Whakatauki 10 - Paipera Tapu 2012

Te Kohinga Tuatahi a ngā Whakatauki a Horomona

¹ Ko ngā whakatauki a Horomona. He tama whakaaro nui, ka koa te pāpā; tēnā he tama kūware, he utanga nui mō tōna whaea.

² Kāhore he rawa o ngā taonga o te kino; mā te tika ia te oranga ake i te mate.

³ E kore a Ihowā e tuku i te wairua o te tangata tika kia hemokai; ka panā atu ia e ia te hiahia o te hunga kino.

⁴ He rawakore te tukunga iho o te ringa ngehe; mā te ringa kakama ia ka hua te taonga.

⁵ He kohi raumati tā tama ngākau mahara; he whakamā ia te rawa a tama moe ngahuru.

⁶ He manaaki kei te tumuaki o te tangata tika; he ārita ia kei te waha o te tangata kino, taupoki ai.

⁷ Ka manaakitia te maharatanga ki te tangata tika; ka pirau ia te ingoa o te hunga kino.

⁸ He ngākau whakaaro, ka tahuritia te whakahau; he ngutu wairangi, ka hinga.

⁹ Ko te tangata haere tika, e haere ora ana; ko te tangata parori kē ōna ara, ka mōhiotia ia.

¹⁰ Mā te whakakini o te kanohi ka puta ai te pōuri; ko te ngutu wairangi ia, ka hinga.

¹¹ He puna ora te māngai o te tangata tika; tēnā ko te māngai o te hunga kino, ka taupokina tērā e te mahi nanakia.

¹² Ko tō te mauāhara he whakaoho i ngā totohe; ko tō te aroha he hīpoki i ngā hē katoa.

¹³ E kitea te whakaaro nui ki ngā ngutu o te tangata mātau; ko te rākau ia te mea mō te tuarā o te ngākaukore.

¹⁴ Rongoā ai te hunga whakaaro nui i te mātauranga; he whakangaromanga ia kei te hori tonu, te māngai o te wairangi.

¹⁵ Ko ōna rawa te pā kaha o te tangata taonga; tēnā ko te hunga kore taonga, hei whakangaromanga tō rātou rawakore.

¹⁶ Ko te mahi a te tangata tika e ahu ana ki te ora; ko ngā hua o te kino ki te hara.

¹⁷ Kei te ara ki te ora te tangata e pupuri ana i te kupu ako; ko te tangata ia e kore e pai kia rīria tōna hē, ka kotiti kē.

¹⁸ Ko te tangata e huna ana i te mauāhara he ngutu teka; ā, he kūware te tangata e whakapuaki ana i te ngautuarā.

¹⁹ E kore ngā kupu maha e hapa i te kino; he mahara nui ia te tangata he ngutu kokopi nei ōna.

²⁰ He hiriwa pai rawa te arero o te tangata tika; ko te ngākau o te hunga kino, he hauwarea rawa.

²¹ He tokomaha e whāngaia ana e ngā ngutu o te tangata tika; ka mate ia te hunga kūware, he kore nō te ngākau mahara.

²² Ka hua te taonga i tā Ihowā manaaki; kāhore hoki e kīnakitia e ia ki te pōuri.

²³ Hei tākaro mā te wairangi te mahi hē; mā te tangata mātau ia ko te whakaaro nui.

²⁴ Ko tā te tangata kino i wehi ai ka tae anō ki a ia; ā, ko tā te hunga tika i hiahia ai, ka hōmai.

²⁵ Pahure rawa ake te tūkauati kua kore te hunga kino; tēnā ko te tangata tika he tūranga pūmau tērā.

²⁶ He winika ki ngā niho, he paowa ki ngā kanohi; koia anō te māngere ki ōna kaiunga.

²⁷ Ko te wehi ki a Ihowā e whakaroa ana i ngā rā; ka whakapotoa mai ia ngā tau o te hunga kino.

²⁸ Tūmanako atu te hunga tika, koa iho; tūmanako atu te hunga kino, ngaro iho.

²⁹ He kaha mō te tangata tika tā Ihowā ara; he whakangaromanga ia mō ngā kaimahi i te kino.

³⁰ E kore te tangata tika e whakangāueuetia ā ake ake; e kore ia e nohoia e te hunga kino te whenua.

³¹ Ko te māngai o te tangata tika hua ana te whakaaro nui; ka tapahia ia te arero whanokē.

³² E mōhio ana ngā ngutu o te tangata tika ki ngā mea ka manakohia; he whanokē ia e whakapuakina ana e te māngai o te hunga kino.