Diutronomi 1 - Buka Blahi Ka Cheke Holo

Nogna cheke ulu lahu mae Moses

^1-5 Buka igne au cheke teke cheke mae Moses ka naiknodi Israel ka teke au teu mare ka namono nagou Moab, ka glogu Khoꞌu biꞌo Jordan, rhegna namono Suf nei fari hoteidi namono Paran, Tofel, Laban, Haserot, nei Disahab. Tifa na mare neke posa ka nohi Moab, mae Moses neke uluni King Sihon kokhologna mae Amoa jare Hesbon, eghuteuna neke uluni King Og maegna Besan nei phei nogna namono mana Astarot ghe Edrei. Ihei te jifla ka Thogele Horeb, keha nanghagna na Thogele Sanai, tei posa Kades Banea, mana tangomana te nolo nabagna nabotho kaisei narane. Neuba, mae Moses ne chekeni cheke igne ke leghudi phiatutu finogha teke jifla mare Ijep igre. Ka narane ulu lahugna fabotho kaisei nhigragna finogha tuana, eghuteuna mare aunga neku ka nohi Moab ke maghati ka keha Khoꞌu biꞌo Jordan, mae Moses neke cheke eigna vetula nogna nhaꞌa cheke Lord.

⁶ Mae Moses neke cheke eghu, “Tifa, kani au teku tahati ka Thogele Sanai, Lord, noda God tahati na neke cheke eghu ka iara: Ghotilo au raugha fara ka thogele igne.

⁷ Ghotilo jifla tei au ka nodi namono kokhologna mae Amoa ka thogele nei ka glogu Khoꞌu biꞌo Jordan, nei ka nodi namono kokhologna Kenan, nei ka namono nagou ke mata Kenan. Namono igne tei posa ke mosu Thongna Mediterenian, eghuteuna ke raru na tei posa ka Thogele Lebanon, eghuteuna ke mosu na tei posa ka Khoꞌu biꞌo Iufretis.

⁸ Igne namono teke nhaꞌa cheke iara teke tusu lao ka thilo kuꞌemi ghotilo tifara, Ebraham, Isak nei Jekop, baludi iheire nate karha mei ke leghudi thilo mare. Gognarona ghotilo tei hata namono igne, nomi ghotilo.”

Mae Moses vavahi mae mala fate

⁹ Mae Moses tudu ne cheke eghu, “Tifa kani au teku tahati ka Thogele Sanai, iara neke cheke eghu ka kuꞌemi ghotilo ra, ‘Gloku te mala batu ghami ghotilo igne, tahu fara ranghi ghau iara te pala sopa kolho iara thegu na.

¹⁰ Lord, nomi God ghotilo igne fablahi ghami ghotilo la kmana fara la jateula nathunu ka maloa na are lau.

¹¹ Snakreni Lord, nodi God kuꞌemi ghotilo ra, fablahi ghami ghotilo mala kmana fara salaꞌui, jateula teke nhaꞌa chekeni mana na eghu.’

¹² Nu gloku te mala fatedi nomi puhi biꞌo nei fapholai teu ghotilo igre biꞌo fara ranghi ghau iara.

¹³ Gognarona ghotilo vavahi keha mae ka vikeda tahati te au gaoghatho te keli nei glalase, nei au nangha te keli ka nodi glokure. Eghuteuna iara ginauna vahidi mare mala nomi lida ghotilo.”

¹⁴ Ghotilo neke cheke tughu eghu ka iara, “Unha te ghathoni iagho igne thofno keli fara.”

¹⁵ Eghume iara vavahi mae mala baubatu ka vike te lalase nei au nangha te keli. Eghuteuna iara fablahidi mae igre mala batu ghami ghotilo. Keha ka mare mala komanda ka kaisei thogha mae, eghuteuna keha kaisei gobi mae, eghuteuna keha glimafului mae, eghuteuna keha nabotho mae.

