Whakatauki 31 - Paipera Tapu 2012

He Tohutohu ki tētahi Kīngi

¹ Ko ngā kupu a Kīngi Remuera; ko te poropititanga i whakaakona ai ia e tōna whaea:

² He aha, e tāku tama? He aha, e te tama a tōku kōpū? Ā, he aha, e te tama a āku kupu taurangi?

³ Kaua e hoatu tōu kaha ki ngā wāhine, ōu ara hoki ki te mea whakangaro o ngā kīngi.

⁴ Ehara mā ngā kīngi, e Remuera, ehara mā ngā kīngi te inu wāina; ehara hoki mā ngā rangatira te mea, “Kei hea he wai kaha?”

⁵ Kei inu rātou, ā, ka wareware ki te ture, ā, ka whakapeau kē i te whakawā o te tangata e tūkinotia ana.

⁶ Hoatu he wai kaha mā te tangata e tata ana te marere, he wāina hoki ki ngā wairua pōuri;

⁷ tukua ia kia inu, kia wareware ai ki tōna rawakore, ā, kore ake he mahara ki ōna mate.

⁸ Kia puaki tōu māngai mō te wahangū, i te whakawākanga o te hunga katoa kua waiho mō te mate.

⁹ Kia puaki tōu māngai, whakaritea te whakawā i runga i te tika, tohea te tohe a te ware, a te rawakore.

Te Wahine Pai Tōna Āhua

¹⁰ Ko wai e kite i te wahine e ū ana tōna pai? Ko tōna utu hoki kei runga noa atu i tō ngā rupi.

¹¹ Ka whakapono te ngākau o tāna tāne ki a ia, ā, kāhore ōna hapanga i te taonga.

¹² He pai tāna e mea ai ki a ia, kāhore hoki he kino, i ngā rā katoa e ora ai ia.

¹³ E kimi ana ia i te huruhuru hipi, i te muka, ā, ka ngākau nui te mahi a ōna ringa.

¹⁴ Ko tōna rite kei ngā kaipuke o ngā kaihokohoko; e mauria mai ana e ia tāna kai i tawhiti.

¹⁵ E maranga ana hoki ia i te mea e pō tonu ana, ā, hoatu ana e ia he kai mā tōna whare, he mahi hoki e rite ana mā āna kōtiro.

¹⁶ E whakaaroaro ana ia ki tētahi māra, ā, ka hokona e ia; whakatōkia ana e ia he māra wāina, he hua nā ōna ringa.

¹⁷ E whītiki ana ia i tōna hope ki te kaha, e mea ana i ōna tākakau kia pakari.

¹⁸ Ka kite ia he pai tāna i hokohoko ai; e kore tāna rama e mate i te pō.

¹⁹ Ka totoro atu ōna ringa ki te mea tākai miro, ka pupuri ōna ringa ki te pou muka.

²⁰ Ka wherahia tōna ringa ki te ware; āe rā, ka totoro atu ōna ringa ki te rawakore.

²¹ E kore ia e wehi i te hukarere mō tōna whare; nō te mea kua kākahuria tōna whare katoa ki te ngangana.

²² Oti ake i a ia te whatuwhatu he whāriki mōna; he rīnena pai, he pāpura ōna kākahu.

²³ E mōhiotia ana tāna tāne i ngā kūwaha, ina noho tahi ia ki ngā kaumātua o te whenua.

²⁴ E hangā ana e ia he rīnena pai, ā, hokona atu ana; e hoatu ana e ia he whītiki ki ngā kaihoko.

²⁵ He kaha, he hōnore ōna kākahu; ā, e kata ana ia ki ngā rā ō muri atu.

²⁶ He nui ōna whakaaro ina puaki tōna māngai; kei tōna arero te ture o te atawhai.

²⁷ Ka āta tirohia e ia ngā ara o tōna whare, e kore anō ia e kai i te taro o te māngere.

²⁸ Ka whakatika āna tamariki, ā, he kupu manaaki tā rātou mōna; tāna tāne hoki, ka whakamoemiti anō ia ki a ia, ka mea:

²⁹ “He tokomaha ngā tamāhine i ū te pai o tā rātou mahi, otiia, hira ake tāu i ā rātou katoa.”

³⁰ He mea teka noa te manako, he mea horihori te ātaahua; tēnā ko te wahine e wehi ana i a Ihowā, ko ia e whakamoemititia.

³¹ Hoatu ki a ia o ngā hua o ōna ringa; ā, mā āna mahi ia e whakamoemiti i ngā kūwaha.