Diutronomi 11 - Buka Blahi Ka Cheke Holo

Mare mala namhaniLord

¹ Mae Moses ne cheke eghu, “Ghotilo mala namhani Lord nomi God nei leghudi fabrahu nogna vetula, nogna farirhiu nei nogna cheke teu mana ka ghotilo igre.

² Gognarona ghotilo mala ghathodi thumi ghotilo teke theome lasedi nei haimidi teku unha teke edi Lord nomi God. Mare neke theome filodi nogna nolaghi nei nogna nanheta nei ka khamegna te nolaghi eghu teke uludi mana nogna naoka re.

³ Eghuteuna mare neke jaola neke theome filodi kofubobhoi nei glepo biꞌo eghu teke edi mana ka king gna Ijep nei ka nogna naikno te gnafa.

⁴ Eghuteuna thumi ghotilo gre neke theome filoni puhi teke eni Lord teke goigonihi armigna Ijep kani teke ngolhi ghami ghotilo mare ra. Ghotilo kolho teke filoni Lord teke goigoni ni armi gna Ijep igne balu hose nei nogna chariot mala magra king, eghuteuna mana neke fakmerhudi ke lamna Thongna Ukru.

⁵ Thumi ghotilo re theome lasedi, nu ghotilo kolho lasedi glepo teke edi Lord ka ghotilo ke lamna namono nagou ghilei mei posa ghotilo agne.

⁶ Thumi ghotilo gre theome filoni unha teke eni mana ka mae Dotan ghe mae Abiram, phei thugna mae Eliab vikegna mae Ruben, nu ghotilo naiknodi Israel filoni glose na neke thora na, eghuteuna phiamare balu nodi tharakna, nei nodi suga tapuale, nei nodi gobigna lepo fateote'o te karha re eghu ne snoꞌo pari lamna glose.

⁷ Nu ghotilo neke thofno filo tathami gobigna lepo te biꞌo teke edi Lord ra.”

Glepo te keli te au ka glosegna Kenan

⁸ Mae Moses ne cheke eghu, “Ghotilo mala leghudi vetula te tusu ari iara ka ghotilo gognaro gre, ka puhi igne ghotilo ginauna au nomi nolaghi te mala hata glose kate kasa ghotilo ka Khoꞌu biꞌo Jordan.

⁹ Eghuteuna ghotilo ginauna tangomana te au raugha ka thofno glose te keli teke nhaꞌa cheke Lord ka kuꞌemi ghotilo ra nei ka ghotilo vikedi mare ra.

¹⁰ Glose nate tei ghotilo tagna te hata igne, theome jateula glose Ijep te jifla kokoni ghotilo ia eghu. Jare na, leuleghu narane na ghotilo gloku biꞌo fara kate pala khoꞌu te tei lilisei ka nomi nagare re.

¹¹ Nu glose nate tei kasa ghotilo ka Khoꞌu biꞌo Jordan te hata igne, au gukhu nei glogu, eghuteuna leuleghu fata na nakhete fabrahu mala karha gano.

¹² Lord nomi God ghotilo igne mana reireghi fakelini glose igne. Leuleghu narane na mana filo tongana ni, funu ka vuvuhagna finogha na tei posa ka gnafagna finogha na.

¹³ “Jame te leghudi ghotilo vetula te tusu ari iara ka ghotilo gognarogne, eghuteuna ghotilo mala namhani Lord nomi God nei loku ranghini mana ka nagnafami fateote'o nei ka gaoghathomi fateote'o,

¹⁴ jame te eghu ghotilo na, mana ginauna kuru mei nakhete ka nomi glose ghotilo gne ka thofno naranegna na. Uve, famane nakhete ginauna mei ka narane te mala kaikaliti joꞌu nagare, nei ka narane mala famane kotu gano. Ka puhi jateula igne teuna ghotilo ginauna au ghemi kmana gano, nei waen, nei oel mala kuki.

¹⁵ Eghuteuna ghotilo ginauna au kmana buburu mala ghamu ghedi nomi glepo tautagu te oho ghotilo are. Eghume, ghotilo ginauna au ghemi gano te gnafa te magnahaghedi ghotilo re.

¹⁶ “Nu filo fakeli ghami eghu, glahu chaghi ghami keha mae mala figri tagruni Lord, eghuteuna loku ranghidi nei pogho sorudi eghu keha god delei.

