Whakatauki 3 - Paipera Tapu 2012

Me Whakawhirinaki ki a Ihowā

¹ E tāku tama, kei wareware ki tāku ture; kia puritia hoki āku whakahau e tōu ngākau.

² Kātahi ka nui ake ngā rā roa mōu, ngā tau e ora ai, me te āta noho.

³ Kei whakarērea koe e te atawhai, e te pono; heia ki tōu kakī; tuhituhia iho ko tōu ngākau ānō hei papa.

⁴ Pēnei ka whiwhi koe ki te atawhai, ki te mātauranga pai i te aroaro o te Atua, o te tangata.

⁵ Whakapaua tōu ngākau ki te whakawhirinaki ki a Ihowā, kaua hoki e okioki ki tōu mātauranga ake.

⁶ I ōu ara katoa whakaaro ki a ia, ā, māna e whakatika ōu huarahi.

⁷ Kei whakaaro ki a koe he mōhio koe; e wehi ki a Ihowā, kia mawehe i te kino;

⁸ hei ora tēnā ki tōu pito, hei mākūkū ki ōu wheua.

⁹ Kia whai korōria a Ihowā i ōu rawa, i ngā mātāmua anō hoki o āu hua katoa;

¹⁰ ā, ka kī āu toa i ngā mea maha, ka pakaru anō hoki āu rua wāina i te wāina.

¹¹ E tāku tama, kaua e whakahāwea ki tā Ihowā papaki; kei ngākaukore anō koe ina ākona e ia.

¹² Ka ākona hoki e Ihowā tāna e aroha ai, ka pērā tāna me tā te matua ki te tamaiti e matenuitia ana e ia.

Te Rahinga Tūturu

¹³ Ka hari te tangata kua kitea nei e ia te whakaaro nui, me te tangata anō kua whiwhi ki te mātauranga,

¹⁴ pai atu hoki te hokohoko o tērā i tō te hiriwa e hokohokona nei, ōna hua i te kōura parakore.

¹⁵ Nui atu ōna utu i o ngā rupi; e kore anō hoki ngā mea katoa e minaminatia e koe e rite ki a ia.

¹⁶ Kei tōna ringa matau ngā rā roa; kei tōna mauī ngā taonga me te korōria.

¹⁷ Ko ōna ara he ara āhuareka, ko ōna ara katoa he rangimārie.

¹⁸ He rākau ia nō te ora ki te hunga e ū ana ki a ia; ka hari te tangata e pupuri ana i a ia.

Te Pūtakenga Tapu o te Whakaaronui

¹⁹ Nā te whakaaro nui o Ihowā i whakatūria ai e ia te whenua; nā tōna mōhio tāna whakapūmautanga i ngā rangi.

²⁰ He mōhio nōna i pakaru ai ngā rire, i māturuturu ai te tōmairangi o ngā kapua.

Te Maru Tūturu

²¹ E tāku tama, kei kotiti kē ēnā i ōu kanohi: puritia te whakaaro nui me te ngārahu pai,

²² kei ēnā he oranga mō tōu wairua, he whakapaipai mō tōu kakī.

²³ Pēnei ka haere koe i tōu ara, tē ai he wehi, e kore anō tōu waewae e tūtuki.

²⁴ Ka takoto koe, e kore e wehi, inā, ka takoto koe, ka reka anō tāu moe.

²⁵ Kaua e wehi i te mataku huaki tata, i te whakangaromanga rānei o te hunga kino ina pā mai.

²⁶ Ko Ihowā hoki hei okiokinga mōu, ā, māna e tiaki tōu waewae kei mau.

²⁷ Kaua e kaiponuhia te pai ki te hunga i tika nei mā rātou, i ngā wā e taea ai e tōu ringa.

²⁸ Kaua e mea ki tōu hoa, “Haere, ka hoki mai ai, ā, āpōpō ka hoatu e ahau,” i te mea kei a koe anō te mea e takoto ana.

²⁹ Kei whakatakoto i te kino mō tōu hoa, kei te noho hū noa nā hoki ia i tōu taha.

³⁰ Kei ngangau pokanoa ki te tangata, ki te mea kāhore āna mahi kino ki a koe.

³¹ Kei hae ki te tangata nanakia, kaua hoki e whiriwhiria tētahi o ōna ara.

³² He mea whakarihariha hoki te whanokē ki a Ihowā; kei te hunga tika ia tōna whakaaro ngaro.

³³ He kanga nā Ihowā kei roto i te whare o te tangata kino, he mea manaaki ia nāna te nohoanga o te hunga tika.

³⁴ He pono ka whakahī ia ki te hunga whakahī, ka puta ia tōna atawhai ki te hunga whakaiti.

³⁵ Ka whiwhi te hunga whakaaro nui ki te korōria; he whakamā ia te whakanui o ngā wairangi.