Waiata 91 - Paipera Tapu 2012

Ko te Atua tō tātou Piringa

¹ Ko te tangata kei te wāhi ngaro o te Runga Rawa tōna kāinga, ka noho ia i raro i te taumarumarutanga o te Kaha Rawa.

² Ka kīia e ahau a Ihowā, “Ko ia tōku piringa, tōku pā, tōku Atua, ka whakawhirinaki ahau ki a ia.”

³ Māna hoki koe e whakaora i te māhanga a te kaihopu manu, i te mate nanakia.

⁴ Ka hīpokina koe e ia ki ōna hou, ā, ka piri koe ki raro i ōna pākau; ko tōna pono hei whakangungu rākau, hei puapua mōu.

⁵ E kore koe e wehi i te mea whakamataku i te pō; i te pere e rere ana i te awatea.

⁶ I te mate urutā e rere ana i te pōuri; i te whakangaromanga e whakangaro ana i te poutūmārōtanga.

⁷ He mano te hinga ki tōu taha, tekau hoki ngā mano ki tōu matau; otiia e kore e tata ki a koe.

⁸ Ka titiro kau ōu kanohi, ka mātakitaki ki te utu mō te hunga kino.

⁹ Ko koe hoki, e Ihowā, tōku piringa! Kua waiho e koe te Runga Rawa hei nohoanga mōu;

¹⁰ kāhore he kino e pā ki a koe, kāhore anō he whiu e tata ki tōu tēneti.

¹¹ Ka kōrerotia iho hoki koe e ia ki āna anahera kia tiakina koe i ōu ara katoa.

¹² Mā rātou koe e hiki ake ki ō rātou ringa, kei tūtuki tōu waewae ki te kōhatu.

¹³ Ka haere koe i runga i te raiona, i te neke; ka takahia e koe ki raro te kūao raiona me te nākahi.

¹⁴ “Ka whakaora ahau i a ia, mōna i aroha ki ahau; māku ia e whakateitei ake, mōna i mātau ki tōku ingoa.

¹⁵ Ka karanga ia ki ahau, ā, ka whakahoki kupu ahau ki a ia; ka tata ahau ki a ia i te wā o te hē; māku ia e whakaora, māku anō ia e whakahōnore.

¹⁶ Ka whakaroaina e ahau ōna rā, ā, nā noa ia; ka whakakitea hoki tāku whakaoranga ki a ia.”