¹⁶ Eghuteuna ka narane tuana iara neke cheke faheta eghu ka mae mala fate igre, “Kate fate te mala fadoglidi faripholai te edi farihoteimi ghotilo re, ghotilo mala fate fadoglo neubane faripholai baludi kherami ba baludi naikno phosa te mei au balumi.

¹⁷ Eghuteuna kate fatedi naiknore, ghotilo fate ka puhi te doglo, thosei phile ka ihei nga. Neubane mae biꞌo ba fiti mae kolho, ghotilo thosei mhaghuni ihei, nu fatedi naiknore ka puhi te naba ka gaoghathogna God. Eghuteuna jame kaisei puhi biꞌo fara, te theome naba ghotilo te fadoglini na, ghotilo ginauna hata mei ka iara, eghuteuna iara ginauna fadoglini puhi tuana.”

¹⁸ Ka narane tuana iara neke farirhiudi naiknore ka keha glepo te mala edi mare re.

Mae Moses ne kuru tei keha mae mala tei fasigho poru ka namono re

¹⁹ Mae Moses ne cheke eghu, “Lord, noda God tahati na neke cheke ka tahati mala jifla Thogele Sanai, eghuteuna tei salaꞌu ka namono nagou biꞌo te thono diꞌa fara, mala tei posa ka nodi thogele kokhologna mae Amoa. Eghume tahati la eni igne la mei thoke agne Kades Banea.

^20-21 Aonu iara neke cheke eghu ka kuꞌeda tahati ra, ‘Gognarona tahati la mei ka nodi thogele kokhologna mae Amoa. Namono igne Lord, noda God tahati nei nodi God kuꞌeda tifa ra eghu neke tusu mei ka tahati. Filo si ghotilo! Mana neke nhaꞌa chekehi ka tahati namono igne. Eghume ghotilo thosei mhaghu ba ghatho peapea, tei si ghotilo au tagna!’

²² “Nu ke leghu na, kuꞌemi ghotilo ra mei filo ghau iara neke cheke eghu, ‘Te keli na tahati kuru tei keha mae mala tei fasigho poru ka namono igne. Eghuteuna kate pulo mei mare na, mare ginauna cheke ka tahati eidi namono nate thokedi tahati ginaure eghuteuna faꞌunha eghu tahati nate tei ka mare na.’

²³ “Eghuteuna igne jateula kaisei famane gaoghatho eghu ka iara. Aonu iara ne vahidi nabotho phei mae, kaisei ka kaisei vike.

²⁴ Aonu mare jifla ne haghe ka thogelero eghuteuna mare mei ne thoke ka glogu Eskol, eghuteuna mare mei ne filo ligohodi namono igre.

²⁵ Eghuteuna mare sene keha sisi hata neke pulo mei. Eghuteuna igne ripot teke eni mare na, ‘Namono te tusu mei Lord ka tahati igne kaisei namono keli tutuani fara.’

²⁶ “Nu kuꞌemi ghotilo tifa ra neke tirodi fanomho ka nogna cheke Lord nomi God na neke tirodi tei ruma ka namono igne.

²⁷ Mare au neku kolho ka nodi suga tapuale re, neke khuru cheke eghu, ‘Jauna Lord na tirogna ghami ghehati eghume mana hata fajifla ghami Ijep mala lehe ka khamedi kokhologna mae Amoa.

²⁸ Mala unha kolho si tahati te tei ka namono ignea? Mae teke tei fasigho ka namono igne pulo mei neke famamhaghu ghami ghehati kate chekeni mare te maedi ka namono tuana mare rheta fara nei thono brahu salaꞌu ghita tahati. Eghuteuna nodi namono biꞌo mare igre bara ka thina haghe fara kligna. Eghuteuna mare jaola filodi goigholi ka kokhologna mae Anak jare.’

²⁹ “Nu iara neke cheke eghu ka mare, ‘Ghotilo thosei mhaghudi naikno igre!

³⁰ Lord, nomi God ghotilo ginauna batu ghami ghotilo mala magra balumi ghotilo, jateula tela filonihi ghotilo Ijep

³¹ nei ka namono nagou ia eghu. Ghotilo la filonihi jateula kani teke hata fajifla ghita mana Ijep ia eghu, theo kaisei glepo teke goigoni ghita tahati ka nabrou te mei posa agne! Mana reireghi fakeli ghami ghotilo jateula kaisei mama te reireghi fakelini thugna na ia eghu.’

^32-33 “Nu neuba iara ne cheke faꞌunha teuna ka mare, mare theome tangomana te fatutuani ni Lord, noda God. Leuleghu fata na mana batu ghita mei mala gnafa ka vido te keli, eghuteuna mana falalase nabrou ka tahati, eghuteuna ka bongi na mana kulu tei ke uluda ka kaisei khaꞌaghi, eghuteuna ka narane na mana kulu tei ke uluda ka kaisei khoveo biꞌo te kegra fadoglo haghe, nu mare theome tangomana te fatutuani ni mana.”

Lordne paradi naiknodi Israel

³⁴ Mae Moses ne cheke eghu, “Kate nomhini Lord unha te chekeni ghotilo na, mana ne diꞌatagna fara. Eghuteuna mana ne cheke faheta eghu,

³⁵ ‘Ghotilo naikno te diꞌa gognaro gre ginauna theo kaisei ka ghotilo nate filoni famane namono teke nhaꞌa cheke iara mala tusu lao ka kuꞌemi ghotilo teku ia!

³⁶ Nu mae Kaleb thugna mae Jefune kolho ginauna nate tei filoni namono igne, naugna mana ghatho tahu ghau iara fabrahu. Namono tela tapla tagna nei filonihi teu igne iara ginauna tusu lao ka mana baludi thugna mana re.’

³⁷ “Eghuteuna Lord jaola diꞌatagna ka iara eidi puhidi mare igre, eghume mana neke cheke eghu ka iara, ‘Iagho jaola na theome tangomana nate filoni namono igne.

³⁸ Mae Josua thugna mae Nun, mae ihei te togho nigho iagho igne, mana ginauna tangomana nate baubatudi naiknodi Israel igre mala tei hata namono igne. Eghuteuna iagho mala farerheta gaoghathogna mana na.’

³⁹ Eghuteuna Lord neke cheke eghu ka ghotilo ka narane tuana, ‘Thumi ghotilo te ikodi teu are theome naba te filo glanidi unha te doglo nei unha te jafra, eghuteuna ghotilo neke chekeni te mae naokare ginauna falehedi mare. Neuba, igne na theome thokedi mare, mare ginauna tei hata namono tuana. Nu iara ginauna tufa namono ka mare mala au mare tagna, nei mala khotogna eghu.

⁴⁰ Nu ghotilo mala figri ke pulo fei namono nagou na mala ke leghuni nabrou te tei fei Thongna Ukru.’

⁴¹ “Nu kuꞌemi ghotilo ra neke cheke eghu, ‘Lord, noda God tahati igne, ghehati tapla jafra ranghi ni mana! Gognarona ghehati ginauna haghe magra leghuni unha teke chekeni mana na.’ Eghuteuna mare te gnafa na, gaoghathodi mare na bligi farau ngala te mala tei magra ka namono holo ka thogelero.

⁴² “Nu Lord ne cheke eghu ka iara, ‘Moses, iagho mala cheke faheta ka mare, eghuteuna iagho lhotidi mare mala thosei tei magra, naugna iara ginauna theome au baludi mare, eghuteuna nodi naoka mare igre ginauna uludi mare.’

⁴³ “Eghume iara chekeni igne ka mare leghuni unha teke chekeni Lord, nu mare theome fanomho. Mare cheke faparini Lord na ne haghe ka namono ka thogelero, naugna mare ne patugama.

⁴⁴ Nu kokhologna mae Amoa te au ka thogele igre kafe gru mei jateula jurukuli neku neke ngolhidi neke mei magra ka mare. Mare rikha funu ka rijon Idom ne tei posa ka namono Homa.

⁴⁵ Aonu mare figri neke mei tanhi ka Lord. Nu Lord ne tirogna fanomho ka mare.”