Waiata 80 - Paipera Tapu 2012

He Īnoi mō te Whakaoranga o Īharaira

Ki te tino kaiwhakatangi: Hohanimi Erutu. He hīmene nā Āhapa.

¹ Tahuri mai tōu taringa, e te Hēpara o Īharaira, e ārahi nei i a Hōhepa ānō he kāhui hipi! Whiti mai koe e noho mai nā i waenganui i ngā kerupima;

² whakaohoohokia tōu kaha i te aroaro o Ēparaima, o Pineamine, o Mānahi; ā, haere mai ki te whakaora i a mātou.

³ Whakahokia ake mātou, e te Atua; kia mārama mai tōu mata, ā, ka ora mātou.

⁴ E Ihowā, e te Atua o ngā mano, kia pēhea ake te roa o tōu riri ki te īnoi a tāu iwi?

⁵ Kua whāngaia mai e koe he roimata hei taro mā rātou, he nui hoki te mēhua roimata kua hōmai nei e koe kia inumia e rātou.

⁶ Kua meinga mātou e koe hei totohetanga mā ō mātou hoa, ā, e kataina ana mātou e ō mātou hoariri.

⁷ Whakahokia ake mātou, e te Atua o ngā mano; kia mārama mai tōu mata, ā, ka ora mātou.

⁸ I maua mai e koe he wāina i Īhipa; ka oti i a koe ngā tauiwi te panga, nā whakatōkia iho e koe.

⁹ I whakapaia e koe he tūnga mōna; nā, ka hou ōna pakiaka, ā, ka kapi te whenua.

¹⁰ Taumarumaru ana tōna ata ki runga ki ngā pukepuke; ko ōna manga rite tonu ki ngā hīta a te Atua.

¹¹ I tautotoro atu ōna manga ki te moana, ōna rārā ki te awa.

¹² He aha i pākaruhia ai e koe ōna taiepa ki raro, kia kōwhakiwhakia ai ia e ngā tāngata katoa e tika ana i te ara?

¹³ Mongamonga noa i te poaka toa o te ngahere, e kainga ana e te kīrehe mohoao o te pārae.

¹⁴ Tahuri mai anō, e te Atua o ngā mano, e īnoi atu nei mātou; titiro iho i te rangi, kia kite mai koe, ka toro mai i tēnei wāina,

¹⁵ i te rākau i whakatōkia e tōu matau, i te manga hoki i meinga e koe kia pakari māu.

¹⁶ Kua pau i te ahi, kua tuaina ki raro; ngaro iho rātou i te riri o tōu mata.

¹⁷ Waiho tōu ringa i runga i te tangata o tōu matau, i te tama a te tangata i whakakahangia e koe māu.

¹⁸ Pēnei e kore mātou e hoki atu i a koe; whakahauorangia mātou, ā, ka karanga mātou ki tōu ingoa.

¹⁹ Whakahokia ake mātou, e Ihowā, e te Atua o ngā mano; kia mārama mai tōu mata, ā, ka ora mātou.