Waiata 73 - Paipera Tapu 2012

PUKAPUKA 3 ( Waiata 73–89 ) He Īnoi mō te Whakamāmā i ngā Kaiwhakawiri

He hīmene nā Āhapa.

¹ He pono, he pai te Atua ki a Īharaira; ki te hunga ngākau mā.

² Ko ahau ia, wāhi iti kua tapepa ōku waewae; me i kotahi kua paheke ōku takahanga.

³ I hae hoki ahau ki te hunga whakahī, i tōku kitenga i te tangata hara e kake ana.

⁴ Kāhore hoki he whakawiringa a te mate i a rātou; he mārō anō ō rātou uaua.

⁵ Kāhore ngā mea whakapōuri tāngata e pā ki a rātou; kāhore anō rātou e whiua tahitia me te mano tāngata.

⁶ Nā reira, ānō he hei te whakakake e awhi nei i a rātou, ānō he kākahu te tutū e hīpokina nei rātou.

⁷ Pupuhi ana ō rātou kanohi i te ngako; nui ake ngā mea i a rātou i a ō rātou ngākau i hiahia ai.

⁸ E whakahī ana rātou, e kōrero kino ana mō te whakatoi; kei runga noa ake ā rātou kōrero.

⁹ Tutuki tonu tō rātou māngai ki ngā rangi; e kōpikopiko ana hoki tō rātou arero i runga i te whenua.

¹⁰ Koia tōna iwi i hoki mai ai ki konei; ā, e whakawiria ana he wai mō rātou, kī tonu te kapu.

¹¹ E mea ana rātou, “Mā te aha e mātau ai te Atua? He mātauranga koia tō te Runga Rawa?”

¹² Nanā, ko te hunga kino tēnei, kei runga tonu i te whenua rangatira, e hua ana ō rātou taonga.

¹³ He pono he maumau tāku mea i tōku ngākau kia mā, tāku horoi hoki i ōku ringa ki te harakore.

¹⁴ E whiua ana hoki ahau i te roa o te rā, e pākia ana i ngā ata katoa.

¹⁵ Me i kī ahau, “Ka pēnei tāku kōrero,” nā, e tinihanga ana ahau ki te whakatupuranga o āu tamariki.

¹⁶ I tāku meatanga kia mātauria tēnei, ka kite ahau he mahi whakauaua rawa;

¹⁷ tae noa ahau ki te wāhi tapu o te Atua, kātahi ahau ka mōhio ki tō rātou mutunga.

¹⁸ He pono i whakatūria rātou e koe ki ngā wāhi pāhekeheke; ā, whakatakā ana e koe ki te ngaromanga.

¹⁹ Anō te pānga whakareretanga o tō rātou hunanga, kua pau rawa i ngā wehi!

²⁰ Ka rite ki te rekanga kanohi, ina ara ake te tangata, tāu whakahāwea ki tō rātou āhua, e te Ariki, ina ara ake koe.

²¹ Nā, mamae noa iho tōku ngākau, ā, hukihuki ana ōku whatumanawa.

²² He whakaarokore hoki ahau, he kūware; me te mea he kīrehe ahau i tōu aroaro.

²³ Ahakoa rā kei a koe tonu ahau; e puritia ana e koe tōku ringa matau.

²⁴ Mā tōu whakaaro ahau e ārahi; muri iho ka riro ahau i a koe ki te korōria.

²⁵ Ko wai hoki tōku i te rangi ko koe anake? Kāhore atu hoki ōku i te whenua e hiahia ai, ko koe anake.

²⁶ Hemo iho ōku kikokiko me tōku ngākau; ko te Atua ia te kaha o tōku ngākau, tōku wāhi ake ake.

²⁷ Nā, ko te hunga e mamao atu ana i a koe ka mate; ka ngaro i a koe te hunga pūremu katoa e whakarere nei i a koe.

²⁸ Ko ahau ia, he pai ki ahau te whakatata ki te Atua; kua waiho e ahau te Ariki, a Ihowā, hei whakawhirinakitanga mōku, kia whakapuakina ai e ahau āu mahi katoa.