Waiata 72 - Paipera Tapu 2012

He Īnoi mō te Kīngi

Nā Horomona.

¹ Hōmai e te Atua, āu whakaritenga ki te kīngi, me tōu tika ki te tama a te kīngi.

² Māna e whakawā tōu iwi i runga i te tika, āu rawakore i runga i te whakawā tika.

³ Ka kawea mai e ngā maunga te rongo mau ki te iwi, e ngā pukepuke i runga i te tika.

⁴ Ka whakawā ia mō ngā ware o te iwi; ka whakaorangia e ia ngā tamariki a te rawakore; mongamonga noa i a ia te kaitūkino.

⁵ I te rā e mau ana, i te marama hoki, ka pērā te mau o tō rātou wehi ki a koe i ngā whakatupuranga katoa.

⁶ E heke iho ia ānō he ua ki runga ki te kotinga tarutaru, me ngā ua e whakamākūkū nei i te whenua.

⁷ Ka tupu te tangata tika i ōna rā; tōna roa anō o te āta noho, ā, kore noa te marama.

⁸ Ka kīngi ia i tēnei moana, ā tae noa ki tētahi moana, i te awa, ā ngā pito atu anō o te whenua.

⁹ Ka piko ki tōna aroaro te hunga o te koraha; ā, ka mitimiti ōna hoariri i te puehu.

¹⁰ Ka maua mai he hākari e ngā kīngi o Tarahihi, o ngā motu; ka kawea mai he tahua e ngā kīngi o Hēpā, o Tepa.

¹¹ Āe, ka koropiko ngā kīngi katoa ki a ia; ka mahi ngā iwi katoa ki a ia.

¹² Ka ora hoki i a ia te rawakore ua tangi atu, te ware hoki me te tangata kāhore nei ōna kaiāwhina.

¹³ E tohu ia i te tangata iti, i te rawakore; ka ora anō i a ia ngā wairua o ngā rawakore.

¹⁴ Ka hokona e ia tō rātou wairua i roto i te tūkino, i te tutū, he mea utu nui hoki ō rātou toto ki tāna titiro.

¹⁵ Ā, e ora rātou! Ka hoatu anō ki a ia he kōura nō Hēpā. Ka tukua tonutia hoki te īnoi mōna; ka whakapaingia ia i tēnei rā, i tēnei rā.

¹⁶ He kutanga wīti tērā i runga i te whenua, i te tihi o ngā maunga; ngarue ana ōna hua, ānō ko Repanōna, ā, ka rite te tupu o ngā tāngata o te pā ki tō te tarutaru o te whenua.

¹⁷ Ka mau tonu tōna ingoa ake ake; ka rite tōna ingoa ki te rā te pūmau. Kei roto i a ia te manaaki mō te tangata; ka kōrerotia tōna koa e ngā iwi katoa.

¹⁸ Kia whakapaingia a Ihowā, te Atua, te Atua o Īharaira; ko ia nei anake hei mahi i ngā mahi whakamīharo.

¹⁹ Kia whakapaingia anō tōna ingoa korōria mō ake tonu atu; kia kī katoa hoki te whenua i tōna korōria. Āmine, āe Āmine.

²⁰ Ko te mutunga tēnei o ngā īnoi a Rāwiri, a te tama a Hehe.