¹⁷ Jame te eghu ghotilo na, Lord ginauna diꞌatagna fara ka ghotilo, eghuteuna mana ginauna theome snakreni nakhete na, aonu nomi vido glose ghotilo re ginauna khapra eghuteuna theo kaisei glepo nate kotu tagna na. Eghuteuna neuba glose teke tusu ari Lord ka ghotilo igne ne thofno keli fara, nu ghotilo ginauna theome raugha lehe tagna.

¹⁸ “Ghotilo mala iju polodi nei ghaoghathodi eghu nogu cheke iara igre. Ghotilo rioriso soru cheke igre, eghuteuna haru famaku jateula kaisei tuthuana eghu ka khamemi nei ka greremi teu are.

¹⁹ Farirhiudi thumire. Toutonu eidi glepo igre kate au teu ka suga, ba kate nolo ka nabrou, ba kate thuru, ba kate kegra haghe.

²⁰ Eghuteuna ghotilo mala rioriso ka phei khegradi nomi grengathadi suga re, nei ka grengathadi nomi namono re eghu.

²¹ Jame te eghu ghotilo na, ghotilo nei thumi re teuna, ghotilo te gnafa na ginauna tangomana te au raugha ka glose teke nhaꞌa chekeni Lord teke tusu ari ka kuꞌemi ghotilo tifa ra. Uve, ghotilo te gnafa na ginauna tangomana te au fabrahu jateula maloa te au fabrahu ke kligna nauthoglu igne eghu.

²² “Leuleghu fata na gaoghathomi ghotilore mala au rheta mala leghudi cheke te gnafa te tusu ari iara ka ghotilo gognarogne. Ghotilo mala namhani Lord nomi God, eghuteuna ghotilo mala leghudi puhigna mana re, eghuteuna ghotilo mala ghatho tahuni mana.

²³ Jame te thofno edi ghotilo igre na, neubane nheta ulu ghami ghotilo vikedi naikno te au ka glose igne, Lord ginauna ngolhi fajifladi kate tei magra ghotilo ka mare na.

²⁴ Aheva te tei tapla ghotilo tagna na, glose tuana nomi ghotilo. Nomi nohi ghotilo na ginauna funu ke mata namono nagou tei posa ke raru Thogele Lebanon, eghuteuna funu ke maghati Khoꞌu biꞌo Iufretis tei posa ke mosu Thongna Mediterenian.

²⁵ Eghuteuna kate tei ghotilo ka glose igne na, ginauna theo kaisei naikno nate kegra fanogra ghami ghotilo na, naugna Lord nomi God ghotilo na ginauna edi naiknore mala mhaghu ghami ghotilo jateula teke nhaꞌa chekenihi mana ka ghotilo ia eghu.

²⁶ “Gognarona iara na tusu ari phei nabrou, mala vavahi ghotilo. Kaisei na mana na fablahi ghami ghotilo, kehana mana na ei puhi biꞌo mala mei thoke ghami ghotilo.

²⁷ Jame te leghudi ghotilo nogna cheke Lord nomi God te tusu ari iara ka ghotilo gognarogne, mana ginauna fablahi ghami ghotilo.

²⁸ Nu jame te tiromi leghudi ghotilo nogna cheke Lord nomi God te figri tagruni mana te tei leghudi keha god delei teke theome lasedi ghotilore, mana ginauna ei puhi biꞌo mala mei thoke ghami ghotilo.

²⁹ Kate hata ghami Lord nomi God te tei ka glose nate hata ghotilo na, ghotilo mala chekedi phei philedi cheke igre. Kate kegra ghotilo ka thogele Gerisim, ghotilo mala chekeni phile cheke aheva gne nate fablahi ghami mana na. Eghuteuna kate kegra ghotilo ka thogele Ebal, ghotilo mala chekeni phile cheke aheva gne nate eni mana puhi biꞌo na te mala thoke ghami ghotilo na.”

³⁰ Phei thogele igre au ke kasa Khoꞌu biꞌo Jordan, ka nodi glose vikegna Kenan te au ka glogu Khoꞌu biꞌo Jordan. Phei thogele igre au rhegna nabrou te mala tei salaꞌu ke mosu gaju blahi More, rhegna namono Gilgal.

³¹ Aonu mae Moses ne cheke eghu, “Gognarona ghotilo la namo tei kasa ka Khoꞌu biꞌo Jordan mala hata glose Lord nomi God teke tusu ari ka ghotilo igne. Kate hata ghotilo glose na te au fakeli tagna na,

³² ghotilo mala thofno leghudi nogna cheke nei nogna farirhiu teu mana te tusu ari iara ka ghotilo gognarogne.”