Diutronomi 10 - Buka Blahi Ka Cheke Holo

Lordfapea tusu lao Nabotho Vetula igre ka mae Moses

¹ “Ka narane tuana Lord ne cheke eghu ka iara, ‘Moses, iagho ghagra ka phei thina tataba igre jateula teke phei ulu lahu ra eghu. Eghuteuna iagho horo kaisei bokis ka thaba. Eghuteuna iagho haghe ka iara agne ka thogele igne hata mei balumu phei thina tataba tuare.

² Iara ginauna rioriso ka phei thina tataba igre cheke teke au ka phei thina tataba teke piphikehi iagho ra. Eghuteuna iagho mala lilisei phei thina tataba gre ka bokis tuana.’

³ “Aonu iara ne eni kaisei bokis ka taba gaju akesia. Eghuteuna iara ne kato phei thina tataba jateula ulu lahu ra neu. Aonu iara pala ne haghe ka thogele na.

⁴ Aonu Lord hata phei thina igre neke rioriso Nabotho Vetula igre ke klignadi. Nogna cheke mana igre nanaba kolho jateula cheke teke cheke mei ka tahati funu ka khaꞌaghi na ka narane teke khapru teku tahati ka pesi thogele ia eghu.

⁵ Aonu iara figri neke sukha mei funu ka thogele ro, eghuteuna iara lilisei phei thina igre ka bokis teke horo iara jateula teke chekeni mana na teu igne. Eghuteuna phei thina igre au ngala ka bokis tuana gognarogne.”

Pris Eron ne lehe

⁶ (Kaisei fata, naiknodi Israel jifla ka nodi seu vikegna mae Jakan ne tei ka nohi Mosera. Jare pris biꞌo Eron ne lehe eghuteuna mare ne giugiluni mana. Eghuteuna mae Eleasa thugna mana igne teke tughuni mana teke mae pris biꞌo na.

⁷ Funu Mosera mare ne tei ka gluma Gudgoda, eghuteuna funu jare mare neke tei ka nohi Jotbata. Namono igne au kmana khoꞌu tagna.

⁸ Eghuteuna ka narane tuana, Lord neke vahini vikegna mae Livae mala palagna nogna Bokis Blahi Nhaꞌa cheke Lord na. Eghuteuna mae igre loku ka Suga Tapuale te Blahi na nei mala fablahidi naiknore ka nanghagna Lord. Igre nodi gloku mare te mei posa gognarogne.

⁹ Naugna igne mae Livaet gre theo thufadi ka glepo ba vido glose jateula keha vikedi Israel te au thufadi ba au nodi vido glose teu igre eghu. Naugna Lord nomi God ghotilo igne mana la chekehi ka mare te mana tangomana te tusu lao gobigna lepo te nabadi mare te mala karha tagna na.)

¹⁰ Mae Moses ne cheke eghu, “Iara neke au ka thogele igne phiatutu narane nei phiatutu bongi, jateula teke eni iara ulu lahu ia neku. Eghuteuna Lord neke nomhini nogu tharai iara na ka narane tuana, aonu mana neke theome falehe ghami ghotilo.

¹¹ Nu Lord ne cheke eghu ka iara, ‘Iagho tei, mala batudi naiknore tei mala hata glose teke nhaꞌa chekehi iara mala tusu lao ka kuꞌemi ghotilo ra teku igne.’ ”

¹² Aonu mae Moses ne cheke eghu, “Ghotilo naiknomi Israel. Unha te magnahaghei eni ghotilo teu Lord nomi God ghotilo na? Ghotilo mala ghatho tahuni nei leghuni eghu puhigna mana na, eghuteuna tahati mala namhani nei loku ranghini eghu mana ka nagnafada fateote'o nei ka gaoghathoda fateote'o.

¹³ Eghuteuna ghotilo mala leghudi nogna cheke nei farirhiu eghu teke tusu ari mana te mala keli nakarhami ghotilo re.

¹⁴ “Kligna nei nauthoglu nei gobigna lepo fateote'o te au ke lamnadi teu igre nogna Lord nomi God ghotilo khotodi re.

¹⁵ Neuba, mana namhadi fara thilo kuꞌemi ghotilo ra, Ebraham, nei mae Isak, nei mae Jekop. Eghuteuna mana theome magnahaghedi keha naiknore ka nauthoglu igne, nu mana neke vahi ghami ghotilo iheire teke karha mei ka vikedi thilo mae igre. Eghuteuna gognarona ghotilo nogna naikno mana.

¹⁶ Eghume, ghotilo kato koko gobigna lepo ka gaoghathomi ghotilo te patu gama nei theome tajini teu nogna nhaꞌa cheke Lord igne.

¹⁷ Lord nomi God ghotilo igne, mana God frunidi god te gnafa nei Lord frunidi Lord te gnafa teu igre. Mana Thofno God mae ihei te au nolaghi fateote'o eghuteuna naikno te gnafa ka nauthoglu igne mhaghuni mana. Kate fateni ihei na, mana theome tangomana te phile ka ihei, eghuteuna mana theome tangomana te hata sileni ka ihei te mala theome fate ka puhi te doglo.

¹⁸ Mana reireghi fakelidi naikno biꞌo te lehe khetodi re nei naikno glehe kokoi, mala theome chaghidi mare. Mana fakakhana nogna namha na ranghidi naikno phosa te au balumi ghotilo eghuteuna tufa ghedi gano nei nodi pohe.

¹⁹ Eghume ghotilo mala jaola mala namhadi naikno phosa igre, naugna tifa na, ghotilo neke jaola neke naikno phosa Ijep.

²⁰ Ghotilo mala ghatho tahuni Lord nomi God, nei leghudi unha te chekedi mana re. Ghotilo ghatho tahuni kolho mana. Eghuteuna nomi nhaꞌa cheke re, ghotilo edi ka nanghagna mana kolho.

²¹ Ghotilo ghatho tahuni Lord! Eigna mana ngala nomi God ghotilo mae ihei teke edi glepo biꞌo te mamhaghuana teke filodi ghotilo ra.

²² Kuꞌemi ghotilo teke sukha teke au Ijep tifa ra neke theome kmana, mare neke fitusalei naikno kolho. Nu gognarona Lord nomi God ghotilo na fablahi ghami ghotilo la ghilei kmana fara jateula nathunu ka maloa na are lau!”