Waiata 4 - Paipera Tapu 2012

He Īnoi i te Ahiahipō mō te Āwhina

Ki te tino kaiwhakatangi Nekinoto. He hīmene nā Rāwiri.

¹ Whakahokia mai he kupu ki ahau, e te Atua o tōku tika, ina karanga ahau. I ahau i te pōuri i whakaputaina ahau e koe; kia atawhai ki ahau, whakarongo ki tāku īnoi.

² E ngā tama a te tangata, kia pēhea te roa o tā koutou mea i tōku korōria hei whakamā, o tā koutou aroha ki te horihori, o tā koutou whai i te teka? Hera

³ Otiia kia mōhio koutou he mea momotu kē nā Ihowā te tangata tapu māna; e whakarongo a Ihowā ua karanga ahau ki a ia.

⁴ Kia oho koutou, ā, kaua e hara; kōrerorero ki ō koutou ngākau i runga i ō koutou moenga, me te āta takoto anō. Hera

⁵ Patua ngā whakahere o te tika, me te okioki anō ki a Ihowā.

⁶ He tokomaha te mea ana, “Mā wai e whakakite te pai ki a mātou? Kia ara, e Ihowā, te mārama o tōu mata ki runga ki a mātou.”

⁷ Hira ake te hari i hōmai e koe ki roto ki tōku ngākau i tō rātou i te wā i hua ai ā rātou wīti, tā rātou wāina.

⁸ Ka takoto mārire ahau, ā, moe tonu iho; ko koe anake hoki, e Ihowā, hei mea kia au tōku noho.