Waiata 85 - Paipera Tapu 2012

He Īnoi mō te Oranga o te Iwi

Ki te tino kaiwhakatangi. He hīmene mā ngā tama a Koraha.

¹ E Ihowā, kua aro mai koe ki tōu whenua, kua whakahokia mai e koe a Hākopa i te whakarau.

² Kua murua e koe te kino o tāu iwi, kua hīpokina e koe ō rātou hara katoa. Hera

³ Kua mutu katoa tōu weriweri; kua tahuri kē koe i te āritarita o tōu riri.

⁴ Whakahokia ake mātou, e te Atua o tō mātou whakaoranga; meinga hoki kia mutu tōu riri ki a mātou.

⁵ E riri rānei koe ki a mātou ake ake? E mauāhara tonu rānei, ki ngā whakatupuranga katoa?

⁶ E kore ianei koe e whakahoki ake i a mātou ki te ora; kia hari ai tāu iwi ki a koe?

⁷ E Ihowā, whakakitea mai tāu mahi tohu ki a mātou; tukua mai ki a mātou tāu whakaoranga.

⁸ Ka whakarongo ahau ki tā te Atua, ki tā Ihowā, e kōrero ai; nō te mea mō te rongo mau āna kōrero ki tāna iwi, ki tāna hunga tapu hoki; kaua ia rātou e hoki ki te wairangi.

⁹ Inā, he tata tonu tāna whakaoranga ki te hunga e wehi ana ki a ia kia noho ai te korōria ki tō tātou whenua.

¹⁰ Kua tūtaki te mahi tohu rāua ko te pono; kua kihi ki a rāua te tika me te rongo mau.

¹¹ Ka tupu ake te pono i te whenua, ā, ka titiro iho te tika i te rangi.

¹² Āe, ka hōmai e Ihowā te pai, ā, ka tukua mai ōna hua e tō tātou whenua.

¹³ Ka haere te tika i mua i a ia, hei whakatū i a tātou ki te ara o ōna hīkoinga.