Waiata 97 - Paipera Tapu 2012

Ko Ihowā te Rangatira Tino Nui

¹ Ko Ihowā te Kīngi! Kia hari te whenua, koa ngā tini moutere!

² Ko te kapua me te pōuri kei ōna taha katoa; ko te tika, ko te whakawā, te tūranga o tōna torōna.

³ He kāpura e haere ana i mua i a ia, ā, pau ake ōna hoariri ā taka noa.

⁴ Mārama tonu te ao i āna uira; i kite te whenua, ā, wiri ana.

⁵ Rewa noa ngā maunga, ānō he ware pī, i te aroaro o Ihowā, i te aroaro o te Ariki o te whenua katoa.

⁶ E whakapuakina ana e ngā rangi tōna tika; ā, e kitea ana e ngā iwi katoa tōna korōria.

⁷ Kia whakamā katoa te hunga e mahi ana ki ngā whakapakoko, e whakamanamana ana ki ngā atua horihori; koropiko ki a ia, e ngā atua katoa.

⁸ I rongo a Hiona, ā, koa ana; whakamanamana ana ngā tamāhine o Hūrā, e Ihowā, ki āu whakaritenga.

⁹ Ko koe hoki, e Ihowā, kei runga noa ake i te whenua katoa; kua whakanuia koe ki runga noa ake i ngā atua katoa.

¹⁰ E te hunga e aroha ana ki a Ihowā, e kino ki te hē; e tiakina ana e ia ngā wairua o tāna hunga tapu; e whakaorangia ana rātou e ia i ngā ringa o te hunga kino.

¹¹ Kua oti te mārama te whakatō mō te hunga tika; me te koa mō te hunga ngākau tapatahi.

¹² Kia hari ki a Ihowā, e te hunga tika; whakamoemiti ki tōna ingoa tapu!