Whakatauki 5 - Paipera Tapu 2012

He Whakatūpato kei Pūremu

¹ E tāku tama, tahuri ki ōku whakaaro nui; kia anga tōu taringa ki tōku mātauranga,

² kia ū ai koe ki te ngārahu pai, mau ai te mātauranga i ōu ngutu.

³ Ko ngā ngutu hoki o te wahine kē, kei te māturuturunga iho o te honikoma, ngāwari iho tōna māngai i te hinu;

⁴ he kawa rawa hoki tōna mutunga i te taru kawa, he koi, ānō he hoari matarua.

⁵ Ko ōna waewae e heke ana ki te mate; mau pū te rēinga i ōna takahanga.

⁶ Heoi, kāhore i kitea e ia te ara tōtika ki te ora; he kotiti kē ōna ara, ā, kāhore ia i tē mātau.

⁷ Nā reira, e āku tamariki, whakarongo mai ki ahau, kei mahue hoki ngā kupu a tōku māngai.

⁸ Kia matara tōu ara i a ia, kaua hoki e tata ki te tatau o tōna whare;

⁹ kei hoatu tōu hōnore ki ngā tāngata kē, ōu tau ki te hunga nanakia.

¹⁰ Kei mākona ngā tāngata kē i tōu kaha, kei riro ōu māuiui ki te whare o te tangata kē;

¹¹ ā, ka tangi koe i tōu whakamutunga, ina poto ōu kikokiko me tōu tinana,

¹² ā, ka mea, “Kātae tōku kino ki te ako; kātae te māuiui o tōku ngākau ki te tohutohu!

¹³ Kīhai hoki ahau i whakarongo ki te reo o ōku kaiwhakaako, kīhai tōku taringa i anga ki te hunga e tohutohu ana i ahau.

¹⁴ Wāhi iti kei ngā kino katoa ahau i waenganui o te whakaminenga, o te huihui.”

¹⁵ Inumia he wai i roto i tāu ake rua, me ngā wai rere anō i roto i tāu ake poka.

¹⁶ Kia tohatoha noa atu koia āu puna wai, ngā awa wai i ngā huarahi?

¹⁷ Waiho ēnā māu anake, kauaka mā koutou tahi ko ngā tāngata kē.

¹⁸ Kia manaakitia tāu puna wai; kia koa anō koe ki te wahine o tōu taitamarikitanga.

¹⁹ Kia rite ia ki taua mea āhuareka, ki te hāta, ki te mea ātaahua ki te anaterope. Kia mākona koe i ōna ū i ngā wā katoa, kia matenuitia tonutia e koe tōna aroha.

²⁰ He aha oti koe, e tāku tama, ka matenui ai ki te wahine kē, i awhi ai i te uma o te wahine kē?

²¹ Kei mua hoki i ngā kanohi o Ihowā ngā ara o te tangata, ā, e meinga ana e ia kia papatairite ōna ara katoa.

²² Ko ōna kino anō hei hopu i te tangata kino, hei taura ōna hara e mau ai ia.

²³ Ka mate ia, he mea kīhai i whakaakona, ka pōhēhē i te nui o tōna wairangi.