Waiata 98 - Paipera Tapu 2012

Te Kīngi Toa

He hīmene.

¹ Waiatatia ki a Ihowā he waiata hou; he mahi whakamīharo hoki āna. Nā tōna ringa matau, nā tōna ringa tapu, i taea ai e ia te whakaora.

² Kua whakakitea e Ihowā tāna whakaoranga, kua whakapuakina e ia tōna tika ki te aroaro o ngā tauiwi.

³ Kua mahara ia ki tāna mahi tohu, ki tōna pono ki te whare o Īharaira; ā, kua kite ngā pito katoa o te whenua i te whakaoranga a tō tātou Atua.

⁴ Kia hari te hāmama, e te whenua katoa, ki a Ihowā; hāmama, kia hari, āe rā, hīmene atu.

⁵ Hīmene ki a Ihowā i runga i te hāpa; i runga i te hāpa, me te hīmene anō te reo.

⁶ I runga i te tētere, i te tangi anō o te koronete; kia hari te hāmama ki te aroaro o Ihowā, o te Kīngi.

⁷ Kia haruru te moana me ngā mea e hua ana i roto; te ao me ōna tāngata e noho ana i runga.

⁸ Kia papaki ngā ringa o ngā roma, kia hari tahi ngā pukepuke.

⁹ Ki te aroaro o Ihowā, e haere mai ana hoki ia ki te whakawā mō te whenua. Ka whakawā ia mō te ao i runga i te tika, mō ngā iwi hoki i runga i te pono.