Whakatauki 8 - Paipera Tapu 2012

Te Karanga o te Whakaaronui

¹ He teka ianei kei te karanga te whakaaro nui, e puaki ana anō te reo o te mātauranga?

² I runga i ngā wāhi tiketike tōna tūranga, i te ara i te tūtakitanga o ngā huarahi;

³ hāmama ana ia i te taha o ngā kūwaha, i te ngutu o te pā, i te tomokanga atu i ngā tatau:

⁴ “Ki a koutou, e ngā tāngata, tāku karanga; ki ngā tama anō a te tangata tōku reo.

⁵ E ngā kūware, kia mātau koutou ki te ngārahu tūpato; e ngā wairangi, kia mōhio te ngākau.

⁶ Whakarongo mai, ka kōrerotia hoki e ahau ngā mea pai rawa; ko tā ōku ngutu e whakapuaki ai ko ngā mea e rite ana.

⁷ He pono hoki te kōrero a tōku māngai; he mea whakarihariha anō te kino ki ōku ngutu.

⁸ Kei runga i te tika ngā kupu katoa a tōku māngai; kāhore he whakapeka, he whanokē rānei, i roto.

⁹ Ko ēnei katoa he mārama ki te tangata e mātau ana, he tika ki te hunga i kitea ai te mōhio.

¹⁰ Manakohia mai tāku ako, kaua te hiriwa; ko te mātauranga, nui atu i te kōura pai rawa.

¹¹ Pai atu hoki te whakaaro nui i ngā rupi; e kore hoki ngā mea katoa e minaminatia nei e tau hei whakarite mōna.

¹² “Kua meinga e ahau, e te whakaaro nui, ko te ngārahu pai hei nohoanga mōku, e kitea ana e ahau te mōhio me te āta whakaaro.

¹³ Ko te wehi ki a Ihowā koia tēnā ko te kino ki te hē. E kino ana ahau ki te whakapehapeha, ki te whakakake, ki te ara hē, ki te māngai whanokē.

¹⁴ Ko te whakaaro tika, ko te whakaaro nui, nāku; ko ahau te mātauranga, kei ahau te kaha.

¹⁵ Nāku ngā kīngi i kīngi ai, nāku ngā rangatira i whakatakoto ai i te tika.

¹⁶ Nāku i whai rangatiratanga ai ngā rangatira, ngā tāngata nunui, arā ngā kaiwhakawā katoa o te whenua.

¹⁷ E arohaina ana e ahau te hunga e aroha ana ki ahau; ko te hunga hoki e āta rapu ana i ahau, e kite rātou i ahau.

¹⁸ He taonga, he korōria kei ahau, āe rā, he rawa mau tonu, he tika.

¹⁹ Pai atu ōku hua i te kōura, āe rā, i te kōura parakore; ko ngā mea e puta ana i ahau, pai atu i te hiriwa kōwhiri.

²⁰ Kei ngā ara o te tika ahau e haere ana, kei waenganui i ngā huarahi o te whakawā;

²¹ kia meinga ai e ahau te hunga e aroha ana ki ahau kia whiwhi ki te rawa, kia whakakīia ai e ahau ā rātou takotoranga taonga.”

Te Pūtakenga mai o te Whakaaronui

²² “I a Ihowā ahau, nō te tīmatanga rā anō o ōna ara, nō mua atu i āna mahi o neherā.

²³ Nōnamata riro ahau i whakaritea ai, nō te tīmatanga, nō mua atu i te whenua.

²⁴ I te mea kāhore anō ngā rire, kua whānau ahau; i te mea kīanō he puna whai wai.

²⁵ Nō mua atu i te whakaūnga o ngā maunga, nō mua i ngā pukepuke tōku whānautanga;

²⁶ i te mea kāhore anō i hangā noatia e ia te whenua, me ngā pārae, me te tīmatanga o te puehu o te ao.

²⁷ I tāna whakatūranga i ngā rangi, i reira anō ahau; i tāna whakaritenga i te awhi mō te mata o te rire;

²⁸ i tāna whakapūmautanga i ngā rangi i runga; i te totōtanga o ngā puna o te rire;

²⁹ i tāna rohenga mai i te moana, kei takahia tāna kupu e ngā wai; i tāna waitohutanga i ngā tūranga o te whenua,

³⁰ i reira ahau i tōna taha, he tohunga ki ngā mahi; he ahau nōna i ia rā, i ia rā, e koa ana i ngā wā katoa i tōna aroaro;

³¹ e koa ana ki tāna ao, ā, ko tāku i āhuareka ai ko ngā tama a te tangata.

³² “Nō reira, e āku tamariki, whakarongo mai ki ahau; ka hari hoki te hunga e pupuri ana i ōku ara.

³³ Whakarongo mai ki te ako, kia whai whakaaro ai koutou; kaua hoki e paopaongia.

³⁴ Ka hari te tangata e whakarongo ana ki ahau, e tatari ana i ōku tatau i tēnei rā, i tēnei rā, e whanga ana i ngā pou o ōku kūwaha.

³⁵ Ko te tangata hoki e kite ana i ahau, e kite ana i te ora, ka whiwhi anō ia ki tā Ihowā manako mai.

³⁶ Ko te tangata ia e hara ana ki ahau, he mahi nanakia tāna ki tōna wairua ake; ko te hunga katoa e kino ana ki ahau, e aroha ana ki te mate.”