Waiata 44 - Paipera Tapu 2012

He Īnoi mō te Whakangungu

Ki te tino kaiwhakatangi, mā ngā tama a Koraha. He Makiri.

¹ E te Atua, kua rongo ō mātou taringa, kua kōrerotia ki a mātou e ō mātou mātua, ngā mahi i mahia e koe i ō rātou rā, i ngā rā ō mua:

² nāu ngā tauiwi i pana ki tōu ringa, nāu rātou i whakatō; nāu ngā iwi i whiu, ā, whakamararatia ana rātou.

³ Ehara hoki i te mea, nā tā rātou hoari i whiwhi ai rātou ki te whenua, ehara tō rātou tākakau i te mea i ora ai rātou; engari nā tōu matau, nā tōu tākakau hoki, nā te mārama anō o tōu mata, he pai hoki nōu ki a rātou.

⁴ E te Atua, ko koe tōku Kīngi; whakahaua he whakaora mō Hākopa.

⁵ Māu ka turaki ai mātou i ō mātou hoariri; mā tōu ingoa ka takahia ai e mātou te hunga e whakatika ana ki a mātou.

⁶ E kore hoki ahau e whakawhirinaki ki tāku kōpere; e kore anō tāku hoari e whakaora i ahau.

⁷ Nāu hoki mātou i ora ai i ō mātou hoariri; nāu anō i whakamā ai te hunga i kino ki a mātou.

⁸ Ko te Atua tā mātou e whakamanamana ai i te roa o te rā; ka whakamoemiti anō mātou ki tōu ingoa ake ake. Hera

⁹ Otirā, kua pangā nei mātou e koe, kua meinga kia whakamā; kāhore hoki koe kia haere tahi me ā mātou taua.

¹⁰ Kua meinga mātou kia hoki whakamuri mai i te hoariri; kei te pāhua anō i ētahi mā rātou te hunga e kino ana ki a mātou.

¹¹ Kua hoatu mātou e koe, ānō he hipi e kainga ana; kua marara ki roto ki ngā tauiwi.

¹² E hokona ana e koe tāu iwi, ā, hore he utu; kāhore hoki koe e whiwhi rawa i te utu mō rātou.

¹³ E meinga ana mātou e koe hei tāwainga mā ō mātou hoa kāinga; hei whakahāweatanga, hei whakakatanga mai mā te hunga i tētahi taha, i tētahi taha o mātou.

¹⁴ E meinga ana mātou e koe hei whakatauki mā ngā tauiwi; hei rurutanga mātenga mā ngā iwi.

¹⁵ Kei mua tonu i ahau tōku whakamā; kua taupokina ahau e te pāwera o tōku mata;

¹⁶ i te reo o te kaitāwai, o te kaikohukohu; i te hoariri, i te kairapu utu.

¹⁷ Kua pā katoa tēnei ki a mātou; heoi kāhore mātou i wareware ki a koe, kīhai anō i teka ki tāu kawenata.

¹⁸ Kāhore tō mātou ngākau i tahuri whakamuri; kīhai anō ō mātou hīkoinga i peka kē i tāu ara.

¹⁹ I marū ai mātou i a koe i te wāhi o ngā tarakona; ā, taupoki rawa ki te ātārangi o te mate.

²⁰ Mehemea kua wareware mātou ki te ingoa o tō mātou Atua, kua totoro rānei ō mātou ringa ki te atua kē;

²¹ e kore rānei tēnei e āta tirohia e te Atua? E mātau ana hoki ia ki ngā mea ngaro o te ngākau.

²² Mōu nei hoki mātou i patua ai i te rā roa nei; kīia iho mātou he hipi e patua ana.

²³ E ara, he aha koe ka moe ai, e te Ariki? Whakatika, kaua mātou e pangā tonutia.

²⁴ He aha koe ka huna ai i tōu mata? Ka wareware ai ki tō mātou mamae, ki tō mātou tūkinotanga?

²⁵ Kua piko nei hoki tō mātou wairua ki raro ki te puehu; piri rawa tō mātou kōpū ki te whenua.

²⁶ E ara, hei āwhina i a mātou; kia mahara ki tōu aroha, ā, hokona mātou.