Waiata 61 - Paipera Tapu 2012

Ko te Atua, ko Tōku Piringa

Ki te tino kaiwhakatangi: Nekina. Nā Rāwiri.

¹ Whakarongo, e te Atua, ki tāku karanga; tahuri mai ki tāku īnoi.

² Ka karanga ahau ki a koe i te pito o te whenua, ina pēhia tōku ngākau. Ārahina ahau ki te kōhatu e tiketike ake ana i ahau.

³ He piringa hoki koe mōku; he pā kaha i te hoariri.

⁴ Ka noho ahau ki tōu tapenākara ake ake, ka okioki ki ōu pākau hei piringa. Hera

⁵ Kua rongo nei hoki koe, e te Atua i āku kupu taurangi, kua hōmai e koe te wāhi o te hunga e wehi ana ki tōu ingoa.

⁶ Ka whakaraneatia e koe ngā rā o te kīngi; ōna tau ki ngā whakatupuranga katoa.

⁷ E noho ia i te aroaro o te Atua ake ake; whakaritea mai he aroha, he pono, hei tiaki i a ia.

⁸ Pēnei ka hīmene ahau ki tōu ingoa ake ake; ka whakamanā e ahau āku kupu taurangi i tēnei rā, i tēnei rā.