Whakatauki 23 - Paipera Tapu 2012

¹ Ki te noho tahi kōrua ko te rangatira ki te kai, āta whakaaroa mārietia tērā i tōu aroaro;

² whakapākia he māripi ki tōu korokoro, ki te mea he tangata kakai koe.

³ Kaua e hiahia ki āna mea reka; he kai tinihanga hoki ērā.

⁴ Kaua e tāruke ki te mea taonga; kāti tāu mea ki tōu mātauranga.

⁵ E anga mai rānei ōu kanohi ki taua mea korekore nei? He pono hoki ka whai parirau te taonga, koia ānō kei te ēkara, rere ana whaka te rangi.

⁶ Kaua e kainga te kai a te tangata kanohi kino, kei minamina hoki koe ki āna mea reka.

⁷ Ko tāna hoki e mea ai i roto i a ia, pērā tonu ia, “E kai, e inu!” koia tāna kupu ki a koe; kāhore ia ōna ngākau ki a koe.

⁸ Ko te kongakonga i kainga e koe, ka ruakina e koe, ka maumauria anō hoki āu kupu reka.

⁹ Kaua e kōrero ki ngā taringa o te kūware; ka whakahāwea hoki ia ki te whakaaro nui o āu kupu.

¹⁰ Kei whakanekehia e koe te rohe tawhito; kei haere koe ki ngā māra a te pani;

¹¹ nō te mea he kaha tō rātou kaiwhakaora; ka tohea e ia tā rātou tohe ki a koe.

¹² Anga atu tōu ngākau ki te ako, me ōu taringa ki ngā kupu o te mātauranga.

¹³ Kaua e tohungia te whiu ki te tamaiti; ki te patua hoki ia e koe ki te rākau, e kore ia e mate.

¹⁴ Tātātia ia e koe ki te rākau, ā, ka whakaorangia e koe tōna wairua i te rēinga.

¹⁵ E tāku tama, ki te whakaaro nui tōu ngākau, ka koa hoki tōku ngākau, āe rā, tōku nei anō;

¹⁶ āe rā, ka hari ōku whatumanawa, ina kōrero ōu ngutu i ngā mea tika.

¹⁷ Kei hae tōu ngākau ki te hunga hara; engari kia wehi koe ki a Ihowā, ā pau noa te rā.

¹⁸ He pono hoki tērā ānō he whakautu; e kore anō hoki tāu i tūmanako ai e hātepea atu.

¹⁹ Whakarongo rā, e tāku tama, kia whai whakaaro hoki koe, ā, whakatikaia tōu ngākau i te ara.

²⁰ Kei uru ki te hunga kakai wāina; ki te hunga pukukai kikokiko;

²¹ nō te mea ka tutuki tahi te tangata inuinu rāua ko te tangata kakai ki te rawakore; he tawhetawhe hoki te kākahu a te momoe mō te tangata.

²² Whakarongo ki tōu pāpā nāna koe; kaua hoki e whakahāwea ki tōu whaea ina rūruhi ia.

²³ Hokona te pono, kaua hoki e whakawhitiwhitia; āe rā, te whakaaro nui, te ako hoki, me te mātauranga.

²⁴ Nui atu hoki te koa o te pāpā o te tangata tika; ā, ko te tangata e whānau he tama whakaaro nui māna, ka hari ia ki a ia.

²⁵ Kia hari tōu pāpā rāua ko tōu whaea, inā, kia koa te wahine i whānau ai koe.

²⁶ E tāku tama, hōmai tōu ngākau ki ahau, kia manako anō hoki ōu kanohi ki āku ara.

²⁷ Nō te mea he rua hōhonu te wahine kairau; he poka kūiti te wahine kē.

²⁸ Āe rā, ka whanga ia ānō he kaipāhua, ā, ka whakatokomahatia e ia ngā tāngata poka kē.

²⁹ Ko wai e auē? Ko wai e tangi? Ko wai e totohe? Ko wai e ngangautia? Ko wai e marū, he mea takekore? Ko wai e whero tonu ōna kanohi?

³⁰ Ko te hunga e noho roa ana ki te wāina; ko te hunga e haere ana ki te rapu i te wāina whakaranu.

³¹ Kaua e titiro ki te wāina i te mea e whero ana, ina puta tōna kara i roto i te kapu, ina mania tōna heke.

³² Tōna tukunga iho ānō he nākahi e ngau ana, koia anō kei te wero a te neke.

³³ E kite hoki ōu kanohi i ngā mea rerekē, ā, ka puta he kupu rerekē i tōu ngākau.

³⁴ Āe rā, ka rite koe ki te tangata e takoto ana i waenga moana, ki te tangata rānei e takoto ana i te tihi o te rewa.

³⁵ Ā, ka mea koe, “Patua ana ahau e rātou, ā, kīhai ahau i mamae; tātātia ana ahau e rātou, ā, kīhai ahau i mōhio. Āhea ahau ara ake ai? Ka rapua anō e ahau.”