Waiata 82 - Paipera Tapu 2012

Ko te Atua te Rangatira Tino Nui

He hīmene nā Āhapa.

¹ E tū ana te Atua i roto i te whakaminenga o te Atua, e whakawā ana i waenganui i ngā atua:

² “Kia pēhea ake te roa o tā koutou whakawā hē, o tā koutou whakapai ki ngā kanohi o te hunga kino. Hera

³ Whakatikaia tā te ware, tā te pani; kia tika te whakawā mō te ngākau mamae, mō te rawakore.

⁴ Whakaorangia te ware me te rawakore; tangohia mai rātou i te ringa o te tangata kino.

⁵ “Kāhore ō rātou mātauranga, kāhore hoki e mahara; e kōpikopiko noa ana rātou i te pōuri; e oioi ana ngā tūranga katoa o te whenua.

⁶ “I mea ahau, ‘He atua koutou, he tama katoa nā te Runga Rawa.’

⁷ Heoi, ka pērā koutou me te tangata, ka mate; ka hinga, ka pērā me tētahi o ngā piriniha.”

⁸ E ara, e te Atua, whakawākia te whenua; mōu hoki ngā tauiwi katoa!