Waiata 53 - Paipera Tapu 2012Te Kinotanga o te Tangata ( Waiata 14 ) Ki te tino kaiwhakatangi: Maharata. He Makiri, nā Rāwiri. 1 Kua kī te wairangi i roto i tōna ngākau, “Kāhore he Atua.” Kua pirau rātou, he kino whakahouhou tā rātou mahi; kāhore tētahi e mahi ana i te pai. 2 I titiro iho te Atua i te rangi ki ngā tama a te tangata, kia kite me kāhore tētahi e mahara ana, e rapu ana i te Atua. 3 Kua hoki ki muri rātou katoa, kua pirau tahi; kāhore tētahi e mahi ana i te pai, kāhore kia kotahi. 4 E kore rānei e mōhio ngā kaimahi i te kino, e kai nei i tōku iwi, me te mea e kai taro ana; ā, kāhore e karanga ki te Atua? 5 Wehi noa iho rātou i reira, i te wāhi kāhore he wehi. Nō te mea kua tītaria e te Atua ngā wheua o te tangata i whakapaea ai koe; kua whakamā rātou i a koe, nō te mea kua whakahāweatia rātou e te Atua. 6 Auē, me i puta mai te whakaoranga o Īharaira i Hiona! Kia whakahokia mai e te Atua tāna iwi i te whakarau, ka whakamanamana a Hākopa, ka hari a Īharaira. |
Ngā Ringa Hāpai i te Paipera Tapu ki Aotearoa 1952, 2012 © (Bible Society New Zealand inc. 1952, 2012).
New Zealand Bible Society