Whakakitenga 15 - Paipera Tapu 2012

Ngā Anahera kei a rātou ngā Whiu Whakamutunga

¹ Ā, i kite ahau i tētahi atu tohu i te rangi, he mea nui, he mea whakamīharo, tokowhitu ngā anahera kei a rātou ngā whiu whakamutunga e whitu; ko te whakaotinga hoki ēnei o te riri a te Atua.

² Ā, ka kite ahau he mea e rite ana ki te moana karaihe, he mea whakananu ki te kāpura; me te hunga i kaha i te kararehe, i tōna whakapakoko hoki, i tāna tohu, i te whika anō hoki o tōna ingoa, e tū ana i runga i te moana karaihe, kei a rātou anō ngā hāpa a te Atua.

³ Kei te waiata hoki rātou i te waiata a Mohi, pononga a te Atua, me te waiata anō a te Reme; i mea rātou: “He nui āu mahi, e mīharotia ana, e te Ariki, e te Atua Kaha Rawa! Tika tonu ōu ara, pono tonu, e te Kīngi o ngā whakatupuranga!

⁴ Ko wai e kore e wehi i a koe, e te Ariki? E kore hoki e whakakorōria i tōu ingoa? Ko koe anake hoki te tapu ana; Ka haere mai hoki ngā tauiwi katoa, ka koropiko ki tōu aroaro; kua whakakitea hoki āu tikanga tika.”

⁵ Ā, i muri iho i ēnei mea ka kite ahau, nā, kua puare te whare tapu o te tapenākara o te whakaaturanga i te rangi.

⁶ Nā, ka puta mai i roto i te whare tapu ngā anahera e whitu, i a rātou nei ngā whiu e whitu, he mea tātai ki te kōhatu utu nui, kāhore he koha, kanapa tonu, ā, ko ō rātou uma he mea whītiki ki te whītiki kōura.

⁷ Ā, ka hoatu e tētahi o ngā mea ora e whā ki ngā anahera e whitu ētahi oko kōura e whitu, kī tonu i te riri o te Atua e ora nei ā ake ake.

⁸ Nā, kua kī te whare tapu i te paoa, he mea nā te korōria o te Atua, nā tōna kaha hoki. Kīhai hoki tētahi tangata i āhei te tomo ki te whare tapu, kia mutu rā anō ngā whiu e whitu a ngā anahera e whitu.