Waiata 35 - Paipera Tapu 2012

He Īnoi mō te Rapunga Utu

Nā Rāwiri.

¹ E ngana, e Ihowā, ki te hunga e tohe ana ki ahau; whawhaitia te hunga e whawhai nei ki ahau.

² Kia mau ki te whakangungu rākau, ki te puapua; whakatika hei āwhina mōku.

³ Unuhia te tao, āraia te ara o te hunga e whai nei i ahau; kī mai ki tōku wairua, “Ko ahau tōu whakaoranga.”

⁴ Kia whakamā, kia numinumi te hunga e whai ana kia whakamatea ahau; kia whakahokia ki muri, kia whakapōauautia te hunga e whakatakoto ana i te kino mōku.

⁵ Kia rite rātou ki te pāpapa e pūhia ana e te hau; kia āia haeretia e te anahera a Ihowā.

⁶ Kia pōuri tō rātou ara, kia pāhekeheke; kia whāia rātou e te anahera a Ihowā.

⁷ Kāhore hoki he rawa i hunā ai e rātou te poka o tā rātou kupenga mōku; he mea keri takekore kia mate ai ahau.

⁸ Kia rokohanga pōauautia ia e te ngaromanga; kia mau anō ko ia i tāna kupenga i huna ai, kia taka ia ki taua tino ngaromanga.

⁹ Ā, ka koa tōku wairua ki a Ihowā, ka hari ki tāna whakaoranga.

¹⁰ Ka kī katoa ōku wheua, “E Ihowā, ko wai te rite mōu, mō te kaiwhakaora o te iti i te tangata e kaha ake ana i a ia, āe, o te iti, o te rawakore i tōna kaipāhua?”

¹¹ Whakatika ana ngā kaiwhakapae teka; whakawākia ana ahau mō ngā mea kīhai nei ahau i mātau atu.

¹² Utua ana e rātou tāku pai ki te kino, ā, whakatupu pani ana tōku wairua.

¹³ Tēnā ko ahau, i a rātou e mate ana, he kahu taratara tōku, waikauwere ana tōku wairua, kīhai i kai; ā, hoki mai ana tāku īnoi ki tōku uma.

¹⁴ Ko tōku āhua me te mea he hoa ia, he teina nōku; kūpapa noa iho ahau, ānō he tangata e tangi ana ki tōna whaea.

¹⁵ I tōku paheketanga ia koa ana rātou, huihui ana; huihui ana ngā tāngata kino noa iho hei hoariri mōku, kīhai anō ahau i mōhio, haehae ana rātou i ahau, kīhai hoki i mutu.

¹⁶ Rite tonu ki ngā kaiwhakakata o ngā hākari, tetēā ana ō rātou niho ki ahau.

¹⁷ E te Ariki, kia pēhea te roa o tāu titiro kau mai? Whakaorangia tōku wairua i ā rātou whakangaromanga, tāku e aroha nei, i ngā raiona.

¹⁸ Ka whakawhetai ahau ki a koe i roto i te whakaminenga nui, ka whakamoemiti ki a koe i roto i te iwi maha.

¹⁹ Kei hari pokanoa ki ahau ōku hoariri; kei whakakini te kanohi o te hunga e kino noa ana ki ahau.

²⁰ Ehara hoki tā rātou i te kōrero mō te rangimārie; heoi kei te whakatakoto kupu tinihanga rātou mō te hunga āta noho o te whenua.

²¹ Inā, hāmama ana ō rātou māngai ki ahau, e kī ana, “Ha, ha, kua kite tō mātou kanohi!”

²² Kua kite koe, e Ihowā; kaua rā e wahangū, e te Ariki, kei matara i ahau.

²³ Oho ake, e ara ki te whakarite i tōku whakawā, ki tāku tautohe, e tōku Atua, e tōku Ariki.

²⁴ Kia rite ki tōu tika te whakarite mōku, e Ihowā, e tōku Atua: kei koa anō rātou ki ahau.

²⁵ Kei mea rātou i roto i ō rātou ngākau, “Ha, ko tā mātou tēnā i pai ai.” Kei mea rātou, “Kua horomia ia e tātou.”

²⁶ Kia whakamā, kia numinumi ngātahi, te hunga e koa ana ina hē ahau; kia whakakākahuria ki te whakamā, ki te numinumi, te hunga e whakakake ana ki ahau.

²⁷ Kia hāmama i te hari, kia koa te hunga e pai ana ki tāku mahi tika; āe, kia mea tonu, “Kia whakanuia a Ihowā e whakapai nei ki te ora o tāna pononga.”

²⁸ Ā, ka kōrerotia e tōku arero tāu mahi tika, me te whakamoemiti ki a koe i te rā roa.