Waiata 51 - Paipera Tapu 2012

He Īnoi mō te Murunga

Ki te tino kaiwhakatangi. He hīmene nā Rāwiri, i te taenga o Nātana poropiti ki a ia, mō tōna haerenga ki a Patehēpa.

¹ Tohungia ahau, e te Atua, kia rite ki tōu atawhai; kia rite ki tōu aroha nui te murunga o ōku hē.

² Horoia rawatia tōku kino; kia mā hoki tōku hara.

³ E whāki ana hoki ahau i āku mahi tutū; kei tōku aroaro tonu tōku hara.

⁴ He hara ki a koe, ki a koe anake, tōku; i meatia anō tēnei hē ki tōu aroaro; kia tika ai koe i tāu kōrerotanga, kia mā ai hoki ina whakawā.

⁵ Nā, i whakaahuatia ahau i roto i te kino, i runga anō i te hara tōku whakahapūtanga ki roto ki tōku whaea.

⁶ Nā, ko tāu e matenui ai ko te pono i ngā wāhi o roto, ā, ka whakaakona ōku wāhi ngaro e koe ki te whakaaro nui.

⁷ Purea ahau ki te hihopa, ā, ka mā ahau; horoia ahau, ā, ka mā kē atu i te hukarere.

⁸ Meinga kia rongo ahau i te hari, i te koa, ā, ka whakamanamana ngā iwi i whatia nei e koe.

⁹ Hunā tōu mata ki ōku hara; ā, murua katoatia ōku kino.

¹⁰ Hangā, e te Atua, he ngākau mā ki roto ki ahau; whakahoutia hoki ki roto ki ahau he wairua tika.

¹¹ Kaua ahau e makā i tōu aroaro; kaua hoki tōu Wairua Tapu e tangohia i ahau.

¹² Whakahokia mai ki ahau te hari o tāu whakaoranga; tautokona hoki ahau ki te wairua kakama.

¹³ Ko reira ahau whakaako ai i āu ara ki te hunga tutū; ā, ka tahuri te hunga hara ki a koe.

¹⁴ Whakaorangia ahau i te hara toto, e te Atua, e te Atua o tōku whakaoranga, ā, ka waiatatia āu mahi tika e tōku arero.

¹⁵ Whakatuwheratia ōku ngutu, e te Ariki; ā, ka puaki i tōku māngai te whakamoemiti ki a koe.

¹⁶ Kāhore nei hoki koe e aro ki te patunga tapu, pēnei kua hoatu e ahau. Kāhore koe e āhuareka ki te tahunga tinana.

¹⁷ Ko ngā patunga tapu mā te Atua he wairua marū; e kore koe e whakahāwea e te Atua, ki te ngākau marū, ki te ngākau iro.

¹⁸ Kia pai koe ki te atawhai i Hiona; hangā ngā taiepa o Hiruhārama.

¹⁹ Ko reira koe pai ai ki ngā patunga tapu o te tika, ki ngā tahunga tinana, he mea whakaeke katoa; ko reira rātou whakaeke ai i ngā pūru ki runga ki tōu āta.