Waiata 86 - Paipera Tapu 2012

He Īnoi o te Tangata Mōrearea

He īnoi nā Rāwiri.

¹ Whakatītahatia iho tōu taringa, e Ihowā, whakahokia mai he kupu ki ahau; he ware hoki ahau, he rawakore.

² Tiakina tōku wairua; he tapu hoki ahau. Māu, e tōku Atua, e whakaora tāu pononga e whakawhirinaki atu nei ki a koe.

³ Tohungia ahau, e te Ariki; e karanga nei hoki ahau ki a koe i te rā roa nei.

⁴ Whakaharitia te wairua o tāu pononga; ka ara atu nei hoki tōku wairua, e te Ariki, ki a koe.

⁵ He pai hoki koe, e te Ariki, he ngāwari; e ranea ana hoki tāu mahi tohu ki te hunga katoa e karanga ana ki a koe.

⁶ Tahuri mai tōu taringa, e Ihowā, ki tāku īnoi; whakarongo ki tōku reo unene.

⁷ Ka karanga ahau ki a koe i te rā o tōku pōuri; e whakahoki kupu mai hoki koe ki ahau.

⁸ Kāhore he rite mōu, e te Ariki, i roto i ngā atua; kāhore hoki he rite mō āu mahi.

⁹ Ka haere mai ngā iwi katoa i hangā e koe, ā, ka koropiko ki tōu aroaro, e te Ariki; ka whakakorōria hoki i tōu ingoa.

¹⁰ He nui hoki koe, e mahi ana i ngā mea whakamīharo; ko koe anake te Atua.

¹¹ Whakaakona ahau ki tāu ara, e Ihowā; ka haere ahau i runga i tōu pono; whakatapatahitia tōku ngākau ki te wehi i tōu ingoa.

¹² Ka whakamoemiti katoa tōku ngākau ki a koe, e te Ariki, e tōku Atua; ka whakakorōria anō i tōu ingoa ake ake.

¹³ He nui hoki tāu mahi tohu ki ahau; ā, kua whakaorangia e koe tōku wairua i te rēinga i raro riro.

¹⁴ E te Atua, kua whakatika ki ahau te hunga whakakake; kua whāia anō tōku wairua e te huihuinga o te hunga tutū; kāhore hoki koe e waiho i tō rātou aroaro.

¹⁵ Ko koe ia, e te Ariki, he Atua atawhai, he tohu tangata; he pūhoi ki te riri, e hua ana te mahi tohu me te pono.

¹⁶ Tahuri mai ki ahau, tohungia hoki ahau; hōmai tōu kaha ki tāu pononga, whakaorangia te tama a tāu pononga wahine.

¹⁷ Whakakitea mai ki ahau he tohu mō te pai; kia kite ai te hunga e kino ana ki ahau, kia whakamā ai; nōu e Ihowā i āwhina i ahau, i whakamārie i ahau.