghotilo mala ghatho tahuni nanghagna mana na. Ka vido blahi tuana kolho

⁶ ghotilo nate hata te mei unha te mala fafara na. Fafara te thofno krono nei keha nafnata fafara la ngau, nei kaisei nomi fabotho re, nei nafnata fafara te nheta eigna nhaꞌa cheke, nei keha nafnata fafara te edi ghotilo leghuni unha te magnahagheni ghotilo, nei nomi sua buluka te karha ulu.

⁷ Ka vido blahi tuana, ghotilo baludi tharaknami re tangomana te mei ke ulugna Lord nomi God. Jare ghotilo tangomana te ghamu gano te keli mala glealeꞌa ka gobigna lepore, naugna mana neke fablahidi nomi gloku ghotilo re.

^8-9 “Gognarona ghotilo theome tei posa ngau ka glose teke tusu ari Lord ka ghotilo igne. Glose igne nate au fakeli ghotilo tagna ginauna. Eghume gognarona tahati mala fafara leghudi noda gaoghatho theda re. Nu kate tei posa ghotilo ka glose igne na, ghotilo ginauna theome tangomana na teke fafara jateula te edi ghotilo gognarogre teuna.

¹⁰ Ghotilo ginauna tei kasa ka Khoꞌu biꞌo Jordan mala thofno au fabrahu ka glose aheva Lord nomi God teke tusu ari mala khotogna ghotilo teku na. Eghuteuna mana ginauna togho ghami ghotilo mala au muana nei theome nangadi nomi naokare.

¹¹ Aonu ghotilo mala tei hata mei gobigna lepo teke chekedi re ka kaisei vido blahi kolho aheva Lord nomi God teke vahini te mala au nanghagna na jare. Ka vido blahi tuana kolho, te tangomana ghotilo hata te mei glepo teke chekedi iara ka ghotilo ra. Igne fafara te thofno krono na, nei keha nafnata fafara langau eghu, nei kaisei ka fabothodi nomi glepo re, nei kaisei nomi glepo te keli teke nhaꞌa cheke ghotilo te mala tusu lao ka Lord.

¹² Ka vido blahi tuana ghotilo tangomana te glealeꞌa ke ulugna Lord. Ghotilo baludi thumi nalhaꞌu nei thumi gaꞌase, nei nomi mae gloku teure, ghotilo te gnafa na tangomana te glealeꞌa jare na. Eghuteuna ghotilo mala edi vikedi mae Livaet te au ka nomi namono ghotilo are mala mei glealeꞌa balumi ghotilo jare, naugna mare theo nodi glose thedi.

^13-14 Lord ginauna vavahi kaisei vido blahi kolho ka nogna glose kaisei vike ka ghotilo. Eghume ghotilo filo ghami thosei gahu fafara ka kaisei vido aheva ghotilo te magnahagheini. Ghotilo mala gahu nomi fafara re ka vido blahi tuana kolho, eghuteuna jare ghotilo mala jaola edi keha glepo blahi teke chekedi iara ka ghotilo ra.

¹⁵ “Nu kate magnahaghei aknu falehe ghotilo kaisei buluka ba sipu te mala ghamu na, ghotilo tangomana te aknu falehe ka vido aheva te au ghotilo tagna na. Jame Lord nomi God tusu ari kmana buluka ba sipu ka ghotilo, ghotilo tangomana te ghamu nafnahidi re jateula ghotilo te ghamu nafnahidi glepo tautagu ka namhata na are eghu. Ghotilo te gnafa na tangomana te ghamu nafnata nafnahi igne, neuba ghotilo ne klino ka tathagna Lord na ba ghotilo theome klino, naugna theome nafnahi neke fafara.

¹⁶ Nu ghotilo ginauna thosei ghamu dadaradi glepo te tautagu igre. Ghotilo tofa tei dadara igre ka glose.

¹⁷ Gobigna lepo te tufa ghotilo ka Lord igre, ghotilo thosei ghamu ka sugami re. Neubane kaisei ka fabothodi gano ba waen ba oel, eghuteuna neubane sua karha ulu ka nomi glepo te tautagu ghotilo, ba fafara eigna kaisei nhaꞌa cheke, ba kaisei fafara te eni ghotilo leghuni unha te magnahagheni ghotilo na, ba keha fafara la ngau, gobigna lepo jateula igre teuna blahi te ghamu ghotilo ka sugami re.

¹⁸ Ghotilo baludi thumi nei nomi mae gloku nei vikegna mae Livae te au balumi ghotilo are eghu, ghotilo te gnafa na ginauna mala ghamu glepo blahi re ke ulugna Lord ka vido blahi teke vahini mana na. Jare ghotilo tangomana te gleꞌa ka gobigna lepo te edi ghotilo re.

¹⁹ Eghuteuna kate au ghotilo ka glose igne na, ghotilo ginauna thofno reireghi fakelidi vikegna mae Livae.

²⁰ “Kate togho ghami Lord nomi God te krepa nei biꞌo teu nomi glose ghotilo igne jateula te nhaꞌa chekeni mana na teuna, jau ghotilo magnahaghei fara te ghamu nafnahi na. Jame te eghu na, ghotilo tangomana te ghamu nafnahi leghuni unha te magnahagheni ghotilo na.

²¹ Jame vido blahi teke vahini Lord nomi God te mala lilisei nanghagna mana igne na au delei fara ka ghotilo, ghotilo tangomana te au teu ka nomi namonore kate aknu falehe ghotilo buluka nei sipu eghu teke tusu ari Lord ka ghotilo ra. Eghuteuna ghotilo tangomana te ghamu nafnahi igne ka nomi namonore, jateula teke chekenihi iara ka ghotilo ia eghu.

²² Ghotilo tangomana te ghamu nafnahi tuana jateula te ghamu ghotilo nafnahidi glepo te tautagu ka namhata ra eghu. Ghotilo te gnafa na tangomana te ghamu nafnata nafnahi igne, neuba ghotilo ne klino ka tathagna Lord na ba ghotilo theome klino.

²³ Nu ghotilo thosei koꞌu dadara, naugna nakarhagna glepo te tautagu igne au ka dadaragna na, eghuteuna blahi te ghamu nafnahi te au teu karha tagna na.

²⁴ Eghume ghotilo thosei koꞌu dadaragna glepo tautagu igne. Nu ghotilo totofa dadara igne jateula khoꞌu eghu ke kligna glose.

²⁵ Eghuteuna kate theome koꞌu ghotilo kaisei dadara na, ghotilo thofno leghuni unha te doglo ka tathagna Lord, aonu mana ginauna edi gobigna lepo igre thofno keli fara ka nakarhami ghotilore nei ka nakarhadi thumi ghotilore eghu.

²⁶ “Hata tei glepo teke fablahi ghotilo igre nei glepo teke nhaꞌa chekehi ghotilo mala tusu ranghini Lord tekura, ghotilo hata tei ka vido blahi aheva teke vahini Lord nomi God.

²⁷ Ka vido blahi igne kolho, ghotilo ginauna tangomana te hata te mei fafara te thofno krono na ke kligna gna nogna olta Lord nomi God. Eghuteuna keha nafnata fafara te edi ghotilo ra, ghotilo tangomana te ghamu nafnahigna na, nu dadaragna na, ghotilo tofa soru ke kligna olta.

²⁸ Fiofilo ghami te mala leghudi vetula te chekedi koba iara ka ghotilo ra. Jame te leghudi ghotilore, ghotilo thofno eni unha te doglo ka tathagna Lord na, eghume mana ginauna edi gobigna lepore thofno keli fara ka nakarhami ghotilore nei ka nakarhadi thumi ghotilore eghu tifa tifa.”

^29-30 Mae Moses ne cheke eghu, “Lord nomi God ghotilo igne ginauna tei ke ulumi ghotilo mala goigonidi nei mala ngolhi fajifladi eghu naikno te au ka glose te mala tei hata ghotilo igne. Nu kate goigonidihi Lord eghuteuna ghotilo ngolhi fajifla mare te auhi ka glose igne, ghotilo fiofilo ghami eghu, glahu ghusnadi ghotilo nodi god mare re. Jame ghotilo ghusna eghu tafri, ‘Faꞌunha eghu si naikno igre te tarai ka nodi god rea? Tahati ginauna leghuni puhidi mae igre.’ Te eghu na, ghotilo ginauna snoꞌo ka nodi phighoro mare na.

³¹ Ghotilo thosei leghudi puhidi mare re kate pogho soruni ghotilo Lord nomi God. Naugna kate pogho soru mare ka nodi god re, mare edi glepo te thono diꞌa fara te tirognadi fara Lord. Ghotilo laseni, mare gahu thudire mala fafara ka nodi god re.

³² “Eghume, ghotilo mala edi gobigna lepo tela chekedihi iara ka ghotilo ra. Ghotilo thosei ke nhaꞌa lao keha chekei, eghuteuna ghotilo thosei ke hata koko kaisei cheke tagna.”