Waiata 81 - Paipera Tapu 2012

Te Tohe a te Atua ki a Īharaira Pōturi

Ki te tino kaiwhakatangi: Kititi. Nā Āhapa.

¹ Kia kaha te waiata ki te Atua, ki tō tātou kaha; kia hari te hāmama ki te Atua o Hākopa.

² Whakahuatia te hīmene, maua mai ki konei te timipera, te hāpa reka me te hātere.

³ Whakatangihia te tētere i te kōwhititanga marama, i te kīnga o te mārama, i tō tātou rā hākari.

⁴ Ko te tikanga hoki tēnei mā Īharaira, he mea whakarite nā te Atua o Hākopa.

⁵ I whakatakotoria tēnei e ia mā Hōhepa hei whakaaturanga, i tōna haerenga puta noa i te whenua o Īhipa. I rongo ai ahau ki reira i tētahi reo, kāhore ahau i mātau:

⁶ “I tangohia mai e ahau tōna pokohiwi i te pīkaunga; whakarērea ake e ōna ringa te kete.

⁷ I karanga koe ki ahau i te pōuritanga, ā, kua ora koe i ahau; i whakahoki kupu ahau ki a koe i te wāhi ngaro o te whatitiri; i whakamātau i a koe ki ngā wai o Meripa. Hera

⁸ “Whakarongo, e tāku iwi, ā, ka whakaatu ahau ki a koe; e Īharaira, ki te whakarongo koe ki ahau!

⁹ Aua tētahi atua kē i roto i a koe; kaua anō e koropiko ki te atua kē.

¹⁰ Ko Ihowā ahau, ko tōu Atua, i ārahina mai ai koe i te whenua o Īhipa. Kia nui te kowhera o tōu māngai, ā, māku e whakakī.

¹¹ “Otiia, kīhai tāku iwi i pai ki te whakarongo ki tōku reo; kīhai anō a Īharaira i aro ki ahau.

¹² Nā, tukua atu ana rātou e ahau ki te mārō o ō rātou ngākau; ā, haere ana rātou i runga i ō rātou whakaaro.

¹³ “Auē, te whakarongo tāku iwi ki ahau, te haere a Īharaira i āku ara!

¹⁴ Pēnei e kore e aha kua whati i ahau te tara o ō rātou hoariri; kua tahuri anō tōku ringa ki ō rātou hoariri.

¹⁵ Ko te hunga e kino ana ki a Ihowā kua ngohengohe ki a ia, ko tō rātou tāima ia kua mau tonu.

¹⁶ Kua whāngainga hoki rātou e ia ki te wīti pai rawa, kua whakamākonatia anō koe e ahau ki te honi i roto i te kōhatu